თავისუფალი ჭიდაობა. 23-წლამდელები: თასი ფავორიტებს ელოდება

დიღომში, ოლიმპიურ პარკში მდებარე ფრენბურთის არენაზე გუშინ დაიწყო საქართველოს თასის გათამაშება თავისუფალ ჭიდაობაში 23-წლიანთა შორის, რომელიც, არსებითად, საქართველოს ჩემპიონატია.

ტურნირში ამ ასაკის ყველა უძლიერესი ფალავანი გამოდის. მათ შორის - მსოფლიოს ჩემპიონები, ძმები ავთანდილ (74) და ნიკა კენჭაძეები (79) და გივი მაჭარაშვილი (97). გუშინ ამათგან ნიკამ და მაჭარაშვილმა იჭიდავეს და ორივე ფინალშია გასული.

ზოგადადაც, თასის გათამაშება სენსაციების გარეშე მიმდინარეობს და ფავორიტები წინ მიიწევენ. გუშინ ასპარეზობები ხუთ წონით კატეგორიაში - 57, 65, 70, 79 და 97 კილოგრამებში გაიმართა. ოღონდ ჩატარდა მხოლოდ წინასწარი ეტაპის შეხვედრები და გამოვლინდნენ ფინალისტები, დამამშვიდებელი ეტაპის შეხვედრები და ფინალები კი დღეს გაიმართება 18 საათიდან.

გუშინ ყველა წონაში საინტერესო პაექრობები გაიმართა და, როგორც გითხარით, ყველაფერი ძირითადად ლოგიკურად წარიმართა. შედარებით გასაკვირი მხოლოდ 57-ის საქმეა, სადაც ფინალში თბილისელი გიორგი ღონიაშვილი და ყვარლელი რობერტ დინგაშვილი იჭიდავებენ. მართალია, სპეციალისტებისთვის უცხო არც ერთი არაა და არ ვამბობთ, რომ მათი ფინალისტობა მოულოდნელია, მაგრამ ასევე მოულოდნელია სამტრედიელი გოგა ძიგუას მარცხიც - ის მეოთხედფინალში ღონიაშვილთან დამარცხდა და დღეს საღამოს ბრინჯაოსთვის გააგრძელებს ბრძოლას. ღონიაშვილმა ძიგუას შემდეგ საჩხერელ ნიკა ზაქაშვილსაც მოუგო, დინგაშვილმა კი, ვინც ასევე ასაკობრივების ლიდერია, თანარაიონელი შამილ გაჯიევი, გორელი დავიდ მიკიჩიანი და ნინოწმინდელი ნარიბეკ ოგანესიანი დაამარცხა.

65 კილოგრამში ფინალში გორელი ამირან ვახტანგიშვილი და სამტრედიელი ედემი ბოლქვაძე იჭიდავებენ, რაც სრულიად ლოგიკურად მიგვაჩნია - ორივე ანგარიშგასაწევია ახალ თაობაში, ბოლქვაძეს კი ახალგაზრდებში საერთაშორისო რანგის წარმატებებიც მოეპოვება. მან ფინალამდე დედოფლისწყაროელი გელა ქოქიაშვილი, ყვარლელი ნიკა ბუშელაშვილი და გორელი დავით ფაცინაშვილი დაამარცხა, ვახტანგიშვილმა კი გზიდან აჭარის ნაკრების წევრი ჯონი დიასამიძე, სამტრედიელი გია უღრელიძე და გორელი ნიკა კვინიკაძე ჩამოიშორა.

ვფიქრობთ, საინტერესო ფინალი უნდა გაიმართოს 70 კილოგრამში სამტრედიელ ივერიკო ჯულაყიძესა და ქუთაისელ მეკი სიმონიას შორის. ისინი ჭაბუკობიდანვე ერთად მოდიან, სადაც ერთხანს ერთ წონაშიც კი გამოდიოდნენ. მას მერე სხვადასხვა წონებში ჭიდაობენ, მაგრამ ასაკობრივ ნაკრებებში სულ ერთად ჩანდნენ, ახლა კი მათი გზები ისევ გადაიკვეთა. ორივე საკმაოდ ტიტულოვანია და ვნახოთ, როგორ წარიმართება მათი უშუალო პაექრობა.

ფინალამდე სხულუხიამ თბილისელები - გიორგი გვიანიძე, ფერხად აგაჯანოვი და ამბროლაურელი გიორგი ელბაქიძე ჩამოიშორა, ჯულაყიძემ კი ასევე სამტრედიელ გია ავალიანს, ონელ გიორგი ბენდიანიშვილს და ყვარლელ მაგამედ საიდოვს სძლია.

ამ წონაში ცოტა გასაკვირია სამტრედიელი შმაგი თოდუას წარუმატებლობა, ვინც მეოთხედფინალში დამარცხდა ელბაქიძესთან და ვეღარც მედლისთვის აგრძელებს ბრძოლას.

ნიკა კენჭაძემ დამაჯერებლად იჭიდავა და დამსახურებულად გავიდა ფინალში, სადაც მეტოქედ თბილისელი ტარიელ გაფრინდაშვილი ეყოლება, ვინც ასევე გამორჩეულია ახალ თაობაში. კენჭაძემ გზიდან თბილისელი გიორგი მებურიშვილი და ქარელელი ლაშა ბაირამოვი ჩამოიცილა, გაფრინდაშვილს კი კონკურენტებად ქუთაისელი ბაგრატ გაგნიძე, აჭარის ნაკრების წევრი გიგა ტარიელაძე და ხარაგაულელი ევსემი შველიძე ჰყავდა. მისი მეტოქეებიდან გაგნიძე გამოირჩევა, თუმცა ის ჯერ ასაკით პატარაა და ალბათ, ამით აიხსნება მისი მარცხი.

დაბოლოს, 97 კილოგრამი, სადაც მაჭარაშვილი თბილისელ ბექა ჭელიძეს დაეჭიდება. მაჭარაშვილმა გუშინ თბილისელი როლანდ მანაშვილი და რუსთაველი ვიტალი ლობჟანიძე დაამარცხა, ჭელიძემ კი ქუთაისელი გელა ბურჯანაძე და გორელი გიორგი მაჭარაშვილი დაჯაბნა, რითაც მაჭარაშვილების ფინალები ჩაშალა.

ყოველდღიური სპორტული გაზეთი "ლელო"
740
მკითხველის კომენტარები / 0 /
მსგავსი ამბები
რუბრიკის სხვა სიახლეები
;