თავისუფალი ჭიდაობა. 2 მედალი და 4 შანსი ევროპის ჩემპიონატზე

ბუქარესტში მიმდინარე თავისუფალი სტილით მოჭიდავეთა ევროპის ჩემპიონატზე გუშინდელი დღე ჩვენი ნაკრებისთვის პირველზე უფრო წარმატებული გამოდგა:

გუშინ ფინალურ ბლოკში გამოსვლა ბრინჯაოსთვის მოჭიდავე ორივე ჩვენებურმა წარმატებით დაამთავრა და ნაკრებმა ბრინჯაოს ორი მედალი მოიპოვა, ხოლო სტარტზე გასული მორიგი ხუთი ქართველიდან ორი ფინალში გავიდა, ორი კი ბრინჯაოსთვის აგრძელებს ჭიდაობას. თანაც ერთი პირდაპირ დამამშვიდებლის ფინალშია გასული და დღეს საღამოს პირდაპირ ბრინჯაოსთვის იასპარეზებს.

გუშინ ევროპის მესამე პრიზიორები დებიუტანტი ნიკა კენჭაძე (79) და ელიზბარ ოდიკაძე (97) გახდნენ, ხოლო ფინალში ბექა ლომთაძე (61) და გენო პეტრიაშვილი (125) გავიდნენ. გუშინვე ნახევარფინალში ირაკლი მწითურიც (92) გავიდა, მაგრამ დამარცხდა და დღეს ბრინჯაოს მოპოვებას შეეცდება. დამამშვიდებელშია გადასული მსოფლიოს მოქმედი ვიცე-ჩემპიონი ავთანდილ კენჭაძე (74), ვისაც ბრინჯაოს მოპოვებამდე ორი გამარჯვებაღა აშორებს. სამწუხაროდ, მსოფლიოსა და ევროპის მესამე პრიზიორმა სანდრო ამინაშვილმა (86) მედლის მოპოვების ყველა შანსი დაკარგა.

ამასთან, გუშინ ჩვენებმა ყველა ოლიმპიურ წონაში მინსკის მეორე ევროპული თამაშების ლიცენზიებიც მოიპოვეს, საგზურს კი საუკეთესო 15 კაცს შორის მოხვედრა იძლეოდა.

ბრძოლა მედლებისთვის

23-წლიანებში მსოფლიოს ჩემპიონმა კენჭაძემ გუშინ ორი შეხვედრა ჩაატარა დამამშვიდებელში - ჯერ გერმანელი ფრანკო მარიო ბუტნერი დაჯაბნა იოლად, 7:2, ბრინჯაოსთვის შეხვედრაში კი ბელარუს ანდრეი კარპაჩსაც თითქმის იმავე ანგარიშით, 7:1 აჯობა და ეროვნულ ნაკრებში პირველი მედალი მოიპოვა.

რაც შეეხება ამ წონის ფინალს, ის კენჭაძის მომგებმა აზერბაიჯანელთა თალიშმა მსოფლიოს ფინალისტმა და ოლიმპიურმა პრიზიორმა ჯაბრაილ ჰასანოვმა მოიგო - რუსთა დაღესტნელი ახმედ გაზიმაგომედოვი ბეჭებზე დააწვინა. ამდენად, კენჭაძემ ის ერთადერთი შეხვედრა მომავალ ჩემპიონთან წააგო.

ოდიკაძე პირდაპირ ბრინჯაოსთვის ჭიდაობდა მოლდოველ ევროპის პრიზიორ ნიკოლაი ცებანთან და 3:0 მოუგო. ოდიკაძისთვის ეს მეოთხე ევროპული ბრინჯაო, სულ კი მეხუთე ევროპული მედალია. შეგახსენებთ, რომ ის მსოფლიოს შარშანდელი მესამე პრიზიორიცაა. ამ წონას კი ვინ მოიგებდა, თუ არა „რუსულ ტანკად“ წოდებული რუსთა დაღესტნელი ოლიმპიური, მსოფლიოსა და ევროპის ჩემპიონი აბდულრაშიდ საადულაევი, თუმცა „ტანკი“ თითქოს ძველებურად მრისხანე ვეღარ იყო და ფინალში ოდიკაძის მძლეველ ბელარუს ალექსანდრ ჰუშტინს მხოლოდ 3:1 მოუგო.

ფინალური ბლოკის კვარტეტი

გუშინ ჩვენი ყურადღება ყველაზე მეტად მძიმე წონის გენო პეტრიაშვილისკენ იყო მიპყრობილი, თუმცა მას კარგი წილისყრა ჰქონდა: რაკი თურქთა ოლიმპიური ჩემპიონი, მსოფლიოს ორგზის და ევროპის ექვსგზის გამარჯვებული ტაჰა აკგული ბადის მეორე მხარეს იყო, ჩვენებურისგან ფინალში გაუსვლელობა სენსაციაზე მეტი იქნებოდა.

საბედნიეროდ, პეტრიაშვილმა ბოლომდე გაგვიმართლა იმედები და დღეს ფინალში იჭიდავებს სწორედ აკგულთან. შეიძლება მას არ უჭიდავია ისეთ სტილში, ლეიბზე ცეცხლს რომ ანთებენ და ბობოქრობენ, მაგრამ სამივე შეხვედრა დამაჯერებლად მოიგო და გამარჯვება არც ერთხელ არ გაუხდია საეჭვო. პირიქით - ყველასთან სოლიდურ უპირატესობას ფლობდა:

საკმაოდ ძლიერი უნგრელი, ევროპის ფინალისტი და ორგზის მესამე პრიზიორი დანიელ ლიგეტი არც ამჯერად გაახარა და 7:4 მოუგო, პოლონელი რობერტ ბარანიც თითქოს როგორღაც თამაშ-თამაშ დაამარცხა გვარიანი უპირატესობით - 10:2, ნახევარფინალში კი ბოლო წაგებებისთვის რევანში აუღო უკრაინელ ალექსანდრ ხოციანოვსკის: 3:2.

ამ წონაში ევროპის შარშანდელი პირველობის ფინალი მეორდება - ერთმანეტს კვლავაც პეტრიაშვილი და აკგული შეხვდებიან. შეგახსენებთ, რომ შარშან დაღესტნურ კასპიისკში გამართული ის ფინალი თურქმა მოიგო, რითაც ჩვენებურს საბოლოოდ დუბლი ჩაუშალა.

ლომთაძეს ფინალში გასასვლელად ორი შეხვედრის მოგება ეყო, რადგან საკვალიფიკაციო ეტაპზე ისვენებდა. მან ჩვეულად ლამაზად, ტექნიკურად და სანახაობრივად იჭიდავა: ორივე შეხვედრა წმინდად, ქულათა დიდი უპირატესობით მოიგო და თან თავად ერთი ქულაც არ დაუკარგავს. ევროპის შარშანდელმა ფინალისტმა მაკედონიელ ელმედინ სეიფულაუსაც და შვეიცარიელ რანდუ ადრიან ვოკსაც ერთნაირი ანგარიშით, 10:0 აჯობა.

ლომთაძე მესამედ გადის ევროპირველობის ფინალში. ამჯერად მის შანსებს ისიც ზრდის, რომ იქ არც აზერბაიჯანელს და მეტადრე - რუსს არ ხვდება: ბაქოელი ასგარ მამადალიევიც და რუსი მაგომედრასულ იდრისოვიც საკვალიფიკაციოდან გამოვარდნენ, ჩვენებურს კი ფინალში მეტოქედ სომეხი არსენ ჰარუთინიანი ეყოლება, ვინც ახალგაზრდებში ევროპის შარშანდელი ჩემპიონი და მსოფლიოს პრიზიორია.

როგორც გითხარით, გუშინ ჩვენებიდან ნახევარფინალში მწითურიც გავიდა, ვინაც ევროპირველობაზე შარშანაც ბრინჯაოსთვის იჭიდავა. ალბათ, ქომაგებს ახსოვთ მაშინდელი დასანანი მარცხი უკრაინელ კირილ მიშკოვთან, როცა თავისივე გამოუცდელობით სოლიდური უპირატესობა გაანიავა და ლამის მოგებული შეხვედრა წააგო.

ამჯერად ამ წონაში სულ 12 მონაწილეა, 23-წლიანებში ევროპისა და მსოფლიოს ფინალისტი მწითური კი საკვალიფიკაციო ეტაპიდანაც თავისუფალი იყო. ამიტომ ის ერთი მოგებით გავიდა ნახევარფინალში - რუმინელ ადრიან რეკორეანუს 7:0 მოუგო. ქართველი ფალავანი აზერბაიჯანელთა ოლიმპიურსა და მსოფლიოს ჩემპიონ შარიფ შარიფოვთან 2:8 დამარცხდა და ახლა ნუგეშად ბრინჯაოს მოპოვება რჩება, რაც მისთვის პირველი მედალი იქნება ეროვნულ ნაკრებში. თუმცა ეს არ იქნება იოლი საქმე, რადგან მეტოქედ რუსთა დაღესტნელი მაგომედ ყურბანოვი ჰყავს.

ავთანდილ კენჭაძე ისეთ ფალავანთან დამარცხდა, ძნელად თუ დავძრახავთ - ევროპის შარშანდელ ფინალისტთან, ფრანგთა დაღესტნელ ზელიმხან ხაჯიევთან. მართალია, თვითონაც მსოფლიოს ფინალისტია, მაგრამ ხაჯიევი ნამდვილად არაა ხელწამოსაკრავი, რაზეც გუშინაც ვწერდით. თანაც თანაბარ ბრძოლაში დამარცხდა. აი, ჩვენებურს რომ ვინმე საშუალო ყალიბრის ფალავანთან წაეგო, მაშინ სულ სხვა იქნებოდა...

კენჭაძე საკვალიფიკაციოშივე ჩაება შეჯიბრებაში და სომეხი ვარუჟან კაჯოიანი აოტა - სუფთად, 10:0 მოუგო. თურქი ევროპისა და მსოფლიოს ფინალისტი იაკუპ გორიც ასეთივე ანგარიშით დაამარცხა, მერე კი ხაჯიევთან 3:3-ზე დამატებითი მაჩვენებლებით დამარცხდა... ჩვენებურს ბრინჯაოს მოსაპოვებლად დამამშვიდებელში ერთი ამხელა გზის გავლა ისევ მოუწევს: ჯერ ესტონელ აიმარ ანდრუსესა და ავსტრიელ სიმონ მარჩლს შორის გამარჯვებულს უნდა აჯობოს, მერე კი - უკრაინელ ვასილ მიხაილოვსაც. ამათში არც ერთი არაა კენჭაძის დონისა, თუმცა დაველოდოთ მოვლენათა განვითარებას.

რაც შეეხება ამინაშვილს, სლოვაკ ბორის მაკოევს 4:1 მოუგო, მაგრამ ყველასათვის მოულოდნელად, 2:3 დამარცხდა სანმარინოელ მილეს ამინესთან.

55 კგ.
1. სულეიმან ათლი (თურქეთი); 2. მუსლიმ სადულაევი (რუსეთი); 3. ვლადიმერ ეგოროვი (მაკედონია), მაჰირ ამირასლანოვი (აზერბაიჯანი); 15. ოთარ გოგავა (საქართველო).

65 კგ.
1. ჰაჯი ალიევი (აზერბაიჯანი); 2, სალაჰედდინ კილიჯსალაიანი (თურქეთი); 3. ვასილ შუპტარი (უკრაინა), ნაჩინ კუულარი (რუსეთი); 9. ვლადიმერ ხინჩეგაშვილი (საქართველო).

70 კგ.
1. მუსტაფა კაია (თურქეთი); 2. აგაჰუსეინ მუსტაფაევი (აზერბაიჯანი); 3. მაგომედრასულ გაზიმაგომედოვი (რუსეთი), მაგომედმურად გაჯიევი (პოლონეთი); 13. ზურაბ იაკობიშვილი (საქართველო).

79 კგ.
1. ჯაბრაილ ჰასანოვი (აზერბაიჯანი); 2. ახმედ გაზიმაგომედოვი (რუსეთი); 3. ნიკა კენჭაძე (საქართველო), მუჰამედ ნური კოტანოღლუ (თურქეთი).

97 კგ.
1. აბდულრაშიდ სადულაევი (რუსეთი); 2. ალექსანდრ ჰუშტინი (ბელარუსი); 3. ელიზბარ ოდიკაძე (საქართველო), ნურმაგომედ გაჯიევი (აზერბაიჯანი).

ყოველდღიური სპორტული გაზეთი "ლელო"
531
მკითხველის კომენტარები / 0 /
მსგავსი ამბები
რუბრიკის სხვა სიახლეები
;