თავისუფალი ჭიდაობა. ხუთეულიდან მხოლოდ ბრინჯაოს შანსი

ესპანურ პონტევედრაში მიმდინარე ახალგაზრდა მოჭიდავეთა ევროპის ჩემპიონატში დღეს თვისუფალი სტილით მოჭიდავეები ჩაებნენ, თუმცა ჩვენს ნაკრებს არცთუ წარმატებული სტარტი გამოუვიდა - ჩემპიონატში ჩაბმული ხუთი ათლეტიდან მედლისთვის ბრძოლას მხოლოდ ერთი აგრძელებს და ისიც - ბრინჯაოსთვის. ესაა ამირან ვახტანგაშვილი (65), ვინც პირველივე ბრძოლაში დამარცხდა აზერბაიჯანელ თურან ბაირამოვთან - 1:2, მოგვიანებით კი რაკი აზერბაიჯანელი ფინალში გავიდა, ჩვენებურიც სანუგეშო წრეში გადავიდა. იქ ხვალ საღამოს ჯერ ფრანგ მარვანე აჰმედ იეზას გაეჯიბრება, ხოლო მოგების შემთხვევაში ბრინჯაოს მედლისთვის მოლდოველ ნიკოლაი გრამეზს დაეჯიბრება.

თითო შეხვედრა მოიგეს ოთარ ბაგაურმა (70), ბაგრატ გაგნიძემ (79) და ელგუჯა ბალანჩივაძემ (97). ბაგაურმა საკვალიფიკაციოში უკრაინელ ანდრიი ნუჰუმანოვს წმინდად, 10:0 აჯობა, თუმცა შემდეგ თურქ ომერ ფარუკ ჯაირთან 5:8 დათმო. გაგნიძემ მერვედფინალში ავსტრიელი ბენჟამინ გრაილი 5:4 დაჯაბნა, მაგრამ მომდევნო პაექრობა 1:11 დათმო ესტონელ ერიკ რაინბოკთან. ბალანჩივაძემ ასევე საკვალიფიკაციოში 10:7 აჯობა სლოვაკ ვილიამ ოროსს, მერე კი 0:10 წააგო უნგრელ არტურ ვეგთან. საბოლოოდ არც ერთ მათგანს არ მიეცა დამამშვიდებელ წრეში გადასვლის შანსი.

გიორგი ნიშნიანიძემ (57) პირველივე პაექრობა დათმო უკრაინელ კარიმ კერიმოვთან - 2:12 და მერე სანუგეშოში გადასვლის საშუალებაც აღარ მიეცა.
ხვალ პონტევედრაში წინასწარი ეტაპის ორთაბრძოლებს მორიგი ხუთეული გამართავს. გიორგი ძებისაშვილი (61) მერვედფინალში შვეიცარიელ ნინო ლუტერტს გაეჯიბრება, მოგების შემთხვევაში კი მეტოქედ თურქ ჰამზა ალაჯასა და ულადისლაუ ჩუკოს შორის გამარჯვებული ეყოლება.
გოგა მამიაური (79) საკვალიფიკაციოში სომეხ ჰრაირ ალიხანიანს ხვდება, ხოლო თუ მოუგებს, მეოთხედფინალში გავა, სადაც ბელარუს დავიდ ალიზალაუსა და უკრაინელ იევჰენი დუბოვის წყვილიდან უძლიერესს შეხვდება.

ჭაბუკებში მსოფლიოს ჩემპიონი მირიან მაისურაძე (86) პირველ შეხვედრაში აზერბაიჯანელი ფუად მაილოვის ძლევას შეეცდება, მიზნის მიღწევის შემთხვევაში კი მოლდოველ ივან ნედეალკოს ან ჩეხ ვოიტეხ პისკორს შეხვდება.

დავით ქოჩქიანი (92) საკვალიფიკაციოდან ჩაებმება ჩემპიონატში, სადაც წილისყრამ კონკურენტად თურქი პოლატ პოლაჩი არგუნა. ამ წყვილის გამარჯვებულიც მეოთხედფინალში გავა, სადაც უკრაინელ ანდრი ჰიკასა და ბელარუს ანდრეი პარხომენკას დუეტიდან უძლიერესი შეხვდება.
დაბოლოს, მძიმეწონოსანი ვასილ ხვისტანი, ვინც საკვალიფიკაციოდან თავისუფალია და პირდაპირ მეოთხედფინალშია. იქ მეტოქედ უკრაინელი იური იძინსკი ჰყავს, ხოლო ნახევარფინალში გასვლისას უნგრელ მარკ მარტონს ან ბელარუს მიკიტა ჰორჰუნს შეხვდება.

512
მკითხველის კომენტარები / 0 /
მსგავსი ამბები
რუბრიკის სხვა სიახლეები
;