თავისუფალი ჭიდაობა. ქართველები სკოპიეს იპყრობენ

ქართველი ჭაბუკები არნახული წარმატებით გამოდიან სკოპიეში მიმდინარე თავისუფალი სტილით მოჭიდავეთა ევროპის ჩემპიონატში, სადაც უკვე მოპოვებულია 1 ოქრო და 2 ბრინჯაო, დღეს კი ფინალურ ბლოკში კიდევ ხუთი ჩვენებური იჭიდავებს. მათ შორის 1 ისევ ოქროსთვის იბრძოლებს, დანარჩენები კი ბრინჯაოს მოპოვებას შეეცდებიან.

როგორც უნდა დასრულდეს დღევანდელი ფინალური ბლოკი, საბოლოოდ ისე გამოდის, რომ გია კვინიკაძის 10 შეგირდიდადნ 9-მ მედლისთვის იჭიდავა!

გაგნიძემ რუსიც ათრია

გუშინდელ ფინალურ ბლოკში წარმატებით იჭიდავა ქუთაისელმა ბაგრატ გაგნიძემ (71), ვინც 5:3 მოუგო რუს რამაზან აბუზაგიდოვს. ბრინჯაოსთვის პაექრობები ასევე წარმატებით ჩაატარეს კიდევ ერთმა ქუთაისელმა, ევროპის შარშანდელმა ჩემპიონმა გიორგი ჭოლაძემ (51) და ამბროლაურელმა ვლადიმერ გამყრელიძემ (60). სამწუხაროდ, გუშინ ნიკა ბერულავას (92) ხელი მოეცარა და მეხუთე ადგილზე დარჩა.

გაგნიძემ დიდოსტატურად დაამარცხა აბუზაგიდოვი. თუმცა პირველივე ნახევარ წუთში მოუწია "ბეწვის ხიდზე" გავლამ, როცა მეტოქემ ფეხიდან აიყვანა, მაგრამ ჩვენებურმა კარგად დაიცვა თავი და გდების საშუალება არ მისცა. ამის მიუხედავად, მაინც მას მოუწია ჩამორჩენა და ანგარიშის გათანაბრებაზე ზრუნვა.

შეხვედრის განახლებისთანავე გაგნიძემ მეტოქე ჯვარედინი მოვლებიდან მშვენიერ 4-ქულიანზე გაისროლა, აი, აქ კი მსაჯებს "რაღაც" გაახსენდათ და რუსს წინა ქულები გადაუსწორეს, ერთბაშად 4 ქულა დაუწერეს. საბოლოოდ ერთი ჩამოაკლეს და ანგარიში 4:3 გახდა, რაც გაგნიძემ ბოლომდე შეინარჩუნა.

მან საიმედოდ იჭიდავა დაცვით სტილში, ოღონდ არა პასიურად. შეტევაში არ მიდიოდა, მაგრამ არც გაურბოდა მეტოქეს და თითქოს მის შეცდომას ელოდა. მსაჯის სასტვენის შემდეგ რუსებმა გააპროტესტეს შედეგი, მაგრამ მსაჯებმა არ დაუკმაყოფილეს და ერთი ქულა ჩვენებურს დაუმატეს.

ბრინჯაოს მოსაპოვებლად ჭოლაძემ ცხარე ბრძოლა გადაიტანა ლატვიელ ალექსანდრს მოროზოვსთან (9:7), თუმცა ნაკლები ჯაფა არც გამყრელიძეს დასდგომია: რუს ბაგრატ პანდარიას 13:12 სძლია.

ხუთეულის გმირობა

ჩემპიონატში გუშინ ჩაბმული ხუთეულიდან შესანიშნავად გამოვიდა ასევე ქუთაისელი დავით აბდალაძე (55), ვისაც ჩვენებიდან ყველაზე ცუდი ბადე ჰქონდა.

რიონისპირელმა ჯერ თურქ ფერჰატ კილიჯს აყარა "შავი დღე" - 11:1 და წმინდა მოგება, მერე აზერბაიჯანელ აბულფაზ ნასიროვს 4:2 სძლია, მეოთხედფინალში კი ბელარუს ანატოლი ჰრამიკას 6:1 მოუგო. ნახევარფინალში ბულგარელი რუჰან რასიმი 2:0 დაამარცხა და დღეს ფინალში უკრაინელ ვლადისლავ ოსტეპენკოს შეხვდება, ვინც რუს მეტოქეს აჯობა.

დღეს ბრინჯაოს მედლისთვის იჭიდავებენ გიორგი გეგელაშვილი (48), ლაშა მარიამიძე (65), გიორგი ნებუნიშვილი (80) და სოლომონ მანაშვილი (110). ამათგან გეგელაშვილი და მარიამიძე ნახევარფინალში გავიდნენ და იქ დამარცხდნენ ანუ დღეს საღამოს პირდაპირ ბრინჯაოსთვის იჭიდავებენ, ხოლო ნებუნიშვილი და მარიამიძე დამამშვიდებელი წრიდან შეეეცდებიან ბრინჯაომდე მისვლას.

45 კგ.
1. რაფაელ ჰარუთინიანი (სომხეთი); 2. ბესირ ალილი (მაკედონია); 3. ვასილე მარკუ (მოლდოვა), კანან ჰეიბატოვი (აზერბაიჯანი); 11. ჯონი ცხადაია (საქართველო).

51 კგ.
1. ადემ ბურაკ უზუნი (თურქეთი); 2. მანველ კნძრტისიანი (სომხეთი); 3. გიორგი ჭოლაძე (საქართველო), სამველ ტერზიანი (რუსეთი).

60 კგ.
1. ჰამზა ალაჯა (თურქეთი); 2. სტანისლავ ნოვაკი (მოლდოვა); 3. ვლადიმერ გამყრელიძე (საქართველო), სიმონ იაკობ მონცი (გერმანია).

71 კგ.
1. ბაგრატ გაგნიძე (საქართველო); 2. რამაზან აბუზაგიდოვი (რუსეთი); 3. ჰრისტიან სტეფანოვ სტეფანოვი (ბულგარეთი), მუჰამეტ ჯავუზი (თურქეთი).

92 კგ.
1. ჰაჯი გამზათოვი (რუსეთი); 2. იოჰანეს მაიერი (გერმანია); 3. დანილო სტასიუკი (უკრაინა), ჯაგრი ჯან ბაირამი (თურქეთი); 5. ნიკა ბერულავა (საქართველო).

ყოველდღიური სპორტული გაზეთი "ლელო"
267
მკითხველის კომენტარები / 0 /
მსგავსი ამბები
რუბრიკის სხვა სიახლეები