თავისუფალი ჭიდაობა. ტახტის თასზე ამჯერადაც სათადარიგოებით

საქართველოს თავისუფალი სტილით მოჭიდავეთა ნაკრები გუშინ ირანულ თავრიზში გაემგზავრა, სადაც 8-9 თებერვალს "ტახტის თასზე" იასპარეზებს.

ბერძენ-რომაელთა მსგავსად, რომლებიც იანვარში ანალოგიურ ტურნირზე სათადარიგო შემადგენლობით გამოვიდნენ, ირანში ესენიც ლიდერთა გარეშე იჭიდავებენ - ზურაბ ჭიღლაძემ იქ უმეტესად 20 და 23-წლამდელთა ახალგაზრდული გუნდის წევრები წაიყვანა, ეროვნული ნაკრების წევრობის კანდიდატები კი ცოტანი არიან.

მთავარი ფავორიტები თვის ბოლოს კიევში გამოვლენ "სახელოვან უკრაინელ მწვრთნელთა და მსაჯთა მემორიალში". ამ პირობებში ირანში წასვლა არც დადგებოდა დღის წესრიგში, რომ არა ერთი გარემოება:

მასპინძლები თვითონ იწვევენ მონაწილე გუნდებს, თვითონ უხდიან მგზავრობისა და ადგილზე ცხოვრების ხარჯებს. ამიტომ ჩვენებს ფინანსურად არაფერი ეხარჯებათ და სიამოვნებით მიდიან, რადგან ეს, ტრადიციულად, ძლიერი შეჯიბრებაა.

თუმცა ჭიღლაძეს თავრიზში არასრული გუნდი მიჰყავს - მიზეზთა გამო, 57 და 79 კილოგრამებში მონაწილე არ გვეყოლება. მას უმეტეს წონებში თითო მონაწილე მიჰყავს, თუმცა 61-ში ორი, 86-ში კი სამი შეგირდი ეყოლება. სწორედ 86-შია ყველაზე ტიტულოვანი მონაწილე - ევროპისა და მსოფლიოს ბრინჯაოს მედალოსანიდავით ხუციშვილი.

61 კგ: ლევან მურცხვალაძე (რუსთავი),
გიორგი რევაზიშვილი (მცხეთა)
65 კგ: შოთა ფარტენაძე (აჭარა)
70 კგ: გიორგი სულავა (ქუთაისი)
74 კგ: გიორგი ლობჟანიძე (თბილისი)

86 კგ: დავით ხუციშვილი (საგარეჯო),
თორნიკე ალადაშვილი, დავით ფირუზაშვილი (ორივე - თბილისი)
92 კგ: იუზა ცერცვაძე (ბაღდათი)
97 კგ: ზვიად მეტრეველი (ონი)
125 კგ: როლანდ ანდრიაძე (ხონი).

ყოველდღიური სპორტული გაზეთი "ლელო"
1033
მკითხველის კომენტარები / 0 /
მსგავსი ამბები
რუბრიკის სხვა სიახლეები
;