თავისუფალი ჭიდაობა. ნაკრები. მათ ყველაფერი აქვთ, ჩვენ კი, ჩვენდა სამარცხვინოდ...

საქართველოს თავისუფალი სტილით მოჭიდავე ვაჟთა ნაკრები ჯერჯერობით თბილისში ემზადება ევროპის ჩემპიონატისთვის,

თუმცა სულ მალე მოსამზადებელი ეტაპის პირველ ოფიციალურ ღონისძიებაზე გაემგზავრება: თებერვლის დადგომისთანავე ბორჯომში დაიწყებენ საწვრთნელ-მოსამზადებელ შეკრებას.

ის, ტრადიციულად, ორი კვირა გაგრძელდება, 23-25 თებერვალს კი ნაკრების ძირითადი შემადგენლობა კიევში იჭიდავებს "სახელოვან უკრაინელ მწვრთნელთა და მსაჯთა მემორიალში".

იქიდან დაბრუნებული გუნდი მარტის პირველივე რიცხვებში მორიგ შეკრებას გამართავს, დიდი ალბათობით - სომხურ წახკაძორში, თუმცა ალტერნატივად ბაკურიანიც განიხილება.

წახკაძორი ჩვენი ფალავნებისთვის ლამის მეორე სამშობლოდ იქცა, რადგან ყოველწლიურად ჩადიან იქ შეკრებაზე კარგი პირობების გამო. როგორც ნაკრების მთავარმა მწვრთნელმა გიორგი იანტბელიძემ გვითხრა, წასვლა ახლაც ძალიან უნდათ, რადგან ვარჯიშის გარდა, სხვა საფიქრალი არ აქვთ, თუმცა ბოლო სტუმრობისას კვების საკითხით ვერ დარჩენილან კმაყოფილები.

ახლაც "განხეთქილების ვაშლად" კვება თუ იქცევა, თორემ სხვა შემაფერხებელი არაფერია. ახლა სომხურ მხარესთან ამ დეტალების დაზუსტებაზე მიდის მუშაობა და შეთანხმებას თუ მიაღწიეს, ხომ კარგი, თუ არადა ისევ ბაკურიანს მიაშურებენ.

ბუნებრივია, ჩვენებს ბაკურიანი ურჩევნიათ, მაგრამ სომხებს ყოველმხრივ უზრუნველყოფილი ბაზა აქვთ, ჩვენ კი, ჩვენდა სამარცხვინოდ, ერთი სრულად აღჭურვილი დარბაზი ვერ გავმართეთ ვერც ბაკურიანში და ვერც - სხვაგან.

მოჭიდავეებისგან ადრეც გამიგონია და იანტბელიძემაც დამიდასტურა, რომ წახკაძორში ერთადაა ყველაფერი - სასტუმროც, სასადილოც, ფეხბურთის მოედანიც, სავარჯიშო და ტრენაჟორების დარბაზებიც, აუზიც, საშხაპეც, საუნაც და რაც კი სჭირდება სპორტსმენს.

იქ ეს ერთიან კომპლექსშია, სადმე წასვლა და სხვა დარბაზში გადანაცვლება არც უწევთ. თან ის მხოლოდ სპორტსმენების ბაზაა და ტურისტების, დამსვენებლების ხმაური არ აწუხებთ, აბსოლუტურად მშვიდ გარემოში ემზადებიან სეზონის უმთავრესი სტარტებისთვის.

ამის საპირისპიროდ, ბაკურიანში როცა მიდიან, თბილისიდან უნდა წაიღონ ლეიბები, შტანგები და ლამის ყველაფერი, რაც ვარჯიშისთვის სჭირდებათ. თან შტანგები ან ძალოსნებს უნდა სთხოვონ, ან - ფალავანთა კლუბიდან წაიღონ, სადაც ისედაც არაა სამყოფად და თან ამით სხვებსაც აკლებენ.

ამავე დროს არც თავად ჰყოფნით ეს ინვენტარი და სპორტსმენებს შტანგებზე სავარჯიშოდ რიგში უწევთ დგომა, რაც წახკაძორში გამორიცხულია. განა, რა გახდა ბაკურიანში ასე კომპლექსური კომპლექსის აგება თუ არა (თუმცა ქვეყანას თანამედროვესა და ღირებულზე თუ რამე ამბიცია აქვს, ესეც უნდა ააშენოს),

ტრენაჟორების ერთი დარბაზის გაკეთება მაინც, სადაც მუდმივად იქნება ის ინვენტარი და გუნდებს არ მოუწევთ მათი თბილისიდან ტარება (იქამდე - მათხოვრობაც ამ შტანგებზე).

ლამის მთელი ქართული სპორტი ბაკურიანში ემზადება "ფიზიკაში" და ის დარბაზი ხომ ყველას გამოადგება. თან - ყოველ ჯერზე ხომ არ უნდა გააკეთო, ერთხელ მოაწყობ და რამდენიმე წელიწადი გექნება. რა ჭიდაობის სასახლეზე ვსაუბრობთ, როცა ერთი დარბაზი ვერ გაგვიკეთებია!

თუმცა, ავად თუ კარგად, გუნდი ამ მეორე შეკრებას სადმე მაინც ჩაატარებს, 22-25 მარტს კი სოფიაში დან კოლოვისა და ნიკოლა პეტროვის მემორიალში გამოვა და ევროპირველობისთვის მზადების სატურნირო ეტაპსაც დაასრულებს.

ეს ორი შეჯიბრება მნიშვნელოვანი იქნება საევროპო ნაკრების დასაკომპლექტებლად, თუმცა ორივეს განსხვავებული ამოცანები დაეკისრება: კიევის ტურნირი ძირითადად საკადრო-შესარჩევი იქნება, ბულგარეთისა - სასტარტო, თუმცა არაა გამორიცხული, გარკვეულ წონებში შერჩევის პროცესი იქაც გაგრძელდეს.

კიევში კონკურენტთაგან ვინც უკეთ იჭიდავებს, ის დიდწილად გაინაღდებს კიდეც ევროპირველობაზე გამოსვლას და ასეთები სოფიაში სტარტისთვის წავლენ, ხოლო კონკურენცია სადმე ისევ გადაუჭრელი თუ დარჩება, მაშინ "თეთრი და შავი სოფიაში გამოჩნდება".

ამის შემდეგ ნაკრები საშეკრებო ეტაპით გააგრძელებს მზადებას ევროპის ჩემპიონატისთვის, რომელიც 30 აპრილს დაიწყება რუსეთის სამხრეთში, დაღესტანის ქალაქ კასპიისკში და 6 მაისს დამთავრდება, გზად კი ბერძნულ-რომაულსა და ქალთა ჭიდაობებსაც მოიცავს.

იქ წასვლამდე ჩვენი გუნდი კიდევ ორ შეკრებას გაივლის (არაა გამორიცხული, რომელიმე წონაში კონკურენცია აქაც გადაწყდეს), რომლებსაც საქართველოში, შიდა სამზარეულოში გამართავს.

დასასრულს გეტყვით, რომ აქ ძირითადად ლაპარაკია ეროვნული ნაკრების ლიდერებზე, რომლებიც, საქართველოს ჩემპიონატის შედეგებიდან გამომდინარე, ევროპის პირველობაზე წასვლის მთავარ კანდიდატებად მოიაზრებიან, თორემ სათადარიგო ფალავნები სხვა შეჯიბრებებშიც გამოვლენ.

მაგალითად, მეორე შემადგენლობა იასპარეზებს 8-9 თებერვალს ირანულ თავრიზში გასამართავ "ტახტის თასზე", სადაც მასპინძლები თავისი ხარჯებით გვიღებენ, ბილეთის ფულსაც კი ისინი უნაზღაურებენ მონაწილე გუნდებს.

ყოველდღიური სპორტული გაზეთი "ლელო"
960
მკითხველის კომენტარები / 1 /
სოსო
0
ეს რომ სამარცხვინოა,ფაქტია,მაგრამ რა დავარქვათ იმას,რომ თავი ვერ მოება Nოდარ ქუმარიტაშვილის სახელობის საციგაო ტრასის აშენებას?მისი აშენება ხომ საერთაშორისო ოლიმპიურმა კომიტეტმა ივალდებულა.ათრიეს,ათრიეს,გაიყვანეს დრო და მიივიწყეს.ნეტავი რის ფასად?
მსგავსი ამბები
რუბრიკის სხვა სიახლეები
;