თავისუფალი ჭიდაობა: ხინჩეგაშვილიც, იაკობაშვილიც, პეტრიაშვილიც...

დადგინდა თავისუფალ ჭიდაობაში საქართველოს ჩემპიონატის გამართვის ზუსტი თარიღი: ამ პრესტიჟულ შეჯიბრებას 23-26 დეკემბერს დიღომში, ოლიმპიურ პარკში მდებარე ფრენბურთის სასახლე უმასპინძლებს. 23-ში ჭიდაობის ფედერაციაში აწონა გაიმართება, ჭიდაობებს კი მომდევნო სამი დღე დაეთმობა.

ჩემპიონატი ახალი წესებით ანუ ორდღიანი ფორმატით ჩატარდება, თუმცა ეს არცთუ შორეული წარსულის სისტემაა, როცა ნახევარფინალების ჩათვლით ასპარეზობები პირველ დღეს ტარდება, დამამშვიდებელი წრის შეხვედრები და ფინალური პაექრობები კი მეორე დღეს იმართება.

თუმცა სიახლე მხოლოდ ფორმატს არა, წონით კატეგორიებსაც ეხება და აქაც ახლებური მიდგომა იმოქმედებს: ჩემპიონატი ადრინდელი რვის ნაცვლად 10 წონით კატეგორიაში გაიმართება, რადგან, მოგეხსენებათ, მსოფლიოს ფედერაციამ ამ კუთხითაც შემოიტანა ცვლილება დ ადრინდელ რვა წონას ორი ახალიც დაუმატა. თუმცა ოლიმპიადის პროგრამაში კვლავინდებურად 6 წონითი კატეგორია იქნება. თანაც - ისევ ადრინდელი ექვსეული, ამ მხრივ არაფერი შეცვლილა.

ნაკრების მთავარი მწვრთნელის - გიორგი იანტბელიძის გადაწყვეტილებით, ქვეყნის ჩემპიონატში ყველა ტიტულოვანი და წამყვანი ფალავანი მიიღებს მონაწილეობას, არავის არ ასვენებს: ევროპის სამგზის, ოლიმპიური და მსოფლიოს ჩემპიონი ვლადიმერ ხინჩეგაშვილი (61), მსოფლიოს მოქმედი ჩემპიონები, ზურაბ იაკობიშვილი (70), გენო პეტრიაშვილი (125) თუ სხვები უკლებლივ ყველანი იასპარეზებენ. შიდა ჩემპიონატი გაისად ჩასატარებელი ევროპის პირველობისთვის ერთ-ერთი მთავარი შესარჩევი შეჯიბრებაა.

რაც შეეხება ბერძენ-რომაელთა პირველობას, მისი ჩატარება გაისად, 8-12 იანვარსაა დაგეგმილი. ისიც ახალი ანუ ორდღიანი ფორმატით, ახალ წონებში გაიმართება, თუმცა ბერძენ-რომაელები ჭიდაობის წესებში შესატან მორიგ ცვლილებებსაც ელოდებიან.

წესით, ისინი აქამდეც უნდა დამტკიცებულიყო, მაგრამ ფედერაციაში ოფიციალურად არაფერი მოსულა. ერთხანს კი ელოდებოდნენ ზემდგომთაგან ოფიციალურ შეტყობინებას, მაგრამ ბოლოს ამ დაუსრულებელ ლოდინს, შიდა პირველობის ჩატარება ამჯობინეს.

წინასწარი მონაცემებით, იქაც უძლიერესი შემადგენლობა უნდა გამოვიდეს. წესით, მაყურებელს ორივე სახეობაში კარგი სანახაობა ელოდება ამდენი ვარსკვლავის ერთად ხილვით.

ყოველდღიური სპორტული გაზეთი "ლელო"
900
მკითხველის კომენტარები / 0 /
მსგავსი ამბები
რუბრიკის სხვა სიახლეები