[VIDEO] მესის ბიოგრაფია: ახალშობილმა ლეომ მშობლები ძალიან შეაშინა: ყური მოკეცილი ჰქონდა და ძალიან წითელი იყო

შესავალი:სიახლე Lelo.ge-ის მკითხველს! ლიონელ მესის ბიოგრაფია: 5 წლის ბავშვმა პირველ ვარჯიშზე დარტყმა ვერ გაბედა, შეეშინდა...

თავი I: [თავი I] ლიონელ მესის ბიოგრაფია: რატომ ჩხუბობდნენ ლეოს გამო მისი თანასკოლელები?

თავი II

დაჭმუჭნილი ქაღალდიდან ტყავის ბურთამდე



ბიჭია თუ გოგო? ფეხბურთელი!

წინა ქვეთავში წიგნის გმირთან ერთად გავიარეთ გზა ბარსელონიდან როსარიომდე, "ნოუ კამპიდან" როსარიოს სკოლის ეზომდე... ვარსკვლავობიდან მესის ბავშვობში დავბრუნდით.

მოდით, ღუზა როსარიოში, ისრაელის ქუჩაზე, #525 სახლთან ჩავუშვათ და ვიდრე ლეო მესი 13 წლამდე არ წამოიზრდება, ბარსელონაში არ წავიდეთ...

არგენტინაში დაბანაკებულებს იქაური ადათ-წესების გაცნობა მოგვიწევს. ერთ რუს ეთნოგრაფს ამ ქვეყნის შესახებ ვრცელი მოხსენება აქვს დაწერილი, სადაც ჩვენთვის ერთ საინტერესო აბზაცს ვაწყდებით:

"გსმენიათ რამე არგენტინის პრეზიდენტის შესახებ? მის გვარს ვერ დაასახელებთ, სამაგიეროდ, დიეგო მარადონას ყველა კარგად იცნობს! ფეხბურთს არგენტინელები ჭკუიდან გადაჰყავს. როცა ისინი იგებენ, ქუჩაში დიდი არეულობა იწყება, ქუჩები გადაკეტილია და ხალხი ერთად ზეიმობს.

საინტერესოა, რომ სწორედ არგენტინული ხასიათიდან გამომდინარე ზოგიერთი დიდი ქალაქის კანონი კრძალავს გულშემატკივრის დაცინვას, მის გაჯავრებას...

ორსულ ქალს რომ ჰკითხოთ, ბიჭს ელოდება თუ გოგონას, გიპასუხებთ -ფეხბურთელს! იმასაც დაბეჯითებით გეტყვით, რომელი გუნდის ქომაგად დაიბადება."

ლეო მესი ბებიასთან და დედასთან ერთად

1987 წლის 24 ივნისს, ზამთრის სუსხიან დღეს არგენტინის მასშტაბით 15 აფეთქების ხმა გაისმა. თითქოს განგებ დაამთხვიესო: სწორედ ამ დღეს, ჯუზეპე გარიბალდის სახელობის საავადმყოფოში დილის 6 საათზე ბავშვი დაიბადა.

ეს გახლდათ ლეო მესი, რომელიც 3 კილოგრამს იწონიდა და 47 სმ იყო. ახალდაბადებულმა მშობლები თავიდან ძალიან შეაშინა: "ნიუელს ოლდ ბოისის" ფორმასავით წითელი გახლდათ, ხოლო ცალი ყური მოკეცილი ჰქონდა. თუმცა შიში მალე სიხარულში გადაიზარდა, რადგან ყურიც გაუსწორდა და წითელი ფერიც ვარდისფრით შეიცვალა.

მშობლებმა ოფიციალურ საბუთში ბევრი ფიქრის გარეშე ჩაწერეს: სახელი - ლიონელ ანდრეს, გვარი - მესი. იოლი წარმოსადგენია, რა სიხარული სუფევდა 26 ივნისს მესების ოჯახში, როცა ტოლმასავით შეხვეული ჩვილი შინ მიიყვანეს. იქ მათ მთელი ნათესაობა დახვდა, მათ შორის იყო ხუთი წლის მატიასი და შვიდი წლის როდრიგო - ლეოს უფროსი ძმები. ვიდრე დედა, სელია საავადმყოში იყო, მათ დეიდები პატრონობდნენ.

როგორ უნდა ვთქვათ, მესის მშობლებს არ გაუმართლათო, მაგრამ არც მალავდნენ, რომ ორი ვაჟის შემდეგ გოგონას ელოდებოდნენ. თუმცა სელიას მოგვიანებით მართლაც ეყოლა გოგონა, რომელსაც მარია სოლი დაარქვა. ძმებთან ერთად, თურმე ფეხბურთს ისიც თამაშობდა, ოღონდ სახლის ეზოში.

ჯუზეპე გარიბალდის საავადმყოფო როსარიოში ერთ-ერთი ყველაზე პრესტიჟულია და გასაგებია ჰორაციო მესიმ თავისი მეუღლე იქ ამიტომაც მიიყვანა. მაგრამ საინტერესოა, რატომ ატარებს არგენტინული საავადმყოფო იტალიის ეროვნული გმირის სახელს? ნუთუ არგენტინელებს არ ახსოვთ, რომ 1843 წელს ურუგვაიში მცხოვრები გარიბალდი ამ ქვეყნის არმიას ჩაუდგა სათავეში და არგენტინასთან ომი მოაგებინა?

აქ სხვა ისტორიამ უფრო დიდი გავლენა იქონია. 1970-80-იან წლებში ომებით დაუძლურებული იტალიის მოსახლეობა მასობრივად ტოვებდა საკუთარ ქვეყანას. ამას ხელს ისიც უწყობდა, რომ მოსავლიანობა წლიდან წლამდე მცირდებოდა, მილიონობით იტალიელმა აიკრა გუდა ნაბადი და ამერიკის კონტინენტს მიაშურა. 1892 წელს მესის მშობლიურ ქალაქ როსარიოში მოსახლეობის 70 პროცენტს სწორედ იტალიელები შეადგენდნენ და 2 ოქტომბერს სწორედ მათ სამკურნალოდ გაიხსნა საავადმყოფო, რომელსაც იტალიის გმირის ჯუზეპე გარიბალდის სახელი მიენიჭა.

ისტორიული ცნობებით, ყველაზე მეტი ემიგრანტი იტალიიდან 1883 წელს წავიდა - 169 ათასი. მათგან ერთი, ანჯელო მესი იყო, მშრომელი კაცი, რომელიც ბედის საძიებლად არგენტინისკენ მიმავალ გემზე მესამე კლასის კაიუტაში აღმოჩნდა. იგი წარმოშობით ცენტრალური იტალიიდან, ადრიატიკის ზღვის სანაპიროზე მდებარე მაჩერატას პროვინციის ქალაქ პორტო რეჩანატიდან იყო.

სწორედ ანჯელოს შთამომავალია ლეოს მამა ჰორაციო, რომელმაც 1978 წელს, ასევე იტალიური წარმოშობის სელენა კუჩიტინი შეირთო ცოლად.

საფეხბურთო თაფლობა

წყვილმა ჯვარი 1978 წლის 17 ივნისს დაიწერა. ეს "კორაზონ დე მარიას" ეკლესიაში მოხდა. როგორ ფიქრობთ, თაფლობისთვის სად წავიდოდნენ? გავიხსენოთ არგენტინული ხასიათი, ისიც მოვიგონოთ, რომ 1978 წლის ივნისში არგენტინაში მსოფლიოს საფეხბურთო ჩემპიონატი მიმდინარეობდა და იოლად განვსაზღვრავთ ახლადშეუღლებული ჰორაციოსა და სელიას გეზს: ისინი ჯვრისწერის მეორე დღეს როსარიოს სტადიონ "ხიხანტე დე არიოტოს" ტრიბუნაზე მოკალათდნენ და 40 ათას გულშემატკივართან ერთად ბრაზილიის წინააღმდეგ არგენტინას ქომაგობდნენ.

ამ შეხვედრის მოგება ფინალში გასვლის ტოლფასი იყო, თუმცა სწორედ დაძაბულობამ სამხრეთამერიკელ ტიტანთა დუელს დაღი დაასვა - გოლი ვერც ერთმა გუნდმა ვერ გაიტანა (0:0). ბრაზილიამ ჯგუფის სხვა მატჩებში 6 გოლი შეაგდო და 1 გაუშვა, არგენტინას კი პერუსთან გადამწყვეტ შეხვედრამდე მხოლოდ 2:0 ეწერა. მასპინძლებმა სწორედ ინკების შთამომავლებთან გაილაღეს, 6:0 აჯობეს, ბურთების შეფარდებით ბრაზილიას გაასწრეს და ფინალში თამაშის უფლებაც მოიპოვეს.

ოქროს მატჩში არგენტინა ჰოლანდიას ბუენის აირესში შეეჭიდა, 90 წუთში ვერაფერი დააკლო, მაგრამ დამატებით დროში ბერტონისა და კემპესის გოლებით 3:1 სძლია და ქვეყნის ისტორიაში ერთ-ერთი ყველაზე ნათელი ფურცელი ჩაწერა. მეორე ასეთი ფურცელი მესის დაბადებამდე ზუსტად ერთი წლით ადრე შეივსო...

15-დან ერთ-ერთი აფეთქება როსარიოდან 50 კილომეტრის დაშორებით, ქალაქ ვილა კონსტიტუსიონში განხორციელდა, იქ სადაც ჰორაციო მესი მოღვაწეობდა. იგი მამის კვალს გაჰყვა და ფოლადის ქარხანაში განყოფილების უფროსად მუშაობდა. მართალია, მამის დახმარებით საკუთარი სახლი გააფართოვა, ეზოც მოაწყო, მაგრამ 80-იანი წლების არგენტინაში არსებული არასტაბილური მდგომარეობის გამო არეულობებიც ხშირად ხდებოდა, ინფლაციაც და ჰორაციო მესი, ისევე როგორც არგენტინელ მშრომელთა უმეტესობა, დალხინებულად ნამდვილად ვერ ცხოვრობდა. მას საკუთარი მეუღლე მცირედით ეხმაებოდა - სელია დამლაგებლად მუშაობდა.

ასეთ პირობებში ერთადერთ ნათელ წერტილად ფეხბურთი მოჩანდა: სპორტი იყო საშუალება ცხოვრების უკეთესად მოწყობისა. შესაძლოა მესების მამას არაერთხელ უფიქრია: როდრიგო ძლიერ ევროპულ კლუბში რომ გადავა, მის აგენტობას ჩემზე უკეთ ვერავინ იკისრებს, ჩემზე კარგად ვინ იცის რა სჭირდება, ან რას იმსახურებს ჩემი შვილიო. თუმცა მამას მალე მეორე საზრუნავი მოემატა - ლიონელმა ფეხი ნაადრევად აიდგა და 10 თვისა უკვე ძმებსა და დეიდაშვილებს დასდევდა.

მესი და მისი ძმები

ერთ დღეს პატარებმა უმცროს მესის ყურადღება სათანადოდ ვერ მიაქციეს და ლეოს სახლის წინ, ქუჩაში ველოსიპედი დაეჯახა. 10 თვის ბავშვს თავიდან არაფერი ეტყობოდა, თუმცა ღამით მარცხენა ხელი შეუსივდა და მშობლებმა უმალ საავადმყოფოში გააქანეს. ლეოს მოტეხილობა დაუდგინეს და ხელი თაბაშირში ჩაუსვეს.

არგენტინელებს დასვენების დღეები ქართველებივით უყვართ, კალენდარში ბევრი ასეთი დღე აქვთ. ზოგ შემთხვევაში კი ჩვენც გვჯობნიან. თავად განსაჯეთ: 21 ოქტომბერი არგენტინაში დედის დღეა, 17 ივნისი - მამის, 20 აგვისტო - პაპის, 12 ნოემბერი - ბებიის, 3 სექტემბერი - დეიდის. ახლობელთა კალენდარულ ციკლს მეზობლის დღე აგვირგვინებს: 11 ივნისი.

როგორც ხედავთ, არ გვხვდება ბავშვის დღე. თუმცა ეს არც უნდა გაგვიკვირდეს, რადგან არგენტინაში დაბადების დღე უყურადღებოდ არავის რჩება. ლეო მესი ერთი წლისა რომ შესრულდა, ისრაელის 525-ში დიდი წვეულება იყო. ვერსად ამოვიკითხეთ, რა აჩუქეს მშობლებმა პატარას, თუმცა ბიძებმა და დეიდამ მას "ნიუელს ოლდ ბოისის" მაისური მოუტანეს. უნდა ვივარაუდოთ, რომ ფორმა რაოდენ პატარაც უნდა ყოფილიყო, ერთი წლის მესის არ მოერგებოდა, მაგრამ აქ მთავარი სხვა რამაა: დეიდამაც წინასწარ იცოდა, რომელი გუნდის ქომაგად უნდა გაზრდილიყო მისი დისშვილი.

ვიდრე ოთხი წლისა გახდებოდა, ლეო თავისი ძმების ბურთებით ერთობოდა, საკუთარი საფეხბურთო ბურთი კი 4 წლისას ჰქონდა - მშობლებმა წითელ-თეთრი ბრჭყვიალა ბურთი მოუტანეს. მალე პატარის საქმეში ნახვის დროც დადგა. როგორც ჰორაციო მესი ამბობს, ერთ დღეს ქუჩაში როდრიგოსა და მატიასთან ფეხბურთის სათამაშოდ გავიდა. მანამდე მორცხვი ლეო დიდებს თავს არ აბეზრებდა, თავისთვის იდგა და შეჰყურებდა.

ამჯერად კი თამაში დაჟინებით მოითხოვა. ჰორაციომ თავის გუნდში აიყვანა და უფროსებს ისღა დარჩენოდათ გაოგნებულებს მიედევნებინათ თვალი ბურთთან მოცეკვავე ბავშვისთვის.

გაგრძელება იქნება

3839
მკითხველის კომენტარები / 4 /
Zviadi
1
Leo msopliohi ertaderti pexbyrtelia,esetebi saukunehi hemiazrit ertxel ibadebian xvtis nijit arian dajildovebulni,leo daibada 1987 clis 24 ivnis zapxulhi da ara zamtarhi rogorac giceriat mand utvino.
ანდრია
0
1987 წლის 24 ივნისს, ზამთრის სუსხიან დღეს არგენტინის მასშტაბით 15 აფეთქების ხმა გაისმა.

პ.ს. ამ კორონობის ჟამს, ძლივს არ გამეღიმა...
ლელოს მადლობა, თუ დრო და საშუალება გექნათ იქნებ სხვა ფეხბურთელების შესახებაც დადოთ
მსგავსი ამბები
რუბრიკის სხვა სიახლეები
;