თავისუფალი ჭიდაობა. კაპიტანი ისევ ხინჩეგაშვილია [მზადება მსოფლიოს ჩემპიონატისთვის]

საქართველოს თავისუფალი სტილით მოჭიდავეთა ნაკრებმა დაასრულა ფიზიკური მომზადებისთვის განკუთვნილი შეკრება სომხეთში, "წახკაძორის" ოლიმპიურ ბაზაზე და თბილისში დაბრუნდა.

გუნდი ჯერჯერობით აქ ემზადება მსოფლიოს ჩემპიონატისთვის, რომელიც ოქტომბრის ბოლოს ბუდაპეშტში გაიმართება.

პლანეტის პირველობისთვის მზადების მიზნით გუნდი უახლოეს დღეებში - 7-9 სექტემბერს, ვარშავაში იჭიდავებს"ციოლკოვსკის" მემორიალში, რომელიც, ამავდროულად, სარეიტინგო შეჯიბრებაცაა და მსოფლიოს რეიტინგში ჩასათვლელ ქულებს იძლევა.

ნაკრების მთავარ მწვრთნელ გიორგი იანტბელიძეს იქ "გაცხრილული" შემადგენლობა მიჰყავს - წონებში ძირითადად თითო კაცი, ვისაც ყველაზე მეტად სჭირდება სატურნირო პრაქტიკა, თუმცა ორიოდ წონაში კონკურენციის გასარკვევად რამდენიმე ფალავანს გამოცდის.

ამჯერად მონაწილე არ გვეყოლება ორ წონაში - 61-სა და 125 კილოგრამებში. პირველში იმიტომ, რომ მსოფლიოს ჩემპიონატზე წასვლის მთავარ კანდიდატს, ევროპის რამდენიმეგზის მედალოსან ბექა ლომთაძეს წონას არ აკლებინებს და ზედა წონაში - 65-ში აჭიდავებს, მძიმე წონაში კი ევროპისა და მსოფლიოს ჩემპიონს, ოლიმპიურ პრიზიორ გენო პეტრიაშვილს ასვენებს.

წახკაძორში გავლილი ფიზიკური შეკრების შემდეგ ლომთაძეს წონა ცოტათი გაექცა - ოთხიოდე კილოგრამი აქვს დასაკლები. როგორც გითხარით, ის ამ წონაში მსოფლიოს ჩემპიონატზე წასვლის მთავარი კანდიდატია და დროის ასეთ მოკლე მონაკვეთში ორჯერ რომ არ მოუწიოს წონის დაკლებამ, ამიტომ ახლა ამისთვის არ დატვირთავენ და ზედა წონაში გამოიყვანენ.

ფიზიკური შეკრების შემდეგ პეტრიაშვილიც ცოტა გადაღლილია და ამ ეტაპზე მასაც ასვენებენ. სხვა მხრივ გუნდი უძლიერესი, თითქმის ოპტიმალური შემადგენლობით გამოვა ვარშავაში: გუნდის კაპიტანი კვლავაც ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (65) იქნება, იჭიდავებენ მსოფლიოს ჩემპიონი ზურაბ იაკობიშვილი (70), ევროპის ფინალისტი ელიზბარ ოდიკაძე (97) და სხვები.

პოლონეთის ტურნირის შემდეგ გუნდი ბორჯომში გაივლის შეკრებას და სპორტსმენთა წონის კორექტირებაც იქ მოხდება.

პოლონეთში წამსვლელ შემადგენლობაში ერთი სიახლეცაა - წონას იკლებს და 86 კილოგრამის ნაცვლად, 79-ში იჭიდავებს ევროპისა და მსოფლიოს ბრინჯაოს მედალოსანი დავით ხუციშვილი. გუნდშია ევროპის ორგზის ჩემპიონი, მსოფლიოსა და ოლიმპიური პრიზიორი დავით მარსაგიშვილიც (92). ის ჩაბმულია კონკურენციაში, სადაც მეტოქეობას საქართველოს ჩემპიონი ირაკლი მწითური უწევს.

57 კგ. ოთარ გოგავა (წყალტუბო)
65 კგ. ვლადიმერ ხინჩეგაშვილი (გორი), ბექა ლომთაძე (ქუთაისი)
70 კგ. ზურაბ იაკობიშვილი (ყვარელი)
74 კგ. ავთანდილ კენჭაძე (ამბროლაური)
79 კგ. იაკობ მაქარაშვილი (თბილისი), დავით ხუციშვილი (საგარეჯო), ნიკოლოზ კენჭაძე (ამბროლაური)
86 კგ. სანდრო ამინაშვილი (თბილისი)
92 კგ. დავით მარსაგიშვილი (ყაზბეგი), ირაკლი მწითური (თბილისი).
97 კგ. ელიზბარ ოდიკაძე (თბილისი).

მთავარი მწვრთნელი: გიორგი იანტბელიძე

მწვრთნელები: დავით პოღოსიანი, დავით ოთიაშვილი

ექიმი: თემურ მგელაძე

მსაჯი: რუსლან დარსანია

ყოველდღიური სპორტული გაზეთი "ლელო"
1763
მკითხველის კომენტარები / 2 /
ალექსანდრე
0
გოგავა ხონელია, წყალტუბო საიდსნ მოგაქვთ რომელ დებულებაში წერია რომ წყალტუბელია?
ლალი
0
წარმატებები ჩვენს ბიჭებს.
მსგავსი ამბები
რუბრიკის სხვა სიახლეები
;