თავისუფალი ჭიდაობა. ქართველები ალანიას დასაპყრობად

საქართველოს თავისუფალი სტილით მოჭიდავეთა ნაკრების ერთი ჯგუფი 18-19 ნოემბერს მონაწილეობას მიიღებს საერთაშორისო ტურნირ "ალანიაში".

ეს შეჯიბრება ჩრდილო ოსეთის რესპუბლიკის პრეზიდენტ ვიაჩესლავ ბითაროვის პატრონაჟით ტარდება და გვარიანი საპრიზო ფონდიცაა დაწესებული - 80 ათასი დოლარი. ჩემპიონი ჯილდოდ 5 ათასს მიიღებს, ვიცე-ჩემპიონი - 2 ათასს, მესამე პრიზიორები - 1 000-1 000 დოლარს.

მოსკოვში გამართული წინა შეჯიბრების - "ევროპის ერთა თასი - ალროსას თასის" არ იყოს, ნაკრების მთავარი მწვრთნელი გიორგი იანტბელიძე არც აქ მიდის უძლიერესი შემადგენლობით, ლიდერებს კვლავაც ასვენებს, თუმცა ამჯერად რამდენიმე ფავორიტი მაინც ეყოლება.

მაგალითად, ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (61), ევროპის ფინალისტი ელიზბარ ოდიკაძე (97) და გიორგი მეშვილდიშვილი (130). სულ ვლადიკავკაზში საქართველოდან 21-კაციანი დელეგაცია მიდის.

ჩვენი თავისუფალი სტილით მოჭიდავეთა ნაკრები ბორჯომში გადის შეკრებას, რომელსაც 20 ნოემბერს დაამთავრებენ. სამწუხაროდ, გუნდში ტრავმების პრობლემაცაა, თუმცა არა რამე განსაკუთრებული და საშიში.

ბოლო დღეებში ფეხის ტრავმა მიიღო ევროპის ფინალისტმა ბექა ლომთაძემ (57), რის გამოც ვერ წავიდა ვლადიკავკაზში. ასევე ფეხის ტრავმა აწუხებს მსოფლიოს ჩემპიონ ზურაბ იაკობიშვილს, ვინც უკვე გადავიდა 70 კილოგრამში. ცოტა ხნის წინ ის დასასვენებლად საფრანგეთში იმყოფებოდა, სადაც თურმე მუხლზე ფურუნკული გამოსვლია, რაზეც იქაურ ექიმებს ქირურგიული ჩარევა დაუჟინიათ.

ესეც დასთანხმებია და გაუკეთებია, მაგრამ ნაოპერაციებს თურმე დღემდე იშუშებს.

ვლადიკავკაზის ტურნირი საკმაოდ ძლიერი უნდა გამოდგეს, რადგან მონაწილეობაზე თანხმობა დაადასტურეს უკრაინამ, ყაზახეთმა, ბელარუსმა, სომხეთმა, მონღოლეთმა, თურქეთმა, სლოვაკეთმა, გერმანიამ და ბულგარეთმა. ბუნებრივია, გამოვლენ რუსები, ბოლო მომენტში კი წასვლაზე თანხმობა აზერბაიჯანმაც განაცხადა.

ამ ტურნირიდან ერთ კვირაში ჩვენი ნაკრები უკვე ყაზახეთში მიემგზავრება, სადაც 25-26 ნოემბერს ქალაქ თარაზში კუნაევის მემორიალში გამოვა.

ბარემ აქვე გეტყვით, რომ ჩვენი ბერძნულ-რომაული სტილით მოჭიდავეთა ნაკრები მინსკშია წასული, სადაც ოლეგ კარავაევის მემორიალში იჭიდავებენ. იქ ჩვენ გარდა, აზერბაიჯანი, რუსეთი, უკრაინა, ლიტვა, ყაზახეთი, თურქეთი, პოლონეთი, აშშ და ირანი იჭიდავებენ, ტურნირი კი გუნდური პრინციპით ტარდება.

გამარჯვებული ნაკრები ჯილდოდ 5 000 დოლარს მიიღებს, ფინალისტი - 3 000-ს, ხოლო მესამეზე გასული - 2 000-ს. ჩვენი ნაკრების მთავარ მწვრთნელ ბექა როყვასაც გადახალისებული შემადგენლობა მიჰყავს იქ, საქართველოს ღირსებას კი შემდეგი ფალავნები დაიცავენ:

საქართველოს ნაკრები

59 კგ. ლერი აბულაძე (აჭარა)
66 კგ. ედნარ შავაძე (აჭარა)
71 კგ. გოგა გოგიბერაშვილი (სამტრედია)
75 კგ. მინდია წულუკიძე (აჭარა)
80 კგ. ზურაბ დათუნაშვილი (თბილისი)
85 კგ. რობერტ კობლიაშვილი (თბილისი)
98 კგ. რევაზ ნადარეიშვილი (აბაშა)
130 კგ. ბექა კანდელაკი (თბილისი)

ყოველდღიური სპორტული გაზეთი "ლელო"
1708
მკითხველის კომენტარები / 0 /
მსგავსი ამბები
რუბრიკის სხვა სიახლეები
;