თავისუფლების წარუმატებელი სტარტი მსოფლიოზე

სამწუხაროდ, წარუმატებლად დაიწყეს მსოფლიოს ჩემპიონატში ასპარეზობა ჩვენმა თავისუფალი სტილით მოჭიდავეებმა - ოთარ გოგავაც (57) და ვლადიმერ ხინჩეგაშვილიც (65) ნაადრევად დამარცხდნენ და არათუ მედალი ან თუნდაც ლიცენზია, დამამშვიდებელ წრემდეც ვერ მივიდნენ.

ჩვენ პირველ წარმატებას ველოდით, რადგან ევროპის სამგზის, ოლიმპიური და მსოფლიოს ჩემპიონი ხინჩეგაშვილი გამოდიოდა. სამწუხაროდ, გამართლდა ჩვენი ვარაუდი და გორელი ათლეტი ერთ-ერთ იმ ფალავანთან დამარცხდა, ვინც მისთვის საშიშ მეტოქეთა შორის მივიჩნიეთ - რუსეთის ნაკრების ყოფილ წევრთან, უნგრეთის მოქალაქე ისმაილ მუსუკაევთან: 1:5. ეს 1/16-ფინალში მოხდა, მანამდე კი ხინჩეგაშვილმა საკვალიფიკაციო წრეში კორეელი ჯუნსიკ იუნი 4:0 დაამარცხა. ხინჩეგაშვილი უმედლოდ დარჩა და ლიცენზიაც გაისად უნდა ეძებოს სალიცენზიო შეჯიბრებებში.
პირველივე წრეში დამარცხდა ჩვენი მეორე მონაწილე ოთარ გოგავა, ვინც სომეხთა ევროპის წლევანდელ ჩემპიონ არსენ ჰარუთინიანს ხვდებოდა და 4:9 წააგო.

ყაზახეთში ჩვენთვის დღესაც ფრიად მნიშვნელოვანი დღეა, რადგან ასპარეზობაში ერთბაშად ოთხი ტიტულოვანი ფალავანი ჩაებმება: მსოფლიოს ჩემპიონი ზურაბ იაკობიშვილი (70), მსოფლიოს ფინალისტი ავთანდილ კენჭაძე (74), ევროპის ბრინჯაოს მედალოსანი ირაკლი მწითური (92) და გუნდის მთავარი იმედი, მსოფლიოს ორგზის და ევროპის ჩემპიონი, ოლიმპიური პრიზიორი გენო პეტრიაშვილი (125). ვერ ვიტყვით, რომ ჩვენებს განსაკუთრებულად ძნელი ბადეები ერგოთ.

ამ მხრივ მხოლოდ იაკობიშვილი დაგვეჩაგრა, ვინც პირველ შეხვედრას მოლდოველ მიჰაილ სავასთან კი ჩაატარებს, მაგრამ მეორე წრის სავარაუდო მეტოქეთა შორის რუსი დავიდ ბაევიც ჰყავს. ბადის ამავე მხარეს არიან მისი ერთ-ერთი უმთავრესი კონკურენტი, პოლონელთა დაღესტნელი ევროპის ჩემპიონი, მსოფლიოს ფინალისტი მაგომედმურად გაჯიევი, უზბეკი ოლიმპიური პრიზიორი იხტიორ ნოვრუზოვი, რუსეთიდან ბახრეინში გადაბარგებული მსოფლიოს შარშანდელი ფინალისტი, ევროპის ვიცე-ჩემპიონი ადამ ბატიროვი, თურქი ჰაიდარ იავუზი, ამერიკელი ჯეიმს მალკოლმ გრინი და კიდევ რამდენიმე ანგარიშგასაწევი ქვეყნის ფალავნები, ამ დროს კი ბადის ქვედა ნახევარში, სადაც ყაზახი ფალავანი ჭიდაობს, გამოსარჩევი მხოლოდ ირანელი მოჭიდავეა... სრული საფუძველი გვაქვს ვიფიქროთ, რომ მასპინძელს გზა გაუსუფთავეს...

შედარებით გაუმართლა კენჭაძეს, რადგან რუსი, ირანელი, აზერბაიჯანელი, ინდოელი, ბელარუსი და თურქი მეტოქეები ბადის მეორე მხარეს არიან მისკენ იტალიელთა ნატურალიზებული კუბელი ევროპისა და მსოფლიოს ჩემპიონი, ოლიმპიური პრიზიორი ფრენკ მარკეს ჩამიზოა, თუმცა მას ნახევარფინალამდე არ ხვდება, პირველ შეხვედრას კი ფრანგთა დაღესტანელ ზელიმხან ხაჯიევთან ჩაატარებს. ცხადია, საჩუქარი არც ეს ფალავანია, მაგრამ არც - დაუმარცხებელი. თუ მოიგებს, კენჭაძე მეორე პაექრობას მერვედფინალში ნიგერიელ ოგბონე ემანუელ ჯონსა და მოლდოველ ევგენი ნედალეკოს შორის მოგებულთან ჩაატარებს. ბადის ამავე მხარესაა მასპინძელი დანიარ კაისანოვიც, ოღონდ ის კენჭაძესთან შეხვედრამდე ჯერ ჩამიზოს ხვდება.

მწითური თავდაპირველად უნგრელ ბენდეგუზ ტოტს დაეჭიდება, ბადის ამ მხარეს კი ამერიკელი მსოფლიოს მოქმედი ჩემპიონი მიხაელ კოქსია. ასევე აქეთაა მასპინძელი ნურგაი ნურგაიპულიც.

886
მკითხველის კომენტარები / 0 /
მსგავსი ამბები
რუბრიკის სხვა სიახლეები
;