თავისუფალი ჭიდაობა. კვარცხლბეკი შეივსო

დასრულდა საქართველოს ჩემპიონატი თავისუფალ ჭიდაობაში და კვარცხლბეკი საბოლოოდ შეივსო. ფრენბურთის არენაში 5 წონიდან 2-ის ფინალში, დღევანდელი წონებიდან ყველაზე მჩატესა და ყველაზე მძიმეში უბრძოლველად გაირკვნენ გამარჯვებულები.

61-ში არ შედგა ძმათა ქუთაისური ფინალი, რადგან არ იჭიდავა ევროპის ფინალისტმა ბექა ლომთაძემ, ჩემპიონი კი უფროსი ძმა - ლაშა ლომთაძე გახდა. მძიმეში გორელმა ომარ გუსოშვილმა იუარა ჭიდაობა და უბრძოლველად დაუთმო გამარჯვება ონელ გიორგი მეშვილდიშვილს.

61 კგ.
1. ლაშა ლომთაძე; 2. ბექა ლომთაძე (ორივე - ქუთაისი); ამირან ვახტანგიშვილი (გორი), ლევან მურცხვალაძე (თბილისი).

70 კგ.
1. ზურაბ იაკობიშვილი (ყვარელი); 2. ლევან ქელეხსაშვილი (ხაშური); 3. კონსტანტინე ხაბალაშვილი (გორი), რამაზან მალაკოევი (ყვარელი, ომც).

79 კგ.
1. იაკობ მაქარაშვილი (თბილისი); ჯუმბერ ყველაშვილი (გორი); 3. ტარიელ გაფრინდაშვილი (თბილისი), თორნიკე კვინიკაძე (ხაშური).

92 კგ.
1. ირაკლი მწითური (თბილისი); 2. ნოდარ ეგაძე (გორი); გოჩა ლომთათიძე (თბილისი), საბა ჩიხრაძე (ონი).

125 კგ.
1. გიორგი მეშვილდიშვილი (ონი, ომც); 2. ომარ გუსოშვილი (გორი); 3. თედო ებანოიძე (ხარაგაული), ლაშა ჯელაძე (ონი, ომც).

გიორგი იანტბელიძე (საქართველოს ნაკრების მთავარი მწვრთნელი):

"შეჯიბრებამ კარგად, მაღალორგანიზებულ დონეზე ჩაიარა. შედეგებიც ისე წარიმართა, როგორც მწვრთნელები ველოდებოდით. ჩემპიონებში ახალი არავინაა, ყველა წონაში იმათ გაიმარჯვეს, ვისგანაც ეს მოსალოდნელი იყო და ვისაც კარგად ვიცნობთ, თუმცა სასიხარულოა, რომ ბრინჯაოს მედალოსნებში გამოჩნდნენ ახალგაზრდები, რომლებიც მომავალში კიდევ მოუმატებენ და შეძლებენ საკუთარი შედეგების გაუმჯობესებას.

ახალგაზრდებიდან დავასახელებ თეიმურაზ ვანიშვილს, ვისაც ცოტა დააკლდა ჩემპიონობამდე; თორნიკე კვინიკაძეს, ედემი ბოლქვაძეს. გივი მაჭარაშვილიც ახალგაზრდაა, მაგრამ მისგან მეტს მოველოდით. კიდევ არიან სხვებიც, რომლებმაც თავი კარგად დაგვამახსოვრეს.

ამით გაირკვა საქართველოს ნაკრების გაფართოებული შემადგენლობა, რომელიც საერთაშორისო შეჯიბრებებში მიიღებს მონაწილეობას. თუმცა კიდევ ვიმეორებ, რომ ჩემპიონობა ევროპისა და მსოფლიოს პირველობებში მონაწილეობას არ ნიშნავს.

ჩემპიონმა მოსამზადებელ ციკლშიც უნდა შეინარჩუნოს თავისი ადგილი, მის უკან მდგომმა მეორე და მესამე ნომერმა კი ათმაგად უნდა ივარჯიშოს, რათა მას აჯობოს. შანსი ყველას მიეცემა, სეზონის მთავარ შეჯიბრებებზე კი უძლიერესმა უნდა იჭიდაოს.

363
მკითხველის კომენტარები / 0 /
მსგავსი ამბები
რუბრიკის სხვა სიახლეები