თავისუფალი ჭიდაობა. ნაკრები სპარინგებს ამერიკელებთან მართავს

საქართველოს თავისუფალი სტილით მოჭიდავეთა ნაკრები მსოფლიოს ჩემპიონატისთვის დასკვნით შეკრებას დუშეთში გადის, სადაც მათთან ერთად შეკრებაზე აშშ-ს ნაკრების 4 წევრი და 1 კოლუმბიელი ფალავანიც იმყოფებიან. ამერიკელთაგან ერთი ქალთა ახალგაზრდული ნაკრების წევრია, კოლუმბიელი კი ამერიკის ყოფილი მოქალაქეა, რომელიც იქ გადაბარგდა და ამჟამად კოლუმბიის სახელით გამოდის.

დუშეთში შეკრებაზე მთავარ მწვრთნელ გიორგი იანტბელიძის განკარგულებაში ყველა უძლიერესი ფალავანია: ევროპის სამგზის, ოლიმპიური და მსოფლიოს ჩემპიონი ვლადიმერ ხინჩეგაშვილი (65), მსოფლიოსა და ევროპის ჩემპიონი, ოლიმპიური პრიზიორი გენო პეტრიაშვილი (125), მსოფლიოს ჩემპიონი ზურაბ იაკობიშვილი (70), ევროპის ფინალისტები - ბექა ლომთაძე (61) ელიზბარ ოდიკაძე (97) და სხვები.

მსოფლიოს ჩემპიონატი ბუდაპეშტში 20-28 ოქტომბერს ტარდება. მასში თავდაპირველად თავისუფალი სტილით მოჭიდავეები ჩაებმებიან, ჩვენები კი უნგრეთში 17 ოქტომბერს გაფრინდებიან.

რაც შეეხებათ ბერძნულ-რომაული სტილით მოჭიდავეებს, ისინიც დუშეთის ოლიმპიურ ბაზაზე ვარჯიშობენ, თუმცა ბაზალეთზე ცხოვრობენ. მათი ხელმძღვანელობა მომდევნო კვირაში გეგმავს საკონტროლო შეხვედრებს, რის შემდეგაც დაასახელებს ბუდაპეშტში წასაყვან შემადგენლობას, გამგზავრებით კი იმ კვირის ბოლოს გაფრინდებიან.

847
მკითხველის კომენტარები / 0 /
მსგავსი ამბები
რუბრიკის სხვა სიახლეები
;