თავისუფალი ჭიდაობა. ერთი ოქროსთვის, სამი ბრინჯაოსთვის

მაკედონიის დედაქალაქ სკოპიეში დღეს დაიწყო თავისუფალი სტილით მოჭიდავე ჭაბუკთა ევროპის ჩემპიონატი, რომელშიც წარმატებით ჩაება საქართველოს ნაკრები. დღეს გია კვინიკაძის 5 შეგირდი შეუდგა მედლისკენ მიმავალ გზას, იმათგან კი ხვალ, ფინალურ ბლოკში ერთი ოქროს, სამი კი ბრინჯაოს მედლისთვის იბრძოლებს.

ფინალში ქუთაისელი ბაგრატ გაგნიძე (71) გავიდა, ვინც ჯერ ლატვიელი ოსმანს ძასეზევსი დაამარცხა წმინდად - 10:0, ბელარუს ვიტალი იჰმატოვიჩს 7:0 მოუგო, ხოლო ნახევარფინალში ყოველმხრივ დაჩაგრა თურქი მუჰამედ ჯავუსი: 9:1. აღსანიშნავია, რომ მას კონტრილეთით ორჯერ დაუხურა გდება და იქით აართვა ქულები. ხვალ ფინალში მისი მეტოქე რუსი რამაზან აბუზაგიდოვი იქნება.

ბრინჯაოსთვის იჭიდავებენ ევროპის შარშანდელი ჩემპიონი გიორგი ჭოლაძე (51), ევროპის შარშანდელი მესამე პრიზიორი ვლადიმერ გამყრელიძე (60) და ნიკა ბერულავა (92). გამყრელიძის გარდა, ჩვენები დამამშვიდებელ წრეში პირველი ეტაპიდან ჩაებმებიან, სადაც მათი მეტოქეები იქნებიან, შესაბამისად, მაკედონიელი იდრიზ იდარი და ესპანელი ხუან ხოსე დაზა გერერო.

რაც შეეხება გამყრელიძეს, ის მეორე წრიდან ჩაებმება მედლისთვის ბრძოლაში, მისი მეტოქე კი პოლონელი იაკუბ დვორნიკიევიჩისა და უკრაინელი მიკიტა ჰონჩაროვის შეხვედრაში გაირკვევა.

ხვალ ასპარეზობაში ჩვენი ნაკრების მორიგი ხუთეული ჩაებმება: გიორგი გეგელაშვილი (48), დავით აბდალაძე (55), ლუკა მარიამიძე (65), გიორგი ნებუნიშვილი (80) და სოლომონ მანაშვილი (100).

1153
მკითხველის კომენტარები / 0 /
მსგავსი ამბები
რუბრიკის სხვა სიახლეები
;