თავისუფალი ჭიდაობა. ევროპის ჩემპიონატი: ხინჩეგაშვილის მესამე სიმაღლე

დღეს, 4 აპრილს, დაღესტანში, ქალაქ კასპიისკში მიმდინარე მოჭიდავეთა ევროპის ჩემპიონატში თავისუფალი სტილით მოჭიდავეები ჩაებმებიან და ხუთი წონის ფალავნები იჭიდავებენ. მათ შორის ჩვენი გუნდის ორი ლიდერიც იქნება - ევროპის სამგზის, მსოფლიოსა და ოლიმპიური ჩემპიონი ვლადიმერ ხინჩეგაშვილი (65) და მსოფლიოს ჩემპიონი ზურაბ იაკობიშვილიც (70) იქნებიან.

ხინჩეგაშვილი უკვე მესამე წონაში შეეცდება ტიტულის მოხვეჭას. ის საკვალიფიკაციო ეტაპზე თავისუფალია, პირველ შეხვედრას კი სომეხ ვალოდია ფრანგულიანთან გამართავს, მოგების შემთხვევაში კი მოლდოველ ანდრეი პერპელიტასა და რუსთა ევროპის მიქმედ ჩემპიონ ილიას ბეკბულატოვს შორის მოგებულს შეხვდება. არსებითად, რუსთა დარესტანელი თუ ჩამოიშორა, მერე ხინჩეგაშვილს ფინალამდე სერიოზული არავინ ხვდება.

ვნახოთ, რამდენად დაასრულა ჩვენებურმა ახალ წონასთან ადაპტაცია - ამის საუკეთესო ინდიკატორი სწორედ ბეკბულატოვი იქნება. ამჯერად ბადის მეორე მხარესაა წონიდან წონაში ხინჩეგაშვილის მდევარი აზერბაიჯანელი, მსოფლიოს ორგზის გამარჯვებული ჰაჯი ალიევი, ვისაც ჩვენებურმა ერთხელ ევროპირველობაზე მწარე ალიყური აგემა.

   ⇒ფინალი, რომელსაც ველოდით: პეტრიაშვილი VS ხინჩეგაშვილი [VIDEO]

70 კილოგრამში საკვალიფიკაციო ეტაპიდან თავისუფალი მხოლოდ იაკობიშვილია, მისი პირველი მეტოქე კი სლოვაკი თეიმურაზ სალკაზანოვისა და რუმინელი გეორგე ბუცურის პაექრობაში გამოვლინდება, ისე კი ჩვენებური საკმაოდ ძნელ ჯგუფშია, რამეთუ უკრაინელი ანდრეი კვიატკოვსკი და რუსთა დაღესტანელი მაგომედ ყურბანალიევიც ბადის მის ნახევარში მოხვდნენ.

ჩვენი გუნდის კიდევ ერთი ლიდერი, ევროპის რამდენიმეგზის მედალოსანი ელიზბარ ოდიკაძე (97) საკვალიფიკაციო ეტაპზე რუსეთიდან გადასულ მოლდოველ გეორგი რუბაევს შეხვდება, ამათში მოგებულს კი იტალიელ აბრაჰამ დე ხესუს კონიედო რუანოსა და რუსთა ოს ევროპის მედალოსან ვლადისლავ ბაიცაევს შორის უმჯობესთან მოუწევს გაპაექრება. ამავე ჯგუფშია უკრაინელთა ქართველი მურაზ მჭედლიძე და თურქი რიზა ილდირიმიც.

ევროპის ბრინჯაოს მედალოსანი ჯუმბერ ყველაშვილი (79) საკვალიფიკაციოში საკმაოდ ძლიერ ბელარუს ალი შაბანაუს ხვდება, ამათში მოგებულს კი ძირითად ბადეში უნგრელი მიჰალი ნაგი ელოდება. რომ არა შაბანაუ, ჩვენებურს ცუდი ბადე არა აქვს, ვინაიდან წონის ყველა სხვა ლიდერი მეორე მხარესაა.

დაბოლოს, დებიუტანტი ოთარ გოგავა (57), ვინც საკვალიფიკაციოში ფრანგთა ევროპის მედალოსან ზოჰაირ ელ ოუარას შეხვდება. წარმატების შემთხვევაში ჩვენებურს სერბ სტევან ანდრია მისიჩსა და რუს ზაურ უგუევს შორის გამარჯვებული შეხვედება. ბადის ამავე ნახევარშია ლევან მეტრეველიც ესპანეთიდან.

ყოველდღიური სპორტული გაზეთი "ლელო"
947
მკითხველის კომენტარები / 0 /
მსგავსი ამბები
რუბრიკის სხვა სიახლეები