თავისუფლებს რომი ეძნელებათ

რომში მიმდინარე ახალგაზრდა მოჭიდავეთა ევროპის ჩემპიონატზე გუშინ, ქალთა ტურნირის მეორე დღეს ჩვენი მეორე მონაწილე - თამარ ხოჯაშვილიც (53) მალევე დამარცხდა: პირველივე წრის პაექრობა წმინდად, 0:10 დათმო პოლონელ ალიცია კზიზოვიჩთან და არც მერე მისცემია სანუგეშო წრეში გადასვლის საშუალება.

შეგახსენებთ, რომ მარადიულ ქალაქში გოგოებში ჩვენგან სულ ორი მონაწილე გამოდიოდა და პირველი მათგანი - თამარ სამხარაძე (50) გუშინწინ დამარცხდა მეორე წრეში, პირველში კი ავსტრიელი მეტოქე არ გამოუცხადდა.

აქვე იმასაც გეტყვით, რომ 50 კილოგრამში ჩემპიონი რუსეთის სახელით მოჭიდავე ვერონიკა ღურწკაია გახდა, ვინც ფინალურ პაექრობაში 8:6 დაამარცხა თურქი აინურ ერგე.

დღეს ევროპის ჩემპიონატში უკვე თავისუფალი სტილით მოჭიდავე ახალგაზრდები ჩაებმებიან და ხუთი წონის - 57, 65, 70, 79 და 97-ის წარმომადგენლები იჭიდავებენ. საქართველოს ღირსებას თეიმურაზ ვანიშვილი (57), გიორგი ელბაქიძე (65), ივერიკო ჯულაყიძე 70, თორნიკე კვინიკაძე (79) და ზურაბ ურთაშვილი (97) დაიცავენ.

წინასწარ გეტყვით, რომ გუშინ გამართული წილისყრისას ჩვენებს არც ისე ხელსაყრელი ბადეები ერგოთ. ერთი, რომ ხუთივე მათგანი საკვალიფიკაციო ეტაპიდან იწყებს გამოსვლას ანუ მაქსიმალურად ბევრი ორთაბრძოლის გამართვა უწევთ და ერთ შეხვედრასაც არ ისვენებენ; მეორეც - სამი მათგანი საკვალიფიკაციო ეტაპზევე ან მეორე წრეში აზერბაიჯანელს ხვდება, რაც სულაც არაა ბედის საჩუქარი. ერთი სიტყვით, ბელდუხ გავაშელიშვილის გუნდს დღეს დიდი ომი ელოდება.

ვანიშვილს პირველ მეტოქედ ბულგარელი მეჰმედ ჰასან მეჰმედი ერგო. მასთან მოგების შემთხვევაში მერვედფინალში იტალიელ ვირჯილიო გუარინოსა და შვეიცარიელ ნინო ლეუტერტს შორის გამარჯვებულს შეხვდება.

ელბაქიძე თავდაპირველად უნგრელი ზოლტან ვილჰელმის ძლევას შეეცდება. ამ წყვილის გამარჯვებულს მერვედფინალში ახალ კონკურენტად აზერბაიჯანელი ელმარ კაზიმოვი ეყოლება.

ჯულაყიძე პირველივე შეხვედრას გამართავს აზერბაიჯანელ ხაჯიმურად გაჯიევთან. ამათში მოგებული პირდაპირ მეოთხედფინალში გადის, სადაც პოლონელი შიმონ ვოიტკოვსკისა და შვეიცარიელი ჰასან კაიას წყვილიდან გასულს დაეჭიდება.

კვინიკაძის პირველი მეტოქეც აზერბაიჯანელია - ორხან აბასოვი. მას თუ მოუგებს, მერვედფინალში ურთიერთობას ავსტრიელ ბენჯამინ გრაილსა და სლოვაკ კრისტოფერ ბედნარიკს შორის გამარჯვებულთან გაარკვევს.

ჩვენი გუნდის ლიდერი ურთაშვილი თავიდან იტალიელ ლუის მაკუს ხვდება და თუ მოუგებს, პირდაპირ მეოთხედფინალში გავა, სადაც ახალ მოცილედ სლოვაკ ვილიამ ოროსსა და ბელარუს იარასლაუ სლავიკოუსკის შორის გამარჯვებული ეყოლება.

732
მკითხველის კომენტარები / 0 /
მსგავსი ამბები
რუბრიკის სხვა სიახლეები