თავისუფალი ჭიდაობა. საქართველოს ჩემპიონატი. ამჯერადაც ორგანიზებულად

დიღომში, ოლიმპიურ პარკში მდებარე ფრენბურთის დარბაზში გუშინ დაიწყო საქართველოს 2017 წლის ჩემპიონატი თავისუფალ ჭიდაობაში, რომელშიც თავდაპირველად 57, 65, 74, 86 და 97 კილოგრამების ფალავნები ჩაებნენ.

სასიამოვნოა, რომ წესრიგი და დისციპლინა ბოლო პერიოდში ჭიდაობაშიც ტრადიციად იქცა, რაც განუხრელად გრძელდება: არანაირი კამათი და კინკლაობა, ხოლო ძველებურად ჩხუბსა და დებოშზე ლაპარაკიც არაა (სპორტსმენები კი არა, უკვე მწვრთნელებიც აღარ ჩხუბობენ);

ტაბლოები, თბილი დარბაზი და აზერბაიჯანიდან მოწვეული მსაჯები! ამ ყველაფერს მონაწილეთა მაღალი დონეც დაემატა - ფედერაციის, მწვრთნელთა კატეგორიული მოთხოვნით, უკლებლივ ყველა ლიდერმა იჭიდავა თვით ოლიმპიური და მსოფლიოს ჩემპიონის, ევროპის სამგზის გამარჯვებული ვლადიმერ ხინჩეგაშვილის თავკაცობით, რომელიც ამჯერად მისთვის ახალ წონაში - 65 კილოგრამში გამოდის.

საქართველოს ნაკრებში საკმაოდ ბევრი ტიტულოვანი ათლეტი გამოდის. თან მათ ახალგაზრდული ნაკრების წევრებიც ემატებიან და ერთად, ერთ შეჯიბრებაზე ამდენი ძლიერი მოჭიდავის ხილვა მაყურებლისთვის კარგი სანახაობა გამოდგა.

საბედნიეროდ, ქომაგიც საკმაოდ ბლომად მივიდა დარბაზში იმის მიუხედავად, რომ ეს არენა (ზოგადად, ოლიმპიური პარკი) საკმაოდ მიუვალ ადგილასაა, საქალაქო ტრანსპორტი არ დადის, ხოლო ფედერაცია პირდაპირ ინტერნეტ-რეპორტაჟსაც აკეთებდა.

ტიტულოვანთაგან ერთადერთი გამონაკლისი ევროპისა და მსოფლიოს ჩემპიონი, ოლიმპიური მედალოსანი გენო პეტრიაშვილია, ვისაც დღეს უნდა ეჭიდავა მძიმე წონაში, მაგრამ ნეკნის ტრავმის გამო ასვენებენ.

შეჯიბრება ახალი ფორმატით, ანუ 10 წონაში და ორ დღედ ტარდება. გუშინ მხოლოდ წინასწარი შეხვედრები გაიმართა დამამშვიდებელი წრის ჩათვლით.

შედეგად, გაირკვნენ ოქროს და ბრინჯაოს მედლებისთვის მებრძოლი წყვილები (მათ სიას ქვემოთ შემოგთავაზებთ), ფინალური ბლოკი კი დღეს საღამოს 17 საათიდან დაიწყება.

დღესვე იჭიდავებენ დანარჩენი ხუთი წონის ათლეტები, მათ შორის კი მსოფლიოს წლევანდელი ჩემპიონი ზურაბ იაკობიშვილიც იქნება, რომელიც ასევე ახალ წონაში - 70-ში გამოვა.

57 კგ. ფინალი

ოთარ გოგავა (ხონი) - თეიმურაზ ვანიშვილი (გორი)

დამამშვიდებლის ფინალი

გიორგი ნიშნიანიძე (ქუთაისი) - რამაზ დარჩიძე (აჭარა)
ვლადიმერ არუთუნიანი (გორი) - რობერტ დინგაშვილი (ყვარელი)

65 კგ. ფინალი

ვლადიმერ ხინჩეგაშვილი (გორი) - მაგამედ საიდოვი (ყვარელი, ორც)

დამამშვიდებლის ფინალი

ედემი ბოლქვაძე (სამტრედია) - შოთა ფარტენაძე (აჭარა, ორც)
გიორგი ბალიაშვილი (გორი) - გიორგი რევაზიშვილი (მცხეთა)

74 კგ. ფინალი

ავთანდილ კენჭაძე (ამბროლაური, ორც) - ზურაბ ერბოწონაშვილი (საგარეჯო, ორც)
დამამშვიდებლის ფინალი

ტარზან მაისურაძე (თბილისი) - გოგა მამიური (თბილისი, ორც)
დავით ტლაშაძე (გორი) - ალექსანდრე ჯაჭვაძე (გარდაბანი)

86 კგ.  ფინალი

დავით ხუციშვილი (საგარეჯო) - სანდრო ამინაშვილი (თბილისი)
დამამშვიდებლის ფინალი

გიორგი ქვათაძე (საჩხერე) - დავით ფირუზაშვილი (თბილისი)
ზაურ ბერაძე (ხარაგაული, ორც) - მარადი ზოიძე (აჭარა)

97 კგ. ფინალი

ელიზბარ ოდიკაძე (თბილისი) - ზვიად მეტრეველი (ონი)

დამამშვიდებლის ფინალი

ალექსანდრე გობეჯიშვილი (თბილისი) - გივი მაჭარაშვილი (მცხეთა)
მამუკა კორძაია (აჭარა) - მოგელი მეზვრიშვილი (გორი)

ყოველდღიური სპორტული გაზეთი "ლელო"
1919
მკითხველის კომენტარები / 0 /
მსგავსი ამბები
რუბრიკის სხვა სიახლეები
;