თავისუფლების სათვალავი - 7 ქართული მედალი კადეტებში

საქართველოს თავისუფალი სტილით მოჭიდავე ჭაბუკთა (კადეტთა) ნაკრებმა სკოპიეში მიმდინარე თანატოლთა ევროპის ჩემპიონატზე გუშინწინ მოპოვებულ 3 მედალს გუშინ კიდევ 4 დაუმატა:

1 ვერცხლი და 3 ბრინჯაო. კონტინენტის ვიცე-ჩემპიონი დავით აბდალაძე (55) გახდა, მესამე ადგილზე კი გიორგი გეგელაშვილი (48), გიორგი ნებუნიშვილი (80) და სოლომონ მანაშვილი (110) გავიდნენ.

შეგახსენებთ, რომ ქართველებმა პირველ დღეს 1 ოქრო და 2 ბრინჯაო ირგუნეს. ევროპის ჩემპიონი ქუთაისელი ბაგრატ გაგნიძე (71) გახდა, ხოლო ბრინჯაოს მედლებს გიორგი ჭოლაძე (51) და ვლადიმერ გამყრელიძე (60) დაეუფლნენ.

მთლიანობაში კი გია კვინიკაძის შეგირდებმა ჩინებული შედეგით - 7 მედლით დაამთავრეს გამოსვლა. ამასთან, კიდევ ორმა ბრინჯაოსთვის პაექრობა დათმო და 10-კაციანი გუნდიდან 9-მ მედლისთვის იჭიდავა. მშვენიერი შედეგია. გუნდურ ჩათვლაში ჩვენები 140 ქულით მეორეზე გავიდნენ. პირველი რუსეთია 188-ით, მესამე კი თურქეთი - 135-ით.

ასევე აღსანიშნავია ქუთაისელთა კარგი გამოსვლა: ჩვენი გუნდის ორივე ფინალისტი, გაგნიძეც და აბდალაძეც, პლუს შარშანდელი ევროპის ჩემპიონი და ახლანდელი მესამე პრიზიორი სწორედ ქუთაისიდანაა.

გუშინ აბდალაძეს ფინალში უკრაინელ ვლადიმერ ოსტაპენკოსთან მოეცარა ხელი - 0:7. დამამშვიდებელ წრეში გეგელაშვილი და ლუკა მარიამიძე (65) პირდაპირ ბრინჯაოსთვის ჭიდაობდნენ. გეგელაშვილმა წარმატებით დაასრულა ეს შეხვედრა და 8:4 დაამარცხა ბელარუსი ილია რაჰოზაუ, მარიამიძე კი, სამწუხაროდ, დამარცხდა - სომეხ ნარეკ ჰარუთინიანთან 4:15 წააგო.

ნებუნიშვილი და მანაშვილი დამამშვიდებელ ეტაპზე წინასწარ შეხვედრებში ჩაერთნენ. მანაშვილმა ჯერ უნგრელი მილან ანდრაშ კორსოგი 2:2-ზე დაამარცხა, ბრინჯაოსთვის შეხვედრას კი ისედაც 7:0 უგებდა თურქ სულეიმან დურს, როცა ბეჭებზეც დააწვინა. მანაშვილმაც თავიდან უნგრელი დაჯაბნა - ჩაბა უბორნიაკს წმინდად მოუგო, 10:0, მედალი კი უკრაინელ ვასილ სოვას აართვა. მასაც ჯერ 4:0-ს უგებდა, როცა ბეჭებზე დადო.

სკოპიეში ამავე ტურნირის ფარგლებში გათამაშდა ოქტომბერში არგენტინაში გასამართავი მსოფლიოს ახალგაზრდული ოლიმპიური თამაშების საგზურებიც. ოღონდ მას არა 10-ვე, არამედ 5 წონაში იძლეოდნენ. "თავისუფალში" ეს გუშინ მოჭიდავე ხუთი წონაა, ანუ 48, 55, 65, 80 და 110 კილოგრამები. ლიცენზიას საუკეთესო ექვსეული იღებდა ანუ ჩვენ ხუთივე წონაში დავისაკუთრეთ.

სკოპიეში ახლა გოგონების შეჯიბრება მიმდინარეობს, რასაც ბერძენ-რომაელებისა მოჰყვება. იმათთან სალიცენზიო ის ხუთი წონა იქნება, რომელიც "თავისუფლებთან" არ იყო.

48 კგ.
1. დანიელ ზოპუნიანი (რუსეთი); 2. ჰალილ გიოკდენიზი (თურქეთი); 3. გიორგი გეგელაშვილი (საქართველო), ალიჰასან ამირლი (აზერბაიჯანი).

55 კგ.
1. ვლადისლავ ოსტაპენკო (უკრაინა); 2. დავით აბდალაძე (საქართველო); 3. ფედორ ბალტუევი (რუსეთი), რუჰან რასიმი (ბულგარეთი).

65 კგ.
1. თურან ბაირამოვი (აზერბაიჯანი); 2. მაგომედ აბდულკადიროვი (რუსეთი); 3. თოლგა აქუზი (თურქეთი), ნარეკ ჰარუთინიანი (სომხეთი); 5. ლუკა მარიამიძე (საქართველო).

80 კგ.
1. ახმედხან ტემბოტოვი (რუსეთი); 2. ფუად მაილოვი (აზერბაიჯანი); 3. გიორგი ნებუნიშვილი (საქართველო), დენის საჰალიუკი (უკრაინა).

110 კგ.
1. სერგეი კოზირევი (რუსეთი); 2. ისლამ აბუევი (აზერბაიჯანი); 3. სოლომონ მანაშვილი (საქართველო), სტოიან იორდანოვი (ბულგარეთი).

ყოველდღიური სპორტული გაზეთი "ლელო"
595
მკითხველის კომენტარები / 0 /
მსგავსი ამბები
რუბრიკის სხვა სიახლეები