თავისუფლები ოქროს უმიზნებენ - ინტერვიუ გიორგი იანტბელიძესთან

მეორე ევროპულ თამაშებზე ჩვენს დელეგაციაში თავისუფალი სტილით მოჭიდავეთა ნაკრები ერთ-ერთი მთავარი დასაყრდენია.

მართალია, გუნდს ამჯერად დააკლდება მთავარი იმედი - მსოფლიოს ორგზის და ევროპის ჩემპიონი, მძიმეწონოსანი გენო პეტრიაშვილი, თუმცა მის შემადგენლობაშია ოლიმპიური და მსოფლიოს ჩემპიონი ვლადიმერ ხინჩეგაშვილი (65). სხვა წონებშიც ძლიერი ფალავნები გვყავს, ოღონდ ეგაა, ნაკრების ყველა წევრი ვერ მიდის მინსკში იმ ელემენტარული მიზეზის გამო, რომ ყველა წონითი კატეგორია არ შედის ამ თამაშების პროგრამაში.

გუნდი ამჟამად დუშეთში გადის დასკვნით შეკრებას, ნაკრების მზადებასა და მინსკთან დაკავშირებულ გეგმებზე ნაკრების მთავარი მწვრთნელი გიორგი იანტბელიძე გვესაუბრება. 

- როგორ მიდის ევროპული თამაშებისთვის მზადება, გუნდში პრობლემები ხომ არაა?

- მოგეხსენებათ, მეორე ევროპულ თამაშებზე სრულად დაკომპლექტებული გუნდით გამოვალთ. ნაკრებმა მზადების ყველა დაგეგმილი ეტაპი გაიარა საიმისოდ, რომ მაქსიმალურად კარგად და მაღალ დონეზე გამოვიდეთ ამ მნიშვნელოვან ღონისძიებაზე. დასკვნით შეკრებას დუშეთში გავდივართ, სადაც მხოლოდ ჩვენ ვვარჯიშობთ - რადგან ეს ევროპული თამაშებისთვის მზადების ბოლო ეტაპია, არ გვინდა უცხოელებთან ერთად ვარჯიში.
გუნდში არის პატარ-პატარა ტრავმები, თუმცა არა, გვარებს არ დავასახელებ. მით უფრო, რომ საშიში არაფერია. თუმცა მთავარი ტრავმა ისაა, რამაც ჩვენი მძიმეწონოსანი გენო პეტრიაშვილი გამოთიშა ამ შეჯიბრებას - მოგეხსენებათ, მან მენისკის ოპერაცია გაიკეთა და ვერ შეძლებს ამ ტურნირზე მონაწილეობის მიღებას. პეტრიაშვილს ახალგაზრდა, ძლიერი და პერსპექტიული სპორტსმენი გივი მაჭარაშვილი შეცვლის. ვიმედოვნებთ, ამ თამაშებზე ის თავის მაქსიმუმს გააკეთებს და მედლის მოპოვებას შეძლებს. 

- მძიმე წონის გარდა, სხვაგანაც ხომ არ იდგა საკადრო გადაადგილების საჭიროება?

- არა, მძიმე წონის გარდა, ყველგან ის ფალავანი მიიღებს მონაწილეობას, ვინც ამ მომენტისთვის ყველაზე ძლიერია, ყველაზე კარგ ფორმაშია და უფრო მაღალ დონეზე დგას.

- არცთუ შორს მსოფლიოს ჩემპიონატიც გელოდებათ, სადაც ტოკიოს ოლიმპიადის ლიცენზიებიც თამაშდება. აქედან გამომდინარე, ამ თამაშებს რა მნიშვნელობას ანიჭებთ, რამდენად სრულად დაიხარჯებით მინსკში და რა გეგმით მიდიხართ იქ? 

- ცხადია, მსოფლიოს ჩემპიონატი უფრო პრესტიჟული შეჯიბრებაა და იქ სხვანაირად მომზადებულები წავალთ, მაგრამ უმნიშვნელო არც ეს ტურნირია - ევროპული ოლიმპიადა რანგით ევროპის ჩემპიონატზე მაღლა დგას. ევროპის წინა თამაშებზე ჩვენს ნაკრებს ოქროს მედალი არ ჰქონდა და ყველანაირად შევეცდებით, მაქსიმუმს გავაკეთებთ საიმისოდ, რომ ამჯერად მოვიპოვოთ ოქროს მედალი. 

- ევროპის ჩემპიონატი, ევროპული თამაშები და მსოფლიოს ჩემპიონატი ანუ სეზონის სამი ყველაზე მნიშვნელოვანი შეჯიბრება მეტისმეტად ახლო-ახლოს, ლამის ორთვიანი შუალედით ტარდება ერთმანეთთან და არ გაგიჭირდებათ გუნდის პიკზე მიყვანა? 

- სხვა დიდი ქვეყნებისგან განსხვავებით, როგორიც რუსეთი და სხვებია, რომლებსაც დიდი კონტინგენტი ჰყავთ და შეუძლიათ, მეორე-მესამე ნომრები აჭიდაონ, ჩვენ ამის საშუალება არ გვაქვს. ამიტომ ვცდილობთ, ისე წარვმართოთ მზადების პროცესი, რომ არსებული კონტინგენტი ყოველ მთავარ ღონისძიებას მაქსიმალურად ოპტიმალურ ფორმაში შეხვდეს, მოასწრონ დასვენებაც, სტარტის აღებაც და ფორმაში შესვლაც. ევროპულ თამაშებსაც ასე მოვეკიდეთ - ვეცდებით, გუნდმა ასახელოს საკუთარი თავიც და ჩვენი ქვეყანაც. ვეცდებით, მოვიპოვოთ ოქროს მედალი. 

ყოველდღიური სპორტული გაზეთი "ლელო"
625
მკითხველის კომენტარები / 0 /
მსგავსი ამბები
რუბრიკის სხვა სიახლეები
;