თავისუფალი ჭიდაობა. ნაკრების უმედლობა კრასნოიარსკში

საქართველოს თავისუფალი სტილით მოჭიდავეთა ნაკრებმა უმედლოდ დაამთავრა გამოსვლა კრასნოიარსკში, ივან იარიგინის მემორიალში, სადაც გადახალისებული, ძირითადად ახალგაზრდებით დაკომპლექტებული გუნდით გამოდიოდა.

გიორგი იანტბელიძის შეგირდებიდან მხოლოდ ორმა იჭიდავა ბრინჯაოსთვის - ლევან ქელეხსაშვილმა (70) და ზაურ ბერაძემ (86), მაგრამ გადამწყვეტი შეხვედრები მათაც წააგეს და საბოლოოდ მეხუთეზე გავიდნენ.

კრასნოიარსკში ჩვენგან ეროვნული ნაკრების მხოლოდ ერთი წევრი, ევროპისა და მსოფლიოს ბრინჯაოს მედალოსანი, სანდრო ამინაშვილი (86) ჭიდაობდა და მწვრთნელებისთვის ყველაზე საყურადღებო მისი გამოსვლა იყო.

სამწუხაროდ, მან იმედები ვერ გაამართლა და პირველივე შეხვედრაში დამარცხდა თურქ სელიმ იაშართან, ვინც, სინამდვილეში რუსეთიდან გადასული ინგუში კოლოი კორტოევია. ამინაშვილს სანუგეშოში გადასვლის შანსიც არ მიეცა, რადგან მომდევნო წრეში იაშარმაც წააგო ამერიკელთა მომავალ ჩემპიონ დევიდ ტეილორთან.

ქელეხსაშვილმა ძირითად ბადეში დაღესტნელთა მომავალ ჩემპიონთან, მსოფლიოს შარშანწინდელ გამარჯვებულ მაგომედ კურბანალიევთან წააგო, მანამდე კი მონღოლი ბუიანცოგ ცოგტგერელი დაამარცხა. სანუგეშოში მან უზბეკ მირზო ხაიტოვს მოუგო, მაგრამ ბრინჯაოსთვის შეხვედრა წააგო ამერიკელ ფრენკ მოლინაროსთან.

ბერაძეც პირველივე წრეში დამარცხდა თურქ ფატიჰ ერდინთან, თუმცა მერე ის ფინალში გავიდა, რითაც ჩვენებურს სანუგეშო წრის კარი გაუღო. იქ ბერაძემ ყაზახი ალმას ჟუნინი კი დაამარცხა და დამამშვიდებლის ფინალშიც გავიდა, მაგრამ რუსთა მსოფლიოს შარშანდელ მესამე პრიზიორ ვლადისლავ ვალიევთან წააგო და მეხუთეზე დარჩა.

ჩვენი გუნდიდან დამამშვიდებელში კიდევ ორი ფალავანი გადავიდა - თეიმურაზ ვანიშვილი (61) და რამაზან მალაკოევი (70). ტურნირზე ორივემ ორ-ორი პაექრობა გამართა - თითო ძირითადში და თითოც - სანუგეშოში, თუმცა ორივე წააგეს.

ვანიშვილი ჯერ 23-წლიანებში დაღესტნელთა ევროპის ჩემპიონ ისმაილ მუსუკაევთან დამარცხდა, მერე - მონღოლთა მომავალ პრიზიორ ტუვშინტულგა ტუმენბილეგთან.

ყვარლელი მალაკოევი ძირითად ბადეში ბრძოლას დაღესტნელ მაგომედრასულ გაზიმაგომედოვთან მარცხით გამოეთიშა, სანუგეშოში კი უკრაინელ ანდრეი კვიატკოვსკისთან.

ერთი შეხვედრა მოიგო ედემი ბოლქვაძემაც (65) - უზბეკ სიროჟიდინ ხასანოვთან, თუმცა მერე რუსთა ციმბირელ კუულან ნაჩინთან წააგო და გავარდა. ამ წონაში მაგამედ საიდოვი პირველივე შეხვედრაში მონღოლ დამდინბაზარ ცოგბაატართან დამარცხდა.

ასევე პირველივე პაექრობა წააგეს ტარიელ გაფრინდაშვილმა (79), ნოდარ ეგაძემ (92) და გივი მაჭარაშვილმაც (97). მათ სანუგეშოში გადასვლის საშუალება არ მიეცათ.

ყოველდღიური სპორტული გაზეთი "ლელო"
1067
მკითხველის კომენტარები / 0 /
მსგავსი ამბები
რუბრიკის სხვა სიახლეები
;