თავისუფალი ჭიდაობა. მსოფლიო ჩემპიონატი. ბრინჯაო: მიუწვდომელიც და მისაწვდომიც

ბუდაპეშტში მიმდინარე თავისუფალი სტილით მოჭიდავეთა მსოფლიოს ჩემპიონატზე გუშინ მარცხიანი დღე გვქონდა - მართალია, ორი ჩვენებური ბრინჯაოს მედლისთვის აგრძელებს ბრძოლას, მაგრამ ფაქტია, რომ გუშინ ბოლომდე წაუგებლად ვერც ისინი მივიდნენ, ფინალურ ბლოკში კი დამამშვიდებლის ფინალში გამართული ორივე პაექრობა დავთმეთ.

მაშ ასე, დღეს საღამოს ფინალურ ბლოკში ზურაბ იაკობიშვილი (70) და ელიზბარ ოდიკაძე (97) იჭიდავებენ - ისინი ნახევარფინალში დამარცხდნენ და ახლა პირდაპირ დამამშვიდებლის ფინალში არიან, სადაც ბრინჯაოსთვის მოუწევთ პაექრობა, ხოლო დავით ხუციშვილმა (79) და დავით მარსაგიშვილმა (92) გუშინ უკვე წააგეს ბრინჯაოსთვის გამართული ორთაბრძოლები.

თანაც, ორივე წმინდად დამარცხდა. ევროპისა და მსოფლიოს პრიზიორმა ხუციშვილმა ლამის ყველა მცდელობაზე შეუშვა ფეხში რუსთა დებიუტანტი ახმედ გაზიმაგედოვი და პირველივე პერიოდში 0:10 დათმო.

ევროპის ორგზის ჩემპიონმა, ოლიმპიურმა და მსოფლიოს მედალოსანმა მარსაგიშვიმა ირანელთა მსოფლიოს პრიზიორ ალირეზა მოჰამედ კარიმიმაჩიანისთან 1:12 წააგო. პირველივე წამებზე მან მეტოქე გარეთ გაიყვანა და 1:0 დაწინაურდა, მერე კი ინიციატივა პირწმინდად დათმო.

პირველ პერიოდში მხოლოდ ერთხელ შეუშვა ფეხში მეტოქე და შესვენებაზე 1:2 სხვაობით გავიდა, მაგრამ მეორეში ირანელის პირველივე ანალოგიური შესვლის შემდეგ მორალურად გატყდა.

იაკობიშვილი და ოდიკაძე გუშინ ნახევარფინალში გავიდნენ, იქ კი ორივე რუსებთან დამარცხდა.

იაკობიშვილმა ამ სეზონში უკვე მესამედ დაამარცხა სლოვაკი თეიმურაზ სალკაზანოვი - 2:1. გაცილებით უფრო იოლად გაუსწორდა უფრო ძლიერ მეტოქეს, უზბეკ მსოფლიოს ვიცე-ჩემპიონს, ოლიმპიადისა და აზიური თამაშების მესამე პრიზიორ იხტიორ ნავრუზოვს - 5:1, ნახევარფინალი კი რუსთა დაღესტანელ დებიუტანტ მაგომედრასულ გაზიმაგომედოვთან დათმო: 1:3. ბრინჯაოსთვის შეხვედრაში მისი მეტოქე ჯერ არაა ცნობილი.

მასთან შეხვედრის უფლების მოსაპოვებლად ჯერ ერთმანეთში თურქი ევროპის ფინალისტი მუსტაფა კაია და კანადელი ჰაისლან გარსია იჭიდავებენ, იმათში მოგებული მერე მონღოლ ბიამბადორჯ ბატ ერდენეს გაეჯიბრება და აი, იმ პაექრობაში უძლიერესი დაეჭიდება ჩვენებურს.

ნახევარფინალამდე ოდიკაძეც ლოგიკურად მივიდა, თუმცა ერთი ტიტულოვანი მეტოქე მანაც ჩამოიშორა - აზერბაიჯანელი მსოფლიოს მესამე პრიზიორი ასლანბეკ ალბოროვი, ვისაც მეოთხედფინალში 4:3 მოუგო, მანამდე კი ვენესუელელი ხოსე დანიელ დიას რობერტი წმინდად, 10:0 დაამარცხა.

ნახევარფინალში მან, შეიძლება ითქვას, ლოგიკური მარცხი იწვნია მართლაც უძლიერეს რუსთა დაღესტანელ აბდულრაშიდ სადულაევთან: 0:10. ამ წონაში დღეს საღამოს ძალიან საინტერესო ფინალი, ჭიდაობის კლასიკად ქცეული შეხვედრა გველოდება სადულაევსა და მასსავით ყველაფრის მომგებ ამერიკელ კაილ სნაიდერსს შორის, ოდიკაძე კი მანამდე ბრინჯაოსთვის იჭიდავებს, თუმცა ჯერ არ ვიცით, ვისთან. ესეც დღეს საღამოს გაირკვევა ფინალურ ბლოკში, ასევე სამი პრეტენდენტის პაექრობაში: ჯერ მაკედონიელი მაგომედგაჯი ნუროვი და ყაზახი მამედ იბრაგიმოვი იჭიდავებენ, მოგებული უზბეკ მაგომედ იბრაგიმოვს შეხვდება და მათში გამარჯვებული იჭიდავებს ოდიკაძესთან.

ყოველდღიური სპორტული გაზეთი "ლელო"
1357
მკითხველის კომენტარები / 0 /
მსგავსი ამბები
რუბრიკის სხვა სიახლეები
;