თავისუფალი ჭიდაობა: 3 ბრინჯაო და 4 მედლის მოლოდინი

საქართველოს თავისუფალი სტილით მოჭიდავეთა ნაკრებმა დღეს დაღესტნურ კასპიისკში მიმდინარე ევროპის ჩემპიონატზე ბრინჯაოს სამი მედალი მოიპოვა, რაც ვლადიმერ ხინჩეგაშვილის (65), ზურაბ იაკობიშვილის (70) და ელიზბარ ოდიკაძის (97) დამსახურებაა.

ხვალ ჩვენს ნაკტრებს ამ სედეგის მკვეთრად გაუმჯობესება შეუძლია - რაოდენობრივადაც და ხარისხობრივადაც, რადგან 2 მონაწილე ფინალში გვყავს, კიდევ ორი კი პირდაპირ დამამშვიდებლის ფინალშია გასული და ბრინჯაოსთვის იჭიდავებენ. ხვალ ფინალში ბექა ლომთაძე (61) და გენო პეტრიაშვილი (125) იჭიდავებენ, ბრინჯაოს მოპოვებას კი სანდრო ამინაშვილი (86) და დებიუტანტი ირაკლი მწითური (92) შეეცდებიან.

ოლიმპიურმა და მსოფლიოს ჩემპიონმა, ევროპის სამგზის გამარჯვებულმა ხინჩეგაშვილმა (სხვათა შორის, მოპოვებული მედლების რაოდენობით ის ევროპირველობის ყველაზე ტიტულოვანი მოჭიდავეა) ბრინჯაოსთვის შეხვედრაში პოლონელი კრშიშტოფ ბიენკოვსკი 8:4 დაამარცხა.

არადა, ჩვენებურმა თავის სტილში დაიწყო ჭიდაობა - 0:4 ჩამორჩა და მერე დაატრიალა გრიგალი ლეიბზე. იმ ეპიზოდში ხინჩეგაშვილი შეცდა და მეტოქე იოლად შეუშვა ფეხში. სამაგიეროდ, მერე ჩაატარა თავდაცვის გაკვეთილი, ისე მოხდენილად გაურბოდა, არ აძლევდა გდების გაკეთების საშუალებას, არც ზონიდან გადიოდა.

⇒ლადო ხინჩეგაშვილი ევროპის ჩემპიონობისთვის ბრძოლას გამოეთიშა

თუმცა ბოლომდე მაინც ვერ მოახერხა თავის დაცვა და ლამის მთელი ხალიჩის შემოვლის შემდეგ პოლლონელმა მაინც მოახერხა ფეხის გამოკვრა და 4-ქულიანზე გადააგდო. ოღონდ ჩამორჩენის აღმოფხვრა ხომ ხინჩეგაშვილის სტილია და მალევე ჩადგა თავის სტიქიაში: ჯერ დაბლა ლეიბზე გამართულ ტაქტიკურ ჯაჯგურში მხოლოდ მან რომ იცის, ისე მოხერხებულად ამოუძვრა პოლონელს და ჩობჯენში გადაიყვანა, თან ამას დატრიალებაც მიაყოლა და ანგარიში გაათანაბრა: 4:4.

ოღონდ ეს ანგარიში ჯერ მაინც ბიენკოვსკის აძლევდა ხელს, რადგან უფრო მაღალი ხარისხის ქულა ჰქონდა. თუმცა, არსებითად, შეხვედრის სამომავლო სცენარიც გამოიკვეთა და ცხადი იყო, ორთაბრძოლის სადავეები ჩვენებურმა იგდო ხელთ. მართლაც დიდი დრო არ დასჭირვებია, როცა ისევ ჩაიყვანა დაბლა და დაატრიალა, რითაც ანგარიში 8;4 გახადა და ბოლომდეც შეინარჩუნა. ეს ხინჩეგაშვილის პირველი მედალია ახალ წონით კატეგორიაში.

მსოფლიოს ჩემპიონმა იაკობიშვილმა უფრო აკადემიურად, ტაქტიკურად იჭიდავა უკრაინელ ანდრეი კვიატკოვსკისთან, ვიდრე - ტექნიკურად და თვალსასეიროდ. მან შეხვედრა 2:0 მოიგო. აქედან პირველი ქულა მეტოქის წრიდან გაყვანისტვის მიიღო, მეორე კი - მისი პასიურობის ხარჯზე, როცა უკრაინელს 30-წამიანი საჯარიმო დრო ჩაურთეს, მაგრამ ვერ გამოიყენა, ქულა ვერ გააკეთა.

თუმცა ამ შეხვედრაში იაკობიშვილის ტაქტიკური ბრძოლის უნარიც გამოჩნდა - ხომ თითქოს არ უტევდა, არც მაღალ ტემპს სთავაზობდა მეტოქეს, უფრო დაცვიდან ჭიდაობდა, მაგრამ მსაჯი ერთხელაც ვერ მიედავა პასიურობას. პირიქით - ბევრის მთქმელია ის ფაქტი, როცა უკრაინელი 0:1 აგებდა, პასიურობისთვის საჯარიმო დრო მას ჩაურთეს. მაშინაც გააქტიურება უფრო კვიატკოვსკის მართებდა, მაგრამ იაკობიშვილმა ისე მჭიდროდ შებოჭა, გასაქანი არ მისცა და მეტოქის ილეთის ერთი იოტისოდენა შანსიც არ ჰქონია.

ბრინჯაოსთვის შეხვედრაში ოდიკაძემაც უკრაინელი დაამარცხა, ოღონდ - იქაური ქართველი, მურაზ მჭედლიძე. ის ნამდვილად პერსპექტიული სპორტსმენია, მაგრამ ოდიკაძე რეალურად უფრო ძლიერია და არ გასჭირვებია მასთან სუფთა გამარჯვების მოპოვება.

დღევანდელი ფინალებიდან გამოვარჩევთ 57-ის გადამწყვეტ შეხვედრას, სადაც ქართველმა მართლაც რომ ივაჟკაცა, თუმცა ვაგლახ, მისი ეს გმირობა აზერბაიჯანს ჩაეთვალა და არა ჩვენ: გიორგი ედიშერაშვილმა დასრულებამდე 5-ოდე წამით ადრე ჩინებულ 4-ქულიანზე ამოჰკრა სწორედ დაღესტანელთა კუმირ ზავურ უგუევს და 4:3 დაწინაურდა.

არ ვიცი, რისი იმედით (ალბათ, თავიანთი ქეისების და გავლენიანი მფარველების), მაგრამ რუსებმა გააპროტესტეს ანგარიში, თუმცა მსაჯებმა არ დააკმაყოფილეს და ედიშერაშვილს კიდევ ერთი ქულა დაუმატეს. საბოლოოდ 5:3 მის სასარგებლოდ. ედიშერაშვილი ზედიზედ მეორედ, სულ კი კარიერაში მესამედ გახდა ევროპის ჩემპიონი. აქედან პირველი ჩემპიონობა მან საქართველოს სახელით მოიპოვა 2013 წელს.

დღეს აზერბაიჯანელებმა 65 კილოგრამის ფინალშიც დაამწუხრეს დაღესტანელები, როცა ხინჩეგაშვილის მარადიულმა კონკურენტმა ჰაჯი ალიევმა ასევე ბოლო წამებზე დრამატულ პაექრობაში დაამარცხა სწორედ კასპიისკელი ილიას ბეკბულატოვი, ვინც წინასწარ შეხვედრებში ხინჩეგაშვილი დაგვიმარცხა.

მოლოდინისამებრ, პეტრიაშვილი ოფლის დაუღვრელად გავიდა ფინალში, რადგან ორივე შეხვედრა წმინდად, ქულათა დიდი უპირატესობით, ქულის დაუკარგავად მოიგო საერთო ანგარიშით 21:0. მან ავსტრიელ იოჰანეს ლუდეშერს 11:0, ხოლო პოლონელ რადოსლავ ბარანს 10:0 მოუგო.

ფინალში მისი მეტოქე ზეტიტულოვანი თურქი ტაჰა აკგულია, ვინც უმძიმესი ბრძოლები გადაიხადა ბელარუს იბრაჰიმ საიდაუსთან, აზერბაიჯანელთა მსოფლიოს ფინალისტ ჯამალედდინ მაგომედოვთან და რუს მურადინ კუშხოვთან. თურქმა ფიზიკურად ვერ დატოვა კარგი შთაბეჭდილება და, იმედია, პეტრიაშვილი გაიმეორებს მსოფლიოს შარშანდელი ფინალის შედეგს.

ფინალამდე ლომთაძემაც ორი შეხვედრა ჩაატარა და ორივე დიდი ანგარიშით მოიგო: რუმინელ ივან გუიდეას 11:0, ხოლო აზერბაიჯანელ მირჯალალ ჰასან ზადას 12:0 სძლია. სამაგიეროდ, მას ფინალში ჰყავს ძალიან ძლიერი კონკურენტი, რუსთა კიდევ ერთი დაღესტანელი - ჰაჯიმურად რაშიდოვი.

ევროპისა და მსოფლიოს პრიზიორი ამინაშვილი და მწითური ნახევარფინალში დამარცხდნენ. პირველმა აზერბაიჯანელ ალექსანდრ გოსტიევთან წააგო, მეორემ კი `რუსულ ტანკად~ წოდებულ დაღესტანელ ავარასთან, ოლიმპიურ, მსოფლიოსა და ევროპის ჩემპიონ აბდულრაშიდ სადულაევთან.

1343
მკითხველის კომენტარები / 0 /
მსგავსი ამბები
რუბრიკის სხვა სიახლეები
;