თავისუფალი ჭიდაობა. უნგრუნული მონაგარი - ოქრო, ვერცხლი და ორი ბრინჯაო

ბუდაპეშტში თავისუფალი სტილით მოჭიდავეთა მსოფლიოს ჩემპიონატი ჩვენმა ნაკრებმა ორი ბრინჯაოთი დაასრულა - გუშინ ფინალურ ბლოკში გასულმა ორივე ჩვენებურმა იმარჯვა.

შედეგად მსოფლიოს წლევანდელი ჩემპიონატის მესამე პრიზიორები ყვარლელი ზურაბ იაკობიშვილი (70) და თბილისელი ელიზბარ ოდიკაძე (97) გახდნენ.

ამდენად საქართველოს ნაკრებმა მსოფლიოს ჩემპიონატზე გამოსვლა ოთხი მედლით დაასრულა: თითო ოქრო-ვერცხლი და ორი ბრინჯაო.

მსოფლიოს ჩემპიონი ზედიზედ მეორედ გახდა გორელი მძიმეწონოსანი გენო პეტრიაშვილი, ხოლო ამბროლაურელი დებიუტანტი ავთანდილ კენჭაძე (74) ვერცხლს დასჯერდა. გუნდურ ჩათვლაში საქართველოს ნაკრები 105 ქულით მესამე ადგილზეა. პირველი 178-ით რუსეთია, მეორე კი 150-ით - აშშ.

იაკობიშვილი ბუდაპეშტში მსოფლიოს მოქმედი ჩემპიონის რანგში ჩავიდა და ნახევარფინალი კი დათმო რუსთა მომავალ მსოფლიოს ჩემპიონ მაგომედრასულ გაზიმაგომედოვთან, მაგრამ ზედიზედ მეორე წელიწადია, მსოფლიოს ჩემპიონატიდან უმედლოდ არ ბრუნდება, რაც მის სტაბილურობაზე მიუთითებს. თან ის 70 კილოგრამში პირველად ჭიდაობდა მსოფლიოს ჩემპიონატზე.

მოგეხსენებათ, შარშან 65 კილოგრამში გამოდიოდა და ევროპის პირველობაზე ბრინჯაოს მედალი მოიპოვა, მერე კი მსოფლიოს პირველობა მოიგო. წლეულს ის ახალ წონაში ევროპაზეც მესამე იყო და ახლა აგერ, მსოფლიოზეც დაისაკუთრა ჯილდო.

ამჯერად ბრინჯაოსთვის შეხვედრაში მან 3.31 წუთში გაანადგურა მონღოლი ბიამბადორჯ ბატ ერდენე: 10:0. ჩვენებურის კოლოსალურ უპირატესობაზე ანგარიშიც მიუთითებს და შეხვედრის პერიპეტიებზე საუბარს აზრიც არა აქვს.

ოდიკაძეს გაცილებით დიდი ბრძოლა გადახდა უზბეკ მაგომედ იბრაგიმოვთან. აზიის წლევანდელი ჩემპიონი და რიო დე ჟანეიროს ოლიმპიადის მესამე პრიზიორი იბრაგიმოვი შუააზიელთა სახელით კი გამოდის, მაგრამ წარმოშობით დაღესტნელი ავარია, 2013 წელს გადავიდა რუსეთიდან უზბეკეთში და დაღესტნურ საჭიდაო სკოლას წარმოადგენს, ძირითადად ისევ იქ ემზადება შეჯიბრებებისთვის.

ოდიკაძემ მასთან აქტიურად დაიწყო ჭიდაობა და პირველ პერიოდში გაფრთხილებებით ქულაც დასტყუა: 1:0 დაწინაურდა. ჩვენებური ტრადიციულ სტილში ჭიდაობდა და ფეხში შესვლებს ცდილობდა, თუმცა რამდენჯერმე ვერ გადაიყვანა მეტოქე ჩოქბჯენში. ის თავს კარგად იცავდა და მეტოქე ფეხისკენ რამდენჯერმე კი გაექცა, მაგრამ აყვანის საშუალება არ მისცა.

ვლადიმერ ხინჩეგაშვილისა არ იყოს, ამ ეპიზოდში ჩაჯდომით თავის დაცვა და ზურგს უკან მეტოქის გადაგდება მასაც კარგად ეხერხება, თუმცა ამჯერად ეს არ გამოუვიდა - მოსამზადებელ პერიოდში მასაც ჰქონდა ჯანმრთელობის პრობლემები გაცივების გამო და, სავარაუდოდ, ამიტომ ჩვეულ ფიზიკურ კონდიციებში ვერ იყო. თუმცა უზბეკი მაინც გვარიანად მოღალა და გამძლეობაში აჯობა, რაც კიდევ უფრო თვალში საცემი მას შემდეგ გახდა, რაც ჩამორჩენის შემდეგ ტემპს უმატა და შეტევა გააძლიერა.

ერთ ეპიზოდში დაბლა ჭიდაობისას მაგომედოვს კარგად ამოუძვრა და გადაიყვანა - 3:2, მალევე კი ვა-ბანკზე წამოსული მეტოქე მოწყვეტით გადააგდო უკან და იქვე ბეჭებზეც დადო. ასე ლამაზად დაასრულა მან მსოფლიოს ჩემპიონატზე გამოსვლა - "ტუშეთი" და კარიერაში მსოფლიოს პირველობის პირველი მედლით.

მსოფლიოს ჩემპიონატზე მან შარშანაც იჭიდავა ბრინჯაოსთვის, თუმცა დასანანად წააგო და მეხუთეზე დარჩა. იაკობიშვილის მსგავსად, ეს წლეულს მისთვისაც მეორე ბრინჯაოა - ევროპაზეც ესეც მესამე იყო.

ამ წონაში, ალბათ, მთელი მსოფლიო უდიდესი ინტერესით ელოდა ფინალს ორ გიგანტს - ამერიკელ კაილ სნაიდერსსა და რუს აბდულრაშიდ სადულაევს შორის, თუმცა ბრძოლა არ შედგა:

"რუსულ ტანკად" წოდებულმა დაღესტნელმა წუთზე ოდნავ მეტში ბეჭებზე დააწვინა ამერიკელი და ბუდაპეშტში ჩინებულად მოასპარეზე ამერიკის ნაკრებს ისეთი ალიყური გააწნა, ყველაფერი ჩაუშხამა. იქით იტალიელთა ნატურალიზებულმა კუბელმა აბრაჰამ დე ხესუს კონიედო რუანომ დაამწუხრა მასპინძლები, რადგან ბრინჯაოსთვის ბრძოლაში მათი უკრაინელი ევროპის ჩემპიონი ლეგიონერი პავლო ოლეინიკი დაამარცხა და მადიარებს ერთადერთი მედლის მოპოვების შანსიც მოუსპო. რაოდენ გასაკვირიც უნდა იყოს, უნგრელთა ძლიერი გუნდი საკუთარ კედლებში წარუმატებლად გამოვიდა და უმედლოდ დარჩა.

რაკი სიტყვა ჩემპიონატის საინტერესო პერიპეტიებზე ჩამოვარდა, გეტყვით, რომ 65 კილოგრამში მეორეზე გავიდა ინდოელი ბაჯრანგ ბაჯრანგი, ვისაც ქართველი მწვრთნელი ემზარ ბედინეიშვილი ავარჯიშებს. ბედინეიშვილმა ერთ წელიწადში მოახერხა და ამხელა წარმატებას მიაღწია, თუმცა ფინალში იაპონელთან მარცხი, ვგონებთ, შეგირდზე მეტად განიცადა. ის და ბაჯრანგი ამ ზაფხულს ვახტანგ ბალავაძის სახელობის ტურნირზეც იყვნენ თბილისში და ინდოელმა მაშინაც წარმატებით იჭიდავა.

ჩემპიონატის პირველივე საშეჯიბრო დღეს ჭიდაობის სამყაროსთვის უპრეცედენტო ფაქტი მოხდა - რუსებს გაუბედეს და მათი მწვრთნელი ჯამბულათ თედეევი გააგდეს არენიდან. თედეევის გააფთრება 61 კილოგრამის ფინალმა გამოიწვია, რომელშიც კუბელმა იოვლის ბონე როდრიგესმა მისი დაღესტნელი შეგირდი ჰაჯიმურად რაშიდოვი დაამარცხა.

წაგებით განაწყენებული ოსი ჯერ ლეიბზე შევარდა, ხოლო როცა მსაჯმა წითელი ბარათიც უჩვენა, მისკენაც გაიწია. მისი გაგდების შემდეგ რუსებს სხვადასხვა სეკუნდანტები ეჯდათ. მათ შორის - დაღესტნელთა ორგზის ოლიმპიური ჩემპიონი მავლეტ ბატიროვიც, რომლის უმცროსი ძმა - ადამ ბატიროვი 70 კილოგრამში ბრუნეის სახელით ვიცე-ჩემპიონი გახდა. აქვე გეტყვით, რომ კარიერის ბოლოსთავად მავლეტიც ბრუნეის სახელით გამოდიოდა, ახლა კი სასულთნოს ღირსებას ჩვენი გიორგი საკანდელიძეც იცავს (125), თუმცა ბუდაპეშტში მას რატომღაც არ უჭიდავია.

ამ ჩემპიონატზე აღსანიშნავია ამერიკელთა ძლიერი და აზერბაიჯანელთა სუსტი გამოსვლა, თუმცა ამერიკელებში ძველმა ლიდერებმა, ოლიმპიურმა და მსოფლიოს ოთხ-ოთხგზის ჩემპიონებმა - ჯორდან ბაროუზმა (74) და კაილ სნაიდერსმა (97) ფავორიტობა ამჯერად ახალბედებს გადაულოცეს.

57 კგ.
1. ზაურ უგუევი (რუსეთი); 2. ნურისლამ სანაიევი (ყაზახეთი); 3. იუკი ტაკაჰაში (იაპონია), სულეიმან ათლი (თურქეთი); 19. ოთარ გოგავა (საქართველო).
61 კგ. იოვლის ბონე როდრიგესი (კუბა); 2. ჰაჯიმურად რაშიდოვი (რუსეთი); 3. იოსეპ დანიელ კოლონი (აშშ), ტუვშინტულგა ტუმენბილეგი (მონღოლეთი); 5. ბექა ლომთაძე (საქართველო).

65 კგ.
1. ტაკუტო ოტოგურო (იაპონია); 2. ბაჯრანგ ბაჯრანგი (ინდოეთი); 3. ახმედ ჩაკაევი (რუსეთი), ალეხანდრო ენრიქე ვალდეს ტობიერი (კუბა); 11. ვლადიმერ ხინჩეგაშვილი (საქართველო).

70 კგ.
1. მაგომედრასულ გაზიმაგომედოვი (რუსეთი); 2. ადამ ბატიროვი (ბრუნეი); 3. ზურაბ იაკობიშვილი (საქართველო), ფრანკლინ მარენ კასტილო (კუბა).
74 კგ.
1. ზაურბეკ სიდაკოვი (რუსეთი); 2. ავთანდილ კენჭაძე (საქართველო); 3. ბეკზოდ აბდურახმონოვი (უზბეკეთი), ჯორდან ბაროუზი (აშშ).

79 კგ.
1. კაილ დუგლას დაკე (აშშ); 2. ჯაბრაილ ჰასანოვი (აზერბაიჯანი); 3. ახმედ გაზიმაგომედოვი (რუსეთი), ალი შაბანაუ (ბელარუსი); 5. დავით ხუციშვილი (საქართველო).

86 კგ.
1. დავიდ ტეილორი (აშშ); 2. ფატიჰ ერდინი (თურქეთი); 3. თეიმურაზ ფრიევ ნასყიდაევა (ესპანეთი), ჰასან ალიაზამ იაზდანიჩარატი (ირანი); 17. სანდრო ამინაშვილი (საქართველო).

92 კგ.
1. დენ მიშაელ ტბორი კოქსი (აშშ); 2. ივან იანკოუსკი (ბელარუსი); 3. ატსუში მაცუმოტო (იაპონია), ალირეზა მოჰამად კარიმიმაჩიანი (ირანი); 5. დავით მარსაგიშვილი (საქართველო).

97 კგ.
1. აბდულრაშიდ სადულაევი (რუსეთი); 2. კაილ სნაიდერფი (აშშ); 3. ელიზბარ ოდიკაძე (საქართველო), აბრაჰამ დე ხესუს კონიედო რუანო (კუბა).

125 კგ.
გენო პეტრიაშვილი (საქართველო); 2. ჭივეი დენი (ჩინეთი); 3. ნიკოლას ედვარდ გვიაზდოვსკი (აშშ), ფარვიზ ხოდავირდი ჰადიბასმანი (ირანი).

ყოველდღიური სპორტული გაზეთი "ლელო"
860
მკითხველის კომენტარები / 0 /
მსგავსი ამბები
რუბრიკის სხვა სიახლეები
;