თავისუფალი ჭიდაობა. ვეტერანები: ორი მსოფლიოს ჩემპიონი

მაკედონიის დედაქალაქ სკოპიეში დამთავრდა მსოფლიოს ჩემპიონატი თავისუფალ სტილში მოჭიდავე ვეტერანთა შორის, სადაც საქართველოს ნაკრებმა 3 მედალი მოიპოვა - 2 ოქრო და 1 - ვერცხლი.

მსოფლიოს ჩემპიონები ამირან ციკვაძე (70) და ლუკა კურტანიძე (130) გახდნენ, ვერცხლი კი იოსებ ხუციშვილმა (88) მოიპოვა. აღსანიშნავია, რომ მაკედონიაში საქართველო მხოლოდ ამ სამი ფალავანით იყო წარმოდგენილი და სამივემ ფინალში იჭიდავა.

რატომღაც კურტანიძე შეჯიბრების ოქმში ძველი გვარ-სახელით - ელდარ კურტანიძედ ჰყავდათ შეყვანილი. ოლიმპიურ ჭიდაობაში მსოფლიოს ორგზის ჩემპიონი კურტანიძე (ამასთან, ის ევროპის ხუთგზის გამარჯვებული და ორგზის ოლიმპიური ბრინჯაოს მედალოსანია) ვეტერანებში ზედიზედ მეორედ გახდა მსოფლიოს ჩემპიონი.

ის მესამე ასაკობრივ ჯგუფში გამოდიოდა - 45-49-წლიანთა შორის, სადაც ჯერ ჯგუფურ ეტაპზე იმარჯვა და ზედიზედ დაამარცხა ყაზახი კუანიშ მირზა, რუმინელი სიამაკ ზოლფაგარი და იური ჰენდრიკ რაიჩელი სამხრეთ აფრიკის რესპუბლიკიდან. ჩვენებური ქვეჯგუფში პირველ ადგილზე გავიდა, რითაც ნახევარფინალის საგზური მოიპოვა.

აქედან მოყოლებული, მან ორივე პაექრობა ბულგარელებთან გამართა და დამაჯერებლად იმარჯვა: ჯერ მარკო დინევ მარკოვი დაამარცხა სუფთად, 10:0, ფინალში კი 5:0 აჯობა ნიკოლაი დიმიტროვ კაშინოვს.

ციკვაძე პირველ ასაკობრივ ჯგუფში - 39-წლამდელთა შორის გამოდიოდა და პირველ წრეში მაკედონიელი ილე გეორგიევი 8:4 დაამარცხა. ჩვენებურს ნახევარფინალში ვერც ამერიკელმა ჯორდინ ჰუმპრეიმ გაუწია ჯეროვანი წინააღმდეგობა - 4:1 ქართველის სასარგებლოდ, ფინალში კი ციკვაძემ 7:3 აჯობა იაპონელ კოჯი ფურუსატოს.

ხუციშვილიც ამავე ასაკში გამოდიოდა და ფინალამდე დაუბრკოლებლად მივიდა. მან საკვალიფიკაციო ეტაპზე 7:1 აჯობა მონღოლ სოდნომპი ბაატარს, მეოთხედფინალში კი წმინდად, 10:0 დაამარცხა ინდოელი სინგჰ გურლალი. ჩვენებურმა ნახევარფინალშიც აღმავლობით იჭიდავა გერმანელ სებასტიან ეცკლებესთან - 7:0, ფინალური პაექრობა კი ახლო წარსულის ცნობილ უნგრელ ათლეტ გაBბორ ჰატოშთან დათმო - 1:4.

ბერძნულ-რომაულ ჭიდაობაში ვეტერანთა შორის მსოფლიოს ჩემპიონატს 5-7 ოქტომბერს რუსეთის ქალაქი პერმი უმასპინძლებს.

ყოველდღიური სპორტული გაზეთი "ლელო"
642
მკითხველის კომენტარები / 0 /
მსგავსი ამბები
რუბრიკის სხვა სიახლეები