თავისუფლების აქცენტი ფიზიკაზე

საქართველოს თავისუფალი სტილით მოჭიდავეთა ნაკრები ჯერჯერობით თბილისში აგრძელებს მზადებას მსოფლიოს ჩემპიონატისთვის.

თვის ბოლოს კი ბაკურიანში გაემგზავრებიან შეკრებაზე. ეს იქნება შერეული ტიპის მოსამზადებელი ეტაპი - რა თქმა უნდა, ძირითადი დრო და ყურადღება ფიზიკურ მომზადებას დაეთმობა, თუმცა ფალავნები ტატამზეც ივარჯიშებენ.

ჯერჯერობით გადაწყვეტილი ეს შეკრებაა, თუმცა ნაკრების ხელმძღვანელობას სომხეთშიც სურს წასვლა ნაცნობ მისამართზე - წახკაძორის ოლიმპიურ ბაზაზე სავარჯიშოდ, სადაც ასევე შერეული ტიპის შეკრება ექნებათ, თუმცა ეს საკითხი ჯერ არაა საბოლოოდ გადაწყვეტილი.

მსოფლიოს ჩემპიონატი წლეულს უჩვეულოდ გვიან - ოქტომბრის ბოლოს გაიმართება ბუდაპეშტში, იქამდე კი მოსამზადებლად საკმაო დროა. თუმცა ამ ნაკრების მთავარი მწვრთნელი გიორგი იანტბელიძე მხოლოდ ერთ ტურნირში გეგმავს გამოსვლას - აგვისტოში პოლონეთში წავლენ იქაურ ტრადიციულ საერთაშორისო ტურნირში საჭიდაოდ, მაგრამ არაა გამორიცხული, მოგვიანებით ვინმე კიდევ გაუშვან რომელიმე შეჯიბრებაზე. ეს იმაზე იქნება დამოკიდებული, ვის დასჭირდება სტარტი ან რომელიმე წონაში გასარკვევი ხომ არ იქნება კონკურენცია.

რაც შეეხება მსოფლიოს ჩემპიონატზე წამსვლელ გუნდს, ამაზე საუბარი ჯერ ადრეა, თუმცა იანტბელიძე არ მალავს, რომ ევროპის ჩემპიონატზე ნამყოფი გუნდის ძირითადი ბირთვი შენარჩუნებული იქნება.

გუნდის დასაკომპლექტებლად მნიშვნელოვანი იყო ვახტანგ ბალავაძის სახელობის "დიდი პრიზის" ტურნირი, სადაც ლიდერთა უმეტესობამ მწვრთნელთა იმედები გაამართლა:

ევროპის ვიცე-ჩემპიონი ბექა ლომთაძე (61), მსოფლიოს ჩემპიონი ზურაბ იაკობიშვილი (70), ვინც ფინალში მართლაც შეუდარებელი შეხვედრა მოუგო რუსთა ოლიმპიურ ჩემპიონ სოსლან რამონოვს;

მსოფლიოსა და ევროპის ჩემპიონი, ოლიმპიური პრიზიორი გენო პეტრიაშვილი (125), ევროპის მედალოსანი ელიზბარ ოდიკაძე (97), 86-ში გამოჩნდა ახალი კადრი - საბა ჩიხრაძე. ასევე ყველაფერი გარკვეულია 65 კილოგრამში, სადაც ბალავაძის ტურნირზე არ უჭიდავია მსოფლიოსა და ოლიმპიურ ჩემპიონს, ევროპის სამგზის გამარჯვებულ ვლადიმერ ხინჩეგაშვილს, თუმცა ის მაინც უკონკურენტოა. ამათ გვერდით არის გარკვეული წონები, სადაც ჯერ ისევ ფავორიტთა ძიებაში არიან, ან ახლანდელზე უკეთესს ეძებენ. ვინძლო, სწორედ ამისთვის დასჭირდეთ დამატებით საერთაშორისო ტურნირებში გამოსვლა.

ყოველდღიური სპორტული გაზეთი "ლელო"
832
მკითხველის კომენტარები / 0 /
მსგავსი ამბები
რუბრიკის სხვა სიახლეები
;