თავისუფალი ჭიდაობა. 'ციოლკოვსკის მემორიალში' ნაკრებმა 6 მედლი მოიპოვა

საქართველოს თავისუფალი სტილით მოჭიდავეთა ნაკრებმა 6 მედლით დაასრულა გამოსვლა ვარშავაში, "ციოლკოვსკის მემორიალში":

3 ოქრო, 2 ვერცხლი და ერთი ბრინჯაო. ჩემპიონები ზურაბ იაკობიშვილი (70), ავთანდილ კენჭაძე (74) და ელიზბარ ოდიკაძე (97) გახდნენ, ვერცხლი ვლადიმერ ხინჩეგაშვილსა (65) და დავით ხუციშვილს (79) ერგოთ, მესამეზე კი დავით მარსაგიშვილი (92) გავიდა.

აქვე გეტყვით, რომ ხინჩეგაშვილი ფინალში საჭიდაოდ არ გავიდა რუსთა ჩეჩენ ახმედ ჩაკაევთან. მიზეზი წინა დღეს მიღებული ტრავმაა.

ჩვენი ოლიმპიური და მსოფლიოს, ევროპის სამგზის ჩემპიონი ფინალამდე დამაჯერებლად მივიდა: მერვედფინალში 5:3 დაამარცხა ჩინელი ჰასიბაგენა ჰასიბაგენა, მეოთხედფინალში საკმაოდ ძლიერი მოლდოველი ანდრეი პერპელიტა 7:2 დაჯაბნა, ნახევარფინალში კი იოლად, 11:0 გაანადგურა ბულგარელი დიმიტარ ივანოვი.

მსოფლიოს ჩემპიონმა და ევროპის პრიზიორმა იაკობიშვილმაც აღმავლობით ჩაატარა მთელი ტურნირი და ნამდვილად კარგი სტარტი გამოუვიდა.

საკვალიფიკაციო ეტაპზე 11:1 მოუგო ჩინელ აირიკენ აილიხიატის, მერე კი ყაზახებს დაერია: მეოთხედფინალში 7:1 მოუგო გამოცდილ დაურენ ჟუმაგაჯიევს, ნახევარფინალში მისი თანაგუნდელი მაირჟან აშიროვი 4:1 ჩამოიცილა, ფინალში კი ამანდიკ ბაკიევისგან ქვა ქვაზე არ დატოვა და 12:2 მოუგო.

იაკობიშვილმა ფინალური პაექრობაც ჩვეულად, შემტევ სტილში და აღმავლობით ჩაატარა ბაკიევთან, თუმცა კი თავიდან 0:2 ჩამორჩა: იაკობიშვილის ერთ-ერთი დადებითი თვისება ისაა, რომ ჩამორჩენა კონცენტრაციას არ უკარგავს. მართალია, პირველ პერიოდში მეტოქეს ვერაფერი მოუხერხა, მაგრამ მეორეში საოცრად მობილიზებული დაბრუნდა ხალიჩაზე, ყაზახს ნამდვილი შტურმი მოუწყო და 12 უპასუხო ქულა აართვა. მთლიანობაში, ჩვენმა მსოფლიოს ჩემპიონმა კარგი მომზადება გამოავლინა, თუმცა გასათვალისწინებელია, რომ ვარშავაში არ შეხვედრია თავის ძირითად კონკურენტებს.

პოლონეთში კენჭაძეც მხოლოდ ყაზახებს შეხვდა: ფინალამდე სამი შეხვედრა მოიგო და სამივე - მათთან. მან დანიარ კაისანოვს 12:5 სძლია, ბოლატ საკაიევს - 10:3, ნურლან ბეკჟანოვს კი 5:0 მოუგო. ფინალში მისი ჩინელი ვეი ვუ იყო, ვინც ოდნავადაც ვერ გამოდგა ჩვენებურის ტოლ-სწორი - 12:1 მოუგო. მოსაგებად ჩვენებურმა ძალიან მარტივი გზა აირჩია - ფეხიდან აჰყავდა და აგდებდა მეტოქეს. ქულები ძირითადად ამ ხერხით მოიპოვა.

97 კილოგრამში ტურნირი წრიული სისტემით ჩატარდა, ოდიკაძე კი პირველ წრეში ყაზახ ნამედ იბრაგიმოვთან 2:2-ზე დამარცხდა. წინასწარ გეტყვით, რომ მოგვიანებით ისინი ფინალშიც შეხვდნენ ერთმანეთს და იქ ჩვენებურმა სრულფასოვანი რევანში აუღო, თუმცა ეს სიტყვა კიდევ ვერ ასახავს იმ უპირატესობას, რაც ქართველს ჰქონდა.

იქამდე ოდიკაძემ ამერიკელი კევინ გადსონი მისთვის ჩვეულ სტილში წმინდად გაანადგურა - 11:0, მერე კი იტალიელი ხესუს რუანოც იმავე სტილში და იმავე ანგარიშით დაამარცხა.

ნახევარფინალში ჩვენებურს უნგრეთში გადაბარგებული უკრაინელი ევროპის ჩემპიონი პავლო ოლეინიკი არ გამოუცხადდა, ხოლო ფინალში რევანშის სურვილით ანთებული უჩვეულოდ მოტივირებული გავიდა იბრაგიმოვთან: თავიდანვე ქორივით დააცხრა მეტოქეს და ამოსუნთქვის საშუალება არ მისცა, ვიდრე მორიგი წმინდა მოგება არ გაიფორმა: 12:0. ჩვენებურს ამ შეხვედრაში ყველაფერი გამოსდიოდა - ჩოქბჯენშიც იოლად ჩაჰყავდა და იქაც ძალზე ადვილად ატრიალებდა.

როგორც გითხარით, ეს ტურნირი ჩვენი ნაკრებისთვის სასტარტო იყო, მაგრამ ორ წონაში შესარჩევიც გახლდათ და იქ მთავარ მწვრთნელ გიორგი იანტბელიძეს რამდენიმე კანდიდატი ჰყავდა წაყვანილი: 79-ში 3 კაცი ჭიდაობდა, 92-ში - ორი. მისმა შეგირდებმა ორივე წონაში მედალი მოიპოვეს, მაგრამ არ ვიცით, რას გადაწყვიტავს იანტბელიძე, ისე კი ამ შედეგებმა თავდაყირა დააყენეს ყველა ადრინდელი გამოსვლა.

79-ში მოულოდნელი სულაც იმიტომაა, რომ ხუციშვილმა 86 კილოგრამიდან დაიკლო. არადა, ამ წონის ლიდერებად შეგულებული ევროპის მესამე პრიზიორი იაკობ მაქარაშვილი და ახალგაზრდა ნიკოლოზ კენჭაძე პირველივე შეხვედრებში დამარცხდნენ, ხუციშვილმა კი მიყოლებით სძლია ფრანგ ჟონი ჟუსტ ბურს - 6:0, ბულგარელ ენგინ რაშიდ ისმაელს - 11:0 და ყაზახ საკენ აიტჟანოვს - 3:0.

ფინალში ჩვენებური, ცოტა არ იყოს, დათრგუნვილი გავიდა რუს მაგომედ რამაზანოვთან საჭიდაოდ. შედეგად, ვერც ჯეროვანი წინააღმდეგობა გაუწია და 0:5-ზე მეტოქემ სულაც ბეჭებზე დადო.

ევროპის ჩემპიონატისთვის მოსამზადებელ ციკლში ირაკლი მწითურმა რამდენჯერმე პირადი შეხვედრა მოუგო მარსაგიშვილს და კონტინენტის პირველობაზეც ის წაიყვანეს.

ვარშავაში პირველივე წრეში - მეოთხედფინალში შეხვდნენ ერთმანეთს და ამჯერად მარსაგიშვილმა დამაჯერებლად მოუგო მწითურს - 5:0. მან უფრო გამოცდილების ხარჯზე აჯობა, მაგრამ კლასითაც დაჯაბნა.

თუმცა, ვფიქრობთ, მარსაგიშვილის მინუსად კვლავაც რჩება ფსიქოლოგია და ხასიათი: მომდევნო პაექრობა 5:10 დათმო რუს ბატირბეკ ცაკულოვთან. ვეჭვობთ, რომ არა რუსი, ის ამ ეტაპსაც გაივლიდა. ყოველ შემთხვევაში, ბრინჯაოსთვის პაექრობაში ყაზახი იერალი აბდრაშევი ასევე სოლიდური უპირატესობით, 10:5 დაჯაბნა.

ვარშავაში ჩვენგან ასევე გამოდიოდნენ ოთარ გოგავა (57), ბექა ლომთაძე, თუმცა ამან ზედა წონაში - 65-ში იასპარეზა, და სანდრო ამინაშვილი (86), თუმცა ისინი პირველივე შეხვედრებში დამარცხდნენ.

ყოველდღიური სპორტული გაზეთი "ლელო"
692
მკითხველის კომენტარები / 0 /
მსგავსი ამბები
რუბრიკის სხვა სიახლეები
;