თავისუფალი ჭიდაობა. მწითური ოქროზე, კენჭაძე - ბრინჯაოზე

ბულგარულ რუსეში დღეს დაიწყო თავისუფალი სტილით მოჭიდავეთა მორიგი სარეიტინგო ტურნირი - "დან კოლოვისა და ნიკოლა პეტროვის მემორიალი", რომელშიც წარმატებული სტარტი აიღო ჩვენმა ნაკრებმა: ირაკლი მწითური (92) ფინალში გავიდა, ხოლო ნიკოლოზ კენჭაძე (79) ნახევარფინალში დამარცხდა და ხვალ ფინალურ ბლოკში პირდაპირ ბრინჯაოს მედლისთვის იასპარეზებს.

მწითურმა ფინალამდე თურქი სულეიმან კარადენიზი 6:1 დაამარცხა, ამერიკელ რაილ კენტ ლეფევერს 8:1 მოუგო, ნახევარფინალში კი გამოცდილი თურქი იბრაჰიმ ბოლუკბასი 7:4 დაჯაბნა. ფინალში მისი მეტოქე რუსი მაგომედ ყურბანოვია.

კენჭაძემ ტურნირი საფრანგეთის სახელით მოჭიდავე ზელიმხან ხაჯიევთან წმინდა მოგებით დაიწყო - 8:0, რასაც თურქ აიუბ ბარაისთან მოგება მიაყოლა - 6:1. ნახევარფინალში ის ამერიკელ ალექსანდერ დევიდ დირინგერთან დამარცხდა. კენჭაძის მეტოქე ბრინჯაოსთვის პაექრობაში ხვალ გაირკვევა - ეს თურქი მუჰამედ ნური კოტანოღლუსა და სერბი ზაურ ეფენდიევის პაექრობაში გამარჯვებული იქნება.

დღესვე ჩვენი ნაკრებიდან კიდევ ორმა წევრმა იჭიდავა. ოთარ გოგავა ამჯერად ზედა წონაში - 61-ში გამოვიდა და საკვალიფიკაციოში რუმინელ ნიკოლაი ოკლოპკოვს 4:1 კი მოუგო, მაგრამ მერე უზბეკ ჯაჰონგირმირზა ტურობოვთან 3:12 დამარცხდა და გამოვარდა. ლევან ქეელხსაშვილი (70) საკვალიფიკაციო წრიდანვე გამოვარდა - უკრაინელ ანდრეი კვიატკოვსკისთან 2:6 წააგო.

ხვალ შეჯიბრებაში 57, 65 და 74 კილოგრამების წარმომადგენლები ჩაებმებიან. ჩვენგან გიორგი ღონიაშვილი, ბექა ბუჯიაშვილი (ორივე - 57) და გიორგი რევაზიშვილი (65) იჭიდავებენ, 74-ში კი წარმომადგენელი არ გვეყოლება.

ყოველდღიური სპორტული გაზეთი "ლელო"
881
მკითხველის კომენტარები / 1 /
Roini
0
Meamakebit zmebooo
მსგავსი ამბები
რუბრიკის სხვა სიახლეები
;