თავისუფალი ჭიდაობა. ისე მიაწებეს მოღალატის იარლიყი, არავის გახსენებია, რამდენჯერ ასახელეს მათ სამშობლო!

ერთ კვირაზე მეტია, ფოტოების სკანდალით შეზანზარებული საქართველოს თავისუფალი სტილით მოჭიდავეთა ნაკრები სომხურ წახკაძორში იმყოფება, სადაც მსოფლიოს ჩემპიონატისთვის მზადების ფარგლებში ფიზიკური მომზადებისთვის განკუთვნილ შეკრებას გადის.

მთავარმა მწვრთნელმა გიორგი იანტბელიძემ იქ გაფართოებული შემადგენლობა - 28 კაცი წაიყვანა. მათ შორის გუნდის ყველა ლიდერია.

საბედნიეროდ, იანტბელიძის გუნდში ყველა მეტ-ნაკლებად ჯანმრთელადაა და ამ მხრივ პრობლემები არ აწუხებთ. შედარებით მძიმე ტრავმა მხოლოდ ოლიმპიურ, მსოფლიოსა და ევროპის სამგზის ჩემპიონ ვლადიმერ ხინჩეგაშვილს (65) აწუხებს, ვინც ჯერ კიდევ საქართველოში ყოფნისას, სომხეთში წასვლამდე ერთ-ერთ ბოლო ვარჯიშზე ფეხი იტკინა. თუმცა არც მისი ტრავმა არაა სერიოზული და საშიში, მისი სავარჯიშო პროცესი რომ შეაფერხოს.

იმედია, გუნდი იმ ფსიქოლოგიურ ფონსაც გადალახავს, რომლის ფარგლებშიც მოუწიათ სომხეთში წასვლამ, "ფოტოების სკანდალს" მალე დაივიწყებს და აგვისტოს ბოლოს ბუდაპეშტში ჩასატარებელი მსოფლიოს ჩემპიონატისთვის ღირსეულად მოემზადება.

პოლიტიკასთან სიფრთხილეა საჭირო

შეგახსენებთ, რომ ინტერნეტში გავრცელდა ჯერ კიდევ აპრილში, დაღესტნურ ხასავიურტში ჩატარებულ ევროპის ჩემპიონატზე გადაღებული ფოტოები, სადაც იანტბელიძე და ჩვენი მსოფლიოს ჩემპიონები - ზურაბ იაკობიშვილი (70) და გენო პეტრიაშვილი (125) რუს ვეტერან მოჭიდავეებთან (უფრო ზუსტად, მასპინძელ დაღესტნელებთან) ერთად დგანან რუსული დროშის ფერებში შეკერილი მაისურებით, რომელზეც რუსეთის ნაკრების მთავარი მწვრთნელი, ეროვნებით ოსი და ჩრდილო ოსეთის პარლამენტის წევრი ჯამბულათ თედეევია გამოსახული. ამ ფოტოების გამოქვეყნებას საქართველოში ამბავი მოჰყვა, მოწმენდილ ცაზე მეხის გავარდნა მონაგონია, ხოლო "ქარიშხალი ჭიქა წყალში" გასახსენებლადაც არ ღირს.

მწვრთნელ-სპორსტმენებმა სოციალურ ქსელში ქომაგებს, საზოგადოებას ბოდიში მოუხადეს და აღნიშნეს, რომ ეს არ იყო არავითარი პოლიტიკური აქცია.

მათი თქმით, თურმე ამ მაისურების ჩაცმა და სურათების გადაღება თავად თედეევმა სთხოვათ. თან დასძინეს, რომ მსგავსი ჟესტი საჭიდაო შეჯიბრებებზე ჩვეულებრივი ამბავია და აგერ, ივლისში თბილისში "კარტოზია-ბალავაძის ტურნირზე" რუსებიც დადიოდნენ ხინჩეგაშვილის გამოსახულებიანი მაისურებითო.

   ⇒მწვრთნელის განმარტება, რატომ ჩაიცვეს მოჭიდავეებმა რუსეთის დროშიანი მაისურა

სულაც არ ვაპირებთ შარლატანების, დემაგოგებისა თუ ათასი ჯურის ხალხის თავშესაფრად ქცეული სოციალური ქსელების რიტორიკას ავყვეთ და ამ ბიჭებს მოღალატეები ვეძახოთ - სოცქსელებში ხომ მოდაშია და ჩვეულებრივი ამბავია ისეთ თემებზე კამათი, რის შესახებაც ნაკლები ინფორმაცია აქვთ.

სამწუხაროდ, ყველაფერში რადიკალური ისტერიკის მიმდევრებს ხშირად გვავიწყდება რეალობა და ამ ბიჭებს ახლაც ისე მიაწებეს მოღალატის იარლიყი, არავის გახსენებია, რამდენჯერ ასახელეს მათ სამშობლო და არც იმაზე დაფიქრებულან, მომავალში კიდევ რამდენჯერ გაიტანენ საქართველოს სახელს მსოფლიოს არენაზე. ღრმად ვარ დარწმუნებული (ვისაც უნდა, ნუ დამეთანხმება - ეს მისი ნებაა), ეს მართლაც გაუაზრებლად გააკეთეს, თუმცა ძალიან არასასურველი ნაბიჯი რომ გადადგეს და არასასურველ ისტორიაში აღმოჩნდნენ გარეულები, ესეც ცხადზე უცხადესია და ამაზე კამათიც არ ღირს.

სულაც არ ვაპირებთ, მოჭიდავეებს ჭკუა დავარიგოთ, მაგრამ ცოტა მეტ სიფრთხილეს, მეტ დაკვირვებას კი ნამდვილად ვურჩევდით. განსაკუთრებით მაშინ, როცა საქმე პოლიტიკას ეხება, რადგან ის ბინძური სფეროა და ხშირად საკუთარი პრინციპების საწინააღმდეგოდ წასვლასაც გაიძულებს.

ამ ნაკრების წევრთა უმეტესობა დაბადებულიც არ იყო და მხოლოდ გადმოცემით თუ ეცოდინებათ "რკინის ლედად" წოდებული ბრიტანეთის ყოფილი პრემიერი მარგარეტ ტეტჩერი - ქალი, რომელმაც ეპოქა შექმნა.

ამბობდნენ, რომ მის თვალზე ორჯერ დაინახეს ცრემლი: პირველად, როცა პარიზი-დაკარის ავტორალზე წასულ შვილზე ნერვიულობდა, და მეორედ ფოლკლენდის კუნძულების ომისას, როცა მისი ბრძანებით, არგენტინული სამხედრო კატარღა ჩაძირეს, რის შემდეგაც 20-მა არგენტინელმა დედამ ჩაიცვა შავი. ტეტჩერი დედა იყო და კარგად იცოდა შვილმკვდარი დედების ხვედრი, მაგრამ პოლიტიკის გამო მაინც გადადგა ეს ნაბიჯი და გასცა ასეთი ბრძანება.

თუმცა ტეტჩერს თავი დავანებოთ და, აგერ, ხინჩეგაშვილის მაგალითიც გვაქვს, ვისაც სხვადასხვა პოლიტიკური ასპექტის გამო (ვფიქრობ, საზოგადოებას ახსოვს ეს დეტალები და აღარ განვავრცობ), ლამის ანანეს ოლიმპიური ჩემპიონობა, სოცქსელებში ისეთი გარჩევები ეწყობოდა მისი პერსონის ირგვლივ...

მჯერა, რომ ჩვენს სპორტსმენებს იმ ფოტოების გადაღებისას პოლიტიკაზე მართლაც არ უფიქრიათ, მაგრამ ფაქტია - ეს უბრალო ჟესტი ვიღაცებმა სწორედ პოლიტიკური მიზნით გამოიყენეს, თორემ ვის რაში სჭირდებოდა აპრილში გადაღებული სურათების ახლა გამოქვეყნება? ღმერთმა დაგვიფაროს იმ ეპოქის დაბრუნებისგან, როცა გუნდებს თან დაჰყვებოდნენ სუკ-ის აგენტები და პოლიტაგიტატორები, რომლებიც ლექციებს უტარებდნენ სპორტსმენებს, მაგრამ თავადაც უნდა დაფიქრდნენ და აჯობებს, სათოფეზეც ნუ გაეკარებიან ნურაფერს, რაც კი შეიძლება პოლიტიკას უკავშირდებოდეს.

გაგრძელება 7 სექტემბერს

ყოველდღიური სპორტული გაზეთი "ლელო"
1241
მკითხველის კომენტარები / 3 /
ნიკა
0
ვიღაცამ პოლიტიკური მიზნებისთვის გამოიყენა? მაგ ადამიანის სახელი და გვარი ყველას მოეხსენება. ეგ არის პუტინის გოშია, გივი მდივნიშვილი. მე მივწერე მაგ გივის, ბოდიში მოიხადეს ბიჭებმა გაუაზრებელი საქციელისთვის და ეხლა რას იტყვი მეთქი, ხმა არ ამოუღია როცა მანამდე რუსეთის გმირებს ეძახდა მაგ ბიჭებს. გივი მდივნიშვილი არის კკბ-ს აგენტი! არ აჰყვეთ პროვოკაციას. დაწყებული იანტბელიძით და დამთავრებული გულშემატკივრით ყველას წარმატებები.
გიორგი გორგასლიძე
0
ციტატა: "კარტოზია-ბალავაძის ტურნირზე" რუსებიც დადიოდნენ ხინჩეგაშვილის გამოსახულებიანი მაისურებითო".
საქართველოს დროშა იყო მაგ მაისურზე?
მადლობა ჩვენ ბიჭებს ყველა გამარჯვებისთვის, მომავალშიც ვქომაგობთ და ველოდებით, მაგრამ პიროვნებაზე არ არის აქ საუბარი, ოსის გამოსახულებით მაისურს ჩაიცმევს სპორტსმენი თუ ქართველის. თქვენ რომ სთხოვოთ რუს მეგობარ მოჭიდავეებს, მაისური ჩაიცვი საქართველოს დროშით და წარწერით "რუსეთი ოკუპანტი", ან ტატუნაშვილის სურათით, ისინიც გაგებით მოეკიდებიან და თხოვნას შეგისრულებენ? ტეტჩერის ცრემლებიც ძალიან ზედმეტია აქ.
მსგავსი ამბები
რუბრიკის სხვა სიახლეები
;