თავისუფალი ჭიდაობა. მოსკოვის ტურნირი: მოსკოვში ალმასის საძიებლად

საქართველოს თავისუფალი სტილით მოჭიდავეთა ნაკრების მთავარმა მწვრთნელმა გიორგი იანტბელიძემ დაასახელა ის შემადგენლობა, რომელიც 9-13 ნოემბერს მოსკოვში "ალროსას თასზე" იასპარეზებს.

მწვრთნელს იქ ძირითადად ახალგაზრდული შემადგენლობა მიჰყავს, რადგან იმ დროისთვის ეროვნული ნაკრები მოსამზადებელ შეკრებაზე იქნება ბორჯომში, სადაც ნაკრების რამდენიმე ლიდერიც იქნება. მაგალითად, იჭიდავებს ევროპისა და მსოფლიოს ბრინჯაოს მედალოსანი დავით ხუციშვილი (86), აგრეთვე - ევროპის წლევანდელ პირველობაზე ბრინჯაოსთვის ნაჭიდავები ზურაბ ერბოწონაშვილი (70), თუმცა ის ახლა ზედა წონაში გამოდის.

"ალროსა" - ესაა ციმბირული ალმასის ქარხანა, რომელიც რუსეთის ჭიდაობის ფედერაციის გენერალური სპონსორია და გულუხვადაც აფინანსებს იქაურ მოჭიდავეებს.

არაოფიციალური მონაცემებით, მისი მფლობელი სახა-იაკუტიის პრეზიდენტი, თავისუფალ ჭიდაობაში მსოფლიოს ორგზის ჩემპიონ ვიქტორ ლებედევის სიმამრი ეგორ ბორისოვია. დიდწილად, მის სახელს უკავშირდება ლებედევის წარმატებები და მისი მოხვედრა რიოს ოლიმპიადაზე.

რაკი ვლადიმერ ხინჩეგაშვილის ერთ-ერთი მთავარი კონკურენტი ლებედევი ვახსენეთ, ბარემ აქვე გეტყვით, რომ მან უკვე დაამთავრა სპორტული კარიერა და მშობლიურ იაკუტსკში სათევზაო და სანადირო მაღაზია გახსნა.

რაც შეეხება ნოემბერში ნაკრების მოსამზადებელ გეგმას, 6-20 ნოემბერს ნაკრები ბორჯომში გაივლის შეკრებას. იმ დროისთვის სხვადასხვა ქვეყნის კლუბებში მიმოფანტული ნაკრების ლიდერებიც უკვე თბილისში იქნებიან და მთავარ გუნდსაც შეუერთდებიან. მოსკოვური შეჯიბრების შემდეგ ნაკრები კიდევ ერთ ტურნირში გამოვა - ვლადიკავკაზში.

ჩვენები საქართველოს ჩემპიონატისთვის ემზადებიან, რომელიც დეკემბრის ბოლოს თბილისში ჩატარდება. ამით ევროპის ჩემპიონატზე წამსვლელი შემადგენლობაც გაირკვევა.

საქართველოს ნაკრები
57 კგ. ოთარ გოგავა (ხონი, ომც)
61 კგ. თეიმურაზ ვანიშვილი (გორი)
65 კგ. ედემი ბოლქვაძე (სამტრედია)
70 კგ. ლევან ქელეხსაშვილი (ხაშური, ომც)
74 კგ. ზურაბ ერბოწონაშვილი (საგარეჯო, ომც), ტარზან მაისურაძე (ყაზბეგი)
86 კგ. დავით ხუციშვილი (საგარეჯო)
125 კგ. გიორგი მეშვილდიშვილი (ონი, ომც)

ყოველდღიური სპორტული გაზეთი "ლელო"
1789
მკითხველის კომენტარები / 0 /
მსგავსი ამბები
რუბრიკის სხვა სიახლეები