თავისუფალი ჭიდაობა. ევროპის ჩემპიონატი: დღე მედლების და დღე სინანულისა

თავისუფალი სტილით მოჭიდავეთა ევროპის ჩემპიონატის ბოლო დღეს, ანუ გუშინ, ჩვენმა ნაკრებმა 4 მედალი მოიპოვა - 2 ვერცხლი და ამდენივე ბრინჯაო, თუმცა გუშინდელმა დღემ სიხარულზე უფრო მეტად სინანული მოგვიტანა...

ვერ გეტყვით, რომელი უფრო ძნელი აღსაქმელია - ბექა ლომთაძის (61) განიავებული 8-ქულიანი უპირატესობა თუ გენო პეტრიაშვილის (125) მიერ წაგებული ზედიზედ მეორე ევროფინალი, თანაც - ისევ თურქ ტაჰა აკგულთან... პეტრიაშვილი იმ დონის ფიგურაა, მისი ნებისმიერი მარცხი, ტურნირის რანგის მიუხედავად, ქომაგისთვის მძიმე დარტყმაა, მაგრამ ამჯერად უფრო გულდასაწყვეტი, ალბათ, მაინც უფრო ლომთაძის წაგებაა: ვიყოთ გულახდილები და პეტრიაშვილს ჭიდაობით აჯობა თურქმა, ლომთაძე კი 8:0 იგებდა და წმინდა მოგებამდე ორადორი ქულა აშორებდა. შეიძლება ითქვას, გამარჯვება განაღდებული ჰქონდა...

ერთი სიტყვით გუშინ ვერცხლის მედალოსნები ლომთაძე და პეტრიაშვილი გახდნენ, ბრინჯაოს მედალს კი ავთანდილ კენჭაძე (74) და ირაკლი მწითური (92) დაეუფლნენ.

ამდენად, ჩვენმა ნაკრებმა ბუქარესტში, კონტინენტის პირველობაზე გამოსვლა 6 მედლით, თუმცა ოქროს მედლის გარეშე დაასრულა. არადა, ამის რა რეალური შანსი გვქონდა! ახლა კი ჩვენი ნაკრების ანგარიშზე 2 ვერცხლი და 4 ბრინჯაოა. შეგახსენებთ, რომ გუშინწინ მესამე ადგილზე ნიკა კენჭაძე (79) და ელიზბარ ოდიკაძე (97) გავიდნენ. გუნდურ ჩათვლაში ჩვენი ნაკრები 104 ქულით მეოთხეა რუსეთის (162), თურქეთისა (156) და აზერბაიჯანის (145) შემდეგ.

ლომთაძის სასწაული მარცხი

ლომთაძემ ფინალამდე ორი შეხვედრა ჩაატარა და ორივე დამაჯერებლად, წმინდად მოიგო ერთნაირი ანგარიშით - 10:0 ფინალამდე მას ქულა არ დაუკარგავს, იქ კი ერთბაშად 17 დაკარგა და 11:17 დამარცხდა.

არადა, დასაწყისში ამას ვერავინ წარმოიდგენდა. უკვე მე-15 წამზე სომეხი არსენ ჰარუთინიანი ფეხში შევიდა, კიდეც აიყვანა და გადაგდებას ცდილობდა, მაგრამ ზერეაქტიული რეაქციის მქონე ლომთაძემ მშვენივრად ამოუსვა ფეხი და 4-ქულიანზე გადააგდო. მალე თვითონ აუღო ფეხი და დაბლა ჩააგდო, თუმცა იქ ვერ დაატრიალა და მხოლოდ ორ ქულას დასჯერდა: 6:0.

მალევე განმეორდა იგივე ეპიზოდი - ფეხიდან აყვანით კვლავ დაბლა ჩააგდო, მაგრამ ვერც იმ მომენტში დაატრიალა, თორემ წმინდა მოგებას გაინაღდებდა და არც სომეხს დააცლიდა გონს მოსვლას, ახლა კი ანგარიში 8:0 დარჩა და პაექრობაც გაგრძელდა. ეს ყველაფერი ქუთაისელმა ათლეტმა 1.10 წუთში მოასწრო, მაგრამ მერე ინიციატივა ნელ-ნელა დათმო, სომეხმა კი ტემპს უმატა და ნელ-ნელა დაიწყო ანგარიშის შემცირება. შესვენებაზე ლომთაძე მხოლოდ ერთქულიანი უპირატესობით წავიდა: 9:8.

შესვენების შემდეგ მან კვლავ აქტიურად შეუტია და დაბლა ჩაყვანით ისევ ორი ქულა მოიპოვა: 11:8, მაგრამ სწორედ ამას მოჰყვა ერთი საკამათო ეპიზოდი: სომეხმა ისევ აუღო ცალი ფეხი, მაგრამ ლომთაძემ კონტრშეტევაზე გაუგრძელა ეპიზოდი და თავს უკან გადაისროლა, რაც ნამდვილად 4-ქულიანი გდება იყო, მაგრამ შეფასება რატომღაც ჰარუთინიანს მისცეს... არადა, ლომთაძე აკონტროლებდა სიტუაციას, როცა წელში შეეკრა და გდებაზეც მან წაიღო, თუმცა მსაჯებმა რატომღაც სხვაგვარად განსაჯეს. ამან მორალურად გატეხა ჩვენი ათლეტი, ვისაც დაღლაც დაეტყო და საბოლოოდ 11:17 დამარცხდა. თუმცა ვფირობთ, ფსიქოლოგიურზე მეტად ამ წაგებაში ლომის წილი ფიზიკურმა მოუმზადებლობამ ითამაშა, თორემ შეხვედრის შემოტრიალება კიდევ შეიძლებოდა.

ძალიან დასანანია, რომ ასეთი რეალური შანსის შემდეგაც კი ლომთაძისთვის ევროპის ჩემპიონის ტიტული კვლავაც მიუღწეველი დარჩა. არადა, ეს მისთვის მესამე ევროფინალი იყო (ევროპულ თამაშებსაც თუ ჩავთვლით), ზედიზედ მეორე, სულ კი 4-ჯერ გამოვიდა კონტინენტის პირველობაზე (ასევე ევროპული თამაშების ჩათვლით) და მესამე მედალი მოიპოვა, ყველა ვერცხლისა! ვგონებთ, გამარჯვების ყველაზე რეალური შანსი მას ახლა ჰქონდა, ოღონდ მეტოქეც ძლიერი ჰყავდა: ჰარუთინიანი ახალგაზრდებში ევროპის შარშანდელი ჩემპიონი და მსოფლიოს მესამე პრიზიორია, მაგრამ როგორ იჭიდავა, კი ვნახეთ. ბუქარესტში მან სხვა შეხვედრებიც კარგად ჩაატარა და მოუგო რუსი მადგომედრასულ იდრისოვის მომგებ თურქ რეჯეპ ტოპალს, ვინც საბოლოოდ მესამეზე გავიდა.

61 კგ.
1. არსენ ჰარუთინიანი (სომხეთი); 2. ბექა ლომთაძე (საქართველო); 3. რეჯეპ ტოპალი (თურქეთი), რანდუ ადრიან ვოკი (შვეიცარია).

ისევ ტაჰა და შეუმდგარი რევანში

მძიმე წონაში ევროპის შარშანდელი პირველობის ფინალი განმეორდა - ტაჰა აკგული VS გენო პეტრიაშვილი. სამწუხაროდ, იმავე შედეგითაც დამთავრდა. რამდენადაც ჩემთვის ცნობილია, პეტრიაშვილს ნეკნი სტკიოდა, ხოლო მუხლი რომ გადახვეული ჰქონდა და რამდენჯერმე შეაწუხა, რეპორტაჟშიც ჩანდა. თუმცა თურქსაც მარჯვენა ხელის თითები ჰქონდა ერთმანეთზე გადახვეული, მაგრამ, რაც ყველაზე უფრო ცუდად გვენიშნა - მან არც ამჯერად მისცა შანსი ჩვენებურს.

სამწუხაროდ, პეტრიაშვილი ისევ იმავე სტილში ეჭიდავა მას - მხოლოდ ფეხში შესვლები, რასაც თურქი ახლაც მუდამ მომზადებული შეხვდა და ის ამაზე იყო ნამუშევარი: როგორმე არ შეეშვა ფეხში ჩვენებური.

საინტერესოა, რა ვისწავლეთ შარშანდელი წაგებული ფინალის შემდეგ? გვყავს კი აჯგული სათანადოდ შესწავლილი? ფაქტია, რომ რაღაც სხვაცაა მოსაფიქრებელი და მერე ლეიბზე გასაკეთებელი, თორემ ევროპის ჩემპიონატზე არასოდეს გვეყოლება ირანელი ფალავანი, ტაჰა რომ ჩამოგვაშოროს, როგორც ეს მსოფლიოს ჩემპიონატზე მოხდა. თურქმა სისწრაფეშიც დაჯაბნა ჩვენებური და თითქოს უფრო ათლეტურიცაა. პირველი ქულა მან სწორედ სისწრაფის ხარჯზე მოიპოვა, როცა თავის ჩამოქაჩვის შემდეგ ჯაჯგურში დაასწრო ფეხში შესვლა, ხოლო ჩოქბჯენში გადაყვანილი დაატრიალა კიდეც. საბოლოოდ მან 7:0 მოიგო და მეშვიდედ გახდა ევროპის ჩემპიონი, თუმცა უხეში ჭიდაობითაც გამოიჩინა თავი და ერთ მომენტში აშკარად ჩაარტყა ქართველს, რისთვისაც პეტრიაშვილიც გაექაჩა, მაგრამ მსაჯის ჩარევამ ჩხუბი აღკვეთა.

125 კგ.
1. ტაჰა აკგული (თურქეთი); 2. გენო პეტრიაშვილი (საქართველო); ალექსანდრ ხოციანოვსკი (უკრაინა), ანზორ ხიზრიევი (რუსეთი).

ბრინჯაოს ბიჭები

ბრინჯაოს მედლის მომპოვებელ ბიჭებზე მადლობის მეტი არაფერი გვეთქმის. ორივესთვის ეს პირველი ევროპული მედალია, თუმცა კენჭაძე მსოფლიოს შარშანდელი ფინალისტია. შეგახსენებთ, რომ მისი ძმაა ნიკა კენჭაძე - ევროპის კიდევ ერთი ბრინჯაოს პრიზიორი, ეს კი ძმების პირველი ერთობლივი წარმატებაა ეროვნულ ნაკრებში. მათ შარშან ისტორიული შედეგი მოიპოვეს - 23-წლიანებში გახდნენ მსოფლიოს ჩემპიონები, რაც ჩვენი ჭიდაობისთვის პირველი შემთხვევა იყო, როცა ძმები რაგინდარა ასაკში ერთად გახდნენ მსოფლიოს ჩემპიონები, მაგრამ ის მაინმც ასაკობრივი ნაკრები იყო, ეს კი ეროვნული გუნდია ანუ მათმა ოჯახურმა დინასტიამ უკვე ქვეყნის მთავარ გუნდშიც გადმოინაცვლა.

ავთო კენჭაძემ გუშინ ორი შეხვედრა ჩაატარა და მოლოდინისამებრ, ორივე დამაჯერებლად მოიგო - დამამშვიდებელში ესტონელ აიმარ ანდრუსეს 12:3 აჯობა, ბრინჯაოსთვის პაექრობაში კი უკრაინელი ვასილ მიხაილოვი 12:1 დაჯაბნა.

მწითურმა შარშანაც იჭიდავა ევროპირველობაზე ბრინჯაოსთვის, თუმცა დრამატულ პაექრობაში დამარცხდა, ახლა კი 3:3-ზე, ბოლო ორქულიანის დამსახურებით მოუგო რუსთა დაღესტანელ მაგომედ ყურბანოვს. არადა, მეტოქე 3:0 იგებდა, მაგრამ მწითურმა ჯერ წრიდან გაყვანისთვის აუღო ქულა, მერე კი ორქულიანზეც გადააგდო.

გუშინვე დაიწყო ქალთა ტურნირიც და იასპარეზა ჩვენმა ერთადერთმა წარმომადგენელმა თეონა ჯანდაგაშვილმა (59), ვისაც გუშინ დაბადების დღე ჰქონდა. სამწუხაროდ, ეს დღე საკუთარ თავს გამარჯვებით ვერ მიულოცა - პირველივე შეხვედრა 0:10 წააგო უნგრელ რამონა გალამბოსთან.

74 კგ.
1. ფრანკ მარკეზ ჩამიზო (იტალია); 2. ზელიმხან ხაჯიევი (საფრანგეთი); 3. ავთანდილ კენჭაძე (საქართველო), ტიმურ ბიჟოევი (რუსეთი).

86 კგ.
1. ვლადისლავ ვალიევი (რუსეთი); 2. პიოტრ იანულოვი (მოლდოვა); 3. ალი შაბანაუ (ბელარუსი), ფატიჰ ერდინი (თურქეთი).

92 კგ.
1. შარიფ შარიფოვი (აზერბაიჯანი); 2. ზბიგნევ ბარანვსკი (პოლონეთი); 3. ირაკლი მწითური (საქართველო), იშტვან ვერები (უნგრეთი).

ყოველდღიური სპორტული გაზეთი "ლელო"
685
მკითხველის კომენტარები / 0 /
მსგავსი ამბები
რუბრიკის სხვა სიახლეები
;