თავისუფალი ჭიდაობა. მწითური, კენჭაძე... მედლები რუსედან

საქართველოს ნაკრებმა ბულგაულ რუსეში მიმდინარე "დან კოლოვისა და ნიკოლა პეტროვის" სახელობის "დიდ პრიზზე" დღეს, პირველ ფინალურ დღეს 2 მედალი მოიპოვა - ვერცხლი და ბრინჯაო. სარეიტინგო ტურნირის ვიცე-ჩემპიონი ირაკლი მწითური გახდა (92), ხოლო მესამეზე ნიკოლოზ კენჭაძე (79) გავიდა.

არადა, მწითური ოქროსთანაც ძალიან ახლოს იყო, რადგან ფინაკური შერკინება აქტიურად დაიწყო რუს მაგომედ ყურბანოვთან და ერთი ხანობა ანგარიში 3:1 მიჰყავდა, მაგრამ საბოლოოდ 9:5 დამარცხდა.

კენჭაძემ დამამშვიდებლის ფინალში ყოველმხრივ დაჩაგრა თურქი მუჰამედ ნური კოტანოღლუ - 5:0.

დღესვე ასპარეზობაში ჩაებნენ კიდევ სამი წონის წარმომადგენლები, ჩვენგან ბულგარულ ხალიჩაზე 3 კაცი გავიდა ორ წონაში (74-ში მონაწილე არ გვყავს), ერთმა მათგანმა - ბექა ბუჯიაშვილმა (57) კი ფინალსაც უწია და ხვალ საღამოს ოქროს მედლისთვის თურქ სულეიმან ატლის დაეჭიდება.

ბუჯიაშვილმა მერვედფინალში, მოლოდინისამებრ, დიდი ანგარიშით - 13:2 დაამარცხა ალჟირელი აბდელაკ ხერბაჩე, მერე დაძაბულ ბრძოლაში უკრაინელი არმენ არაქელიანი 13:10 დაჯაბნა, ნახევარფინალში კი ასევე წმინდა გამარჯვებით, 12:2 ფრანგთა ევროპის პრიზიორი ზოჰაირ ელ ოუარაქე ჩამოიცილა საფინალო გზიდან.

ამავე წონაში გიორგი ღონიაშვილი პირველივე შეხვედრაში დამარცხდა ბელარუს ძიმჩუკ რინჩინაუსთან და მერე აღარც სანუგეშო წრეში გადასვლის საშუალება აღარ მიეცა, გიორგი რევაზიშვილმა (65) კი ერთი შეხვედრა მოიგო უკრაინელ გორ ოგანესიანთან - 6:4, მაგრამ შემდეგ უზბეკ აბოს რახმონოვთან 2:9 დამარცხდა და ისიც ნაადრევად დაემშვიდობა შეჯიბრებას.
ხვალ დილით, ფინალური ბლოკის დაწყებამდე, წინასწარი ეტაპის შეხვედრებს გამართავენ დარჩენილი წონების წარმომადგენლები.

ევროპისა და მსოფლიოს მესამე პრიზიორი სანდრო ამინაშვილი (86) საკვალიფიკაციო ეტაპიდან თავისუფალია, მეთექვსმეტედფინალში კი რუს რუსლან აბდულაევს დაეჭიდება. სამაგიეროდ, საკვალიფიკაციო ეტაპზე იჭიდავებს ზვიად მეტრეველი (97), სადაც ამერიკელ კევინ ბაზლეის გაეჯიბრება, მსოფლიოს ბოლო ორი პირველობის გამარჯვებული და ევროპის ჩემპიონი გენო პეტრიაშვილი კი (125) შეჯიბრებაში მერვედფინალიდან ჩაებმება, სადაც ეგვიპტელი ხალედ ომრ ზაკი მოჰამედ აბდალა ჰყავს დასამარცხებელი, მომდევნო მეტოქე კი უზბეკ სარდორბეკ ხოლმატოვსა და კორეელ კოუნგჯინ კიმს შორის გამარჯვებული ეყოლება.

515
მკითხველის კომენტარები / 0 /
მსგავსი ამბები
რუბრიკის სხვა სიახლეები
;