თავისუფალი ჭიდაობა. დღეს მსოფლიო იწყება: წილისყრა და შანსები [ანალიზი]

20 ოქტომბერს ბუდაპეშტში მოჭიდავეთა მსოფლიოს ჩემპიონატი იწყება, რომელშიც თავდაპირველად თავისუფალი სტილით მოჭიდავეები ჩაებმებიან და წინასწარი ეტაპის შეხვედრებს 61, 74, 86 და 125 კილოგრამების ფალავნები ჩაატარებენ.

61 კილოგრამში საქართველოს ღირსებას ევროპისა და მსოფლიოს ვიცე-ჩემპიონი ბექა ლომთაძე დაიცავს, ვინც საკვალიფიკაციო ეტაპიდან თავისუფალია, მაგრამ წილისყრამ მაინც არ გაუმართლა - რუსი და აზერბაიჯანელი კონკურენტებიც მის მხარეს არიან. ქუთაისელი ათლეტი მეორე წრეში მასპინძელ იოჟეფ მოლნარსა და სენეგალელ ადამა დიატას შორის მოგებულს დაეჭიდება, მერე კი სავარაუდო მეტოქეთა შორის აზერბაიჯანელი ფარვიზ იბრაგიმოვი, კანადელი სკოტ ანტონი იოსეფ შილერი, ჩინელი პინქპინქ ჭოუ და იაპონელი კაზუია კოიანაგი ჰყავს. ბადის ამავე ნახევარშია რუსი ევროპის ორგზის ჩემპიონი და მსოფლიოს შარშანდელი ფინალისტი ჰაჯიმურად რაშიდოვი.

ავთანდილ კენჭაძე (74) საკვალიფიკაციო ეტაპზე უზბეკ ბეკზოდ აბდურახმონოვს ხვდება, ამათში მოგებულს კი მეორე წრეში სუდანელ მუსტაფა მოჰამედ ჰამად ალისა და პოლონელ ანდრეი სოკალსკის შორის უძლიერესი დახვდება. ბადის ამ ნახევარში წონის რამდენიმე აღიარებული ლიდერია: თურქი სონერ დემირტაში, აზერბაიჯანელი აბუბაქარ აბაკაროვი, ბელარუსი აზამატ ნურიკაუ და სხვები.

ნუგზარ სხირელი მსოფლიოს ჩემპიონატის წინ: ლადო ხინჩეგაშვილს მარჯვენა ხელის ფალანგები აწუხებდა

ძნელ ბადეშია 86 კილოგრამში ევროპისა და მსოფლიოს მესამე პრიზიორი სანდრო ამინაშვილი. საკვალიფიკაციო ეტაპზე კოლუმბიელ კარლოს არტურო იზქუიერდო მენდესს შეხვდება, მერვედფფინალში გასვლისას კი პოლონელ ზბიგნევ მათეუშ ბარანოვსკისა და მოლდოველ ევროპის ვიცე-ჩემპიონ პიოტრ იანულოვს შორის უძლიერესს დაეჭიდება. ბადის ამ ნახევარშია წონის აღიარებული ლიდერი, ირანელი ოლიმპიური და მსოფლიოს მოქმედი ჩემპიონი ჰასან ჩარატი იაზდანი. აგრეთვე - რუსი ევროპის შარშანდელი ჩემპიონი დაურენ კურუგლიევი და არც ამერიკელთა დებიუტანტი დევიდ ტეილორი უნდა იყოს ხელწამოსაკრავი მეტოქე. თუმცა ამერიკელი და ირანელი პირველ წრეშივე ხვდებიან ერთმანეთს ანუ `პოლიტიკური ჭიდაობა~ გველოდება, ამინაშვილი კი მათ შორის მოგებულს ნახევარფინალამდე არ ხვდება. აი რუსთან მისი გზა კი მეოთხედფინალში იკვეთება.

დაბოლოს, ჩვენი გუნდის ერთ-ერთი გამოკვეთილი ლიდერი, ევროპისა და მსოფლიოს ჩემპიონი, ოლიმპიური პრიზიორი გენო პეტრიაშვილი (125), ვინც განთესილია და პირველ წრეში ისვენებს, თუმცა კი მასაც უძნელესი ბადე ერგო: უპრინციპულესი მეტოქე, თურქი ოლიმპიური, მსოფლიოს ორგზის და ევროპის ხუთგზის ჩემპიონი ტაჰა აკგული, უკრაინელი ალექსანდრ ხოციანოვსკი, აზერბაიჯანელთა მსოფლიოს ფინალისტი ჯამალედდინ მაგომედოვი, ირანელი პარვიზ ხოდავირდი ჰადი ბასმანჯი, რუსი ანზორ ხიზრიევი, ბელარუსი იბრაჰიმ საიდოვი, გერმანელი ნიკ მატუჰინი, უნგრელი დანიელ ლიგეტი - ყველანი მის მხარეს არიან, ამ დროს კიი ბადის ზედა მხარეს ამერიკელ მსოფლიოს პრიზიორ ნიკ გვიაზდოვსკის არავინ ჰყავს ტოლ-სწორი კონკურენტი.

ამათგან იქნებ ყველა არაა ტიტულებით დახუნძლული, მაგრამ ძლიერი და ანგარიშგასაწევი მეტოქეები კი ნამდვილად არიან. ოღონდ ჩვენებურთან შეხვედრამდე თურქი, ბელარუსი, ირანელი, გერმანელი, აზერბაიჯანელი და უკრაინელი ჯერ ერთმანეთში გაარკვევენ უძლიერესს, პეტრიაშვილს კი მანამდე უშუალო პაექრობა უნგრელთან და რუსთან მოუწევს. თანაც, გენოსთან მისვლამდე ჯერ მათი გზები ერთმანეთში იკვეთება, თუმცა რომც არ გადაიკვეთოს, გორელი ათლეტი მათთან გამოკვეთილი ფავორიტია. ოღონდ ეგაა, თვითონაც რამდენადაა ფორმაში.

ბუდაპეშტში ხვალ წინასწარი შეხვედრები ჩატარდება ნახევარფინალების ჩათვლით და გამოვლინდებიან ფინალისტები, დამამშვიდებელი წრის შეხვედრები და ფინალური ბლოკი ამ ოთხ წონაში კი 21 ოქტომბერს გაიმართება.

1332
მკითხველის კომენტარები / 0 /
მსგავსი ამბები
რუბრიკის სხვა სიახლეები
;