თავისუფალი ჭიდაობა. ჭაბუკური წარმატება ხარკოვში

საქართველოს თავისუფალი სტილით მოჭიდავე ჭაბუკთა ნაკრებმა წარმატებით იასპარეზა ხარკოვში, უკრაინის სახელოვანი მწვრთნელის - ლეონიდ დუნაის მემორიალში,

სადაც მათთან ერთად უკრაინის რეგიონების გუნდები, საბერძნეთის, გერმანიის, მოლდოვას, სომხეთის, ბელარუსის, ყაზახეთის, ყირგიზეთისა და თურქეთის გუნდები გამოდიოდნენ.

ჩვენი ჭაბუკთა ნაკრების მთავარმა მწვრთნელმა გია კვინიკაძემ ხარკოვში 18 სპორტსმენი წაიყვანა და აქედან ნახევარმა - ცხრამ - მედალი მოიპოვა: 4-4 ოქრო-ბრინჯაო და 1 - ვერცხლი.

ჩემპიონები გიორგი გეგელაშვილი (51), ბაგრატ გაგნიძე (71), გიორგი ჩანქსელიანი (80) და სოლომონ მანაშვილი (110) გახდნენ. კვინიკაძის შეგირდებს მეხუთე ოქროს მოპოვებაც შეეძლოთ, რადგან ფინალში ლუკა ჩხიტუნიძეც (51) გავიდა, თუმცა დამარცხდა და ვერცხლის მედალს დასჯერდა.

მესამე ადგილზე ჯონი ცხადაია (45), შამილ გაჯიევი (48), დავით აბდალაძე (55) და ლუკა მარიამიძე (71) გავიდნენ. გუნდურ ჩათვლაში ჩვენი ნაკრები მეორე ადგილზე გავიდა.

შეგახსენებთ, რომ ჭაბუკებმა ორიოდ დღის წინ ბაქოშიც იჭიდავეს მუშვიგ ისაევის მემორიალში და ორი ბრინჯაო მოიპოვეს, თუმცა კვინიკაძემ იქ სათადარიგო შემადგენლობა გაუშვა, ხარკოვში კი ლიდერები წაიყვანა.

ამ ასაკში ჯერ საქართველოს ჩემპიონატი არ ჩატარებულა და ლიდერებზე საუბარი იქნებ პირობითია, მაგრამ შარშანდელი სეზონის მიხედვით, ჯერჯერობით, წონებში ფავორიტები უფრო ესენი არიან.

ყოველდღიური სპორტული გაზეთი "ლელო"
899
მკითხველის კომენტარები / 0 /
მსგავსი ამბები
რუბრიკის სხვა სიახლეები
;