თავისუფალი ჭიდაობა. 6 ოქრო ბულგარეთიდან!

წაუგებლად აგრძელებს ასპარეზობას საქართველოს თავისუფალი სტილით მოჭიდავეთა ნაკრები ბულგარეთში მიმდინარე 23-წლამდელთა საერთაშორისო ტურნირზე. პირველი დღის მსგავსად, ჩვენმა ფალავნებმა მეორე დღეც 100-პროცენტიანი შედეგით დაასრულეს - გვყავს სამი ჩემპიონი და კიდევ სამი ფინალისტი, რომელიც 10 თებერვალს ოქროს მედლისთვის იბრძოლებს.

ტურნირის გამარჯვებულები გახდნენ რობერტ დინგაშვილი (57 კგ), ედემი ბოლქვაძე (65 კგ) და გიორგი სულავა (74 კგ). დინგაშვილმა წმინდად მოუგო რუმინელ რაზვანს, ბოლქვაძემ აშკარა უპირატესობით (10:0) დაამარცხა ბულგარელი ბადაროვი, სულავამ კი დაძაბულ ბრძოლაში ბოლო ქულის ხარჯზე სძლია მსოფლიოს მოქმედ ჩემპიონს 23-წლამდელთა შორის, სლოვაკეთის წარმომადგენელ ტაიმურაზ სალკაზანოვს.

შეგახსენებთ, რომ პირველ დღეს ჩემპიონები გახდნენ ივერი ჯულაყიძე (70 კგ), ტარიელ გაფრინდაშვილი (79 კგ) და დემურ მეგენეიშვილი (92 კგ).

ხვალ შეჯიბრის ბოლო დღეს ფინალში კიდევ სამი ქართველი ფალავანი შეეცდება ოქროს მედლის მოპოვებას - ზაურ ბერაძე (86 კგ), ბექა ჭელიძე (97 კგ) და ზურიკო ურთაშვილი (125 კგ).

621
მკითხველის კომენტარები / 0 /
მსგავსი ამბები
რუბრიკის სხვა სიახლეები
;