[თავი I] ლიონელ მესის ბიოგრაფია: რატომ ჩხუბობდნენ ლეოს გამო მისი თანასკოლელები?

შესავალი:სიახლე Lelo.ge-ის მკითხველს! ლიონელ მესის ბიოგრაფია: 5 წლის ბავშვმა პირველ ვარჯიშზე დარტყმა ვერ გაბედა, შეეშინდა...

ბარსელონიდან როსარიომდე

ბილეთი შინისკენ

ბარსელონა-ბუენოს აირესი, ფრენის ხანგრძლივობა 17 საათი, ბილეთის ფასი... კატალონიის დედაქალაქში ლიონელ მესის მაგიდაზე გაშლილ საბუთებთან ერთად თვითმფრინავის ბილეთიცაა. ფეხბურთელი ჩანთას ალაგებს, სამშობლოში მიეჩქარება, ენატრება და, დედა, ძმები, ახლო ნათესავები, ორსართულიანი სახლი, რომელსაც მისი "ბარსელონაში" გადასვლის შემდეგაც ძველებური იერი აქვს შენარჩუნებული. ენატრება ბარსელონისგან განსხვავებული, როსარიოს მყუდრო ქუჩები, პატარა სკოლა... რატომ სკოლა და არა საფეხბურთო სტადიონი? დიდი განსხვავება არ არის - მესი ორივეგან ფეხბურთს თამაშობდა, "ნიუელს ოლდ ბოისის" სტადიონზე ტყავის ბურთით, სკოლაში - კონსერვის ყუთით.

ბარსელონაში "ნოუ კამპის" მოედანზე 90 წუთი ისე გარბის, ლეო თვალის დახამხამებას ვერ ასწრებს. ხოლო, როცა მაგიდაზე ესპანეთი-არგენტინის თვითმფრინავის ბილეთი უდევს, ყოველი წუთი საათივით მიიზლაზნება. ბოლოსდაბოლოს მაინც მოდის წამი, როცა ჩანთააკიდებულმა ბარსელონელმა აეროპორტის ლამაზმან თანამშრომელს ბილეთი უნდა გაუწოდოს, მორცხვად გაუღიმოს და...

...ვინ იცის, ოკეანესა და ცას შორის მერამდენედ გამოეკიდა ლეო მესი, რომლისთვისაც 17-საათიანი ფრენის შემდეგ ოკეანის სანაპიროდან მოშორებით აღმართული შევერცხლილი მთები იმას ნიშნავს, რომ მომქანცველი მგზავრობა სრულდება და თვითმფრინავი მალე ცხვირს არგენტინისკენ დაუშვებს.

ზედა წინადადებაში სიტყვა "ვერცხლი" შემთხვევით არ გაჩენილა: ეს ლითონი ლათინურად "არგენტუმია", როცა ევროპელი ზღვაოსნები ამერიკის სამხრეთ სანაპიროებს პირველად მიადგნენ, მოისმინეს ლეგენდა მთების შესახებ, სადაც დიდძალი ვერცხლი, ანუ "არგენტუმი" ინახებოდა. მას მერე ამ ქვეყანას არგენტინა დაერქვა. დღეს ვერცხლი აღარავის ახსოვს, არგენტინის ხსენებაზე თვალწინ ყველას დიეგო მარადონა და ლიონელ მესი წარმოუდგება.

[VIDEO] მესიმ TOP 5-ში რონალდოს გადაუსწრო


როდრიგო და ლეო

აეროპორტში ლეოს უფროსი ძმა როდრიგო დახვდა, რომელიც ოჯახის სხვა წევრებთნ ერთად ბარ VIP-ს პატრონობს. შავთმიან, არცთუ დაბალ როდრიგოს სიარულზე ეტყობა, თავის დროზე ფეხბურთელი უნდა ყოფილიყო.

ჰორაციო მესიმ და სელია კუჩიტინიმ ოთხი მესი კი "დაბადეს" (სამი ვაჟი და ერთი ქალი), მაგრამ ვარსკვლავად მხოლო ერთი იქცა. ლიონელს რომ ეკითხებიან, საფეხბურთო კერპების შესახებ, რამდენიმეს ასახელებს - მარადონას, აიმარს, საკუთარ ძმა როდრიგოს... ამით ბევრია ნათქვამი, მაგრამ არა ყველაფერი. მოვუსმინოთ "ნიუელსის" ყოფილ მწვრთნელ ოსკარ ლოპესს, რომელიც ძმებს "გრანდოლის სპორტულ ცენტრ #8-ში" ავარჯიშებდა:
- როდრიგო ძალიან კარგი ფეხბურთელი იყო, ზოგიერთის აზრით მას ლეოზე დიდი ფეხბურთი უნდა ეთამაშა. თუმცა დიდ სპორტს მხოლოდ ბუნებრივი მონაცემები არ ჰყოფნის: როდრიგო მენტალურად არ აღმოჩნდა ლიონელივით ძლიერი, ვერ მოახერხა ფეხბურთზე ფოკუსირება. აი, ეს იყო სხვაობა ძმებს შორის.

მესის ოსკარი არ ჰქონდა, ახლა უკვე აქვს...

ალბათ, სწორედ მენტალობა იყო მიზეზი, რომ ლეოს როდრიგო დახვდა და არა პირიქით. ასეა თუ ისე, ძმები ბუენოს აირესიდან როსარიოსკენ მიმავალ ავტობანს ("რუტა ნასიონალე 9") დაადგნენ, რომელიც მდინარე პარანას დაბლობს მიუყვება. დედაქალაქიდან სანტა ფეს პროვინციის მთავარ ქალაქ როსარიომდე 305 კილომეტრია. ასე რომ, გზის სისწორის გათვალისწინებით დანიშნულების ადგილამდე მისაღწევად 3 საათი საკმარისია.

მანქანის ფანჯრებიდან, ერთ მხარეს მოჩანს სიმინდის "პლანტაციები", მეორეს - სოიო, კარტოფილი... მდინარე პარანას დაბლობი სამხრეთ ამერიკაში ერთ-ერთი ყველაზე ნაყოფიერია. ლეო მესისთვის ეს სანახაობა მშობლიურია, იცის რა ელის გზის ბოლოს და მოუთმენლად ეძებს აბრას წარწერით "როსარიო". თუმცა 2000 წელს, როცა საპირისპირო მხარეს მიდიოდა, არც ბუენოს აირესს იცნობდა და მითუმეტეს, არც ბარსელონას. მისთვის ხომ ესპანეთი ისეთივე საიდუმლო მხარე იყო, როგორიც ქრისტეფორე კოლუმბისთვის - ინდოეთი.

კოლუმბს რა მიზნებიც ამოძრავებდა, კარგად ვიცით. საკითხავია, 13 წლის მესი რა მიზნით მიდიოდა ოკეანის გაღმა? ეს იმდენად მრავლისმომცველი თემაა, ცალკე ქვეთავი სჭირდება. ასეც რომ არ იყოს, ჩვენ ხომ ლეოსთან და როდრიგოსთან ერთად როსარიოსკენ მივემგზავრებით და არა ბარსელონისკენ.


გზა ბუენოს აირესიდან როსარიოსკენ


კეთილი იყოს შენი დაბრუნება ჩემპიონო!

როგორ შეხვდება მშობლიური ქალაქი უკვე სახელმოხვეჭილ ფეხბურთელს? დიდი ხანი არ არის, რაც არგენტინის ახალგაზრდულ ნაკრებს მსოფლიოს ჩემპიონატი მოაგებინა და მას მერე შინ პირველად ბრუნდება.

- როცა შევიტყვეთ, ლიონელი როსარიოში მოდიოდა, განსაკუთრებულად მოვემზადეთ, - მოგვითხრობს მესის თანაკლასელი სინტია არელანო, - უბანს ჩამოვუარეთ და ფული ავკრიბეთ, რათა საღებავები და ფეიერვერკები გვეყიდა. ასფალტზე დიდი ასოებით დავაწერეთ: ლეო, ერის სიამაყე! მის ქუჩაზე კი ბანერი გამოვფინეთ: კეთილი იყოს შენი დაბრუნება ჩემპიონო!

როსარიოელებმა იცოდნენ, რომ ფეხბურთელი ღამის პირველ საათზე უნდა ჩასულიყო, მაგრამ დაიგვიანა. მიუხედავად იმისა, რომ ზამთრის დღეები იდგა და ძალიან ციოდა, შინ არავინ წასულა, ყველა მოუთმენლად ელოდა მესის.

სინტია არელანი- ფურგონმა დილის ხუთ საათზე შემოუხვია. ხალხმა ფეიერვერკები გაუშვა და ერთხმად ყვიროდა - ლეო აქ არის, ლეო აქ არის! იგი მანქანიდან მორიდებით გადმოვიდა, ეტყობოდა, არ ელოდა ასეთ დახვედრას, თუმცა ძალიან გაუხარდა, ბედნიერი სახე ჰქონდა, - დასძენს სინტია.

მესის მშობლიურ ქალაქში ჟურნალისტებიც მოუთმენლად ელიან. მათგან ერთ-ერთი, გაზეთ "ლა კაპიტალის" როსარიოელი კორესპონდენტი მარიანო ბერეზინსკი ვარსკვლავს 2000 წლიდან იცნობს:

- მესიმანია 2005 წელს დაიწყო, როცა არგენტინის 20-წლამდელთა ნაკრებმა მსოფლიოს ჩემპიონატი მოიგო. მას მერე ყველაფერი შეიცვალა: მასმედიამ იგი ალყაში მოაქცია, ყველა ინტერვიუს აღებას, გამოლაპარაკებას ცდილობს, დასდევენ ფოტოგრაფები... რატომ ატყდა ასეთი ალიაქოთი? პასუხი მარტივია - არგენტინელები ასეთ ვარსკვლავს 1986 წლიდან ველით. ლაპარაკობდნენ აიმარზე, რიკელმეზე, ტევესზე, მაგრამ ჰოლანდიაში გამართულ ევროპის ახალგაზრდულ ჩემპიონატზე მესიმ ასაკის მიუხედავად მაღალი კლასი გამოავლინა და იქვე, ჰოლანდიაში "ნიდერლანდების" მეფე შეარქვეს.

მარიანო ბერეზინსკისთვის კარგადაა ცნობილი, რას ნიშნავს მშობლიური ქალაქი მესისთვის:

- ხალხი მის ნახვას როსარიოშიც ეშურება, მაგრამ ეს ქალაქი მისთვის მაინც შვების მომგვრელია. როსარიოში ხომ ოჯახის წევრები, ბევრი ახლობელი ჰყავს, რომლებთანაც სიმშვიდეს ჰპოვებს. ლეო აქ ისვენებს, ძალას იკრებს ბარსელონური მომაქცნველი ცხოვრებისთვის. მოკლედ, როსარიო ის ადგილია, სადაც მესი საკუთარ "აკუმულატორს მუხტავს".

როგორ ფიქრობთ, ოჯახისა და ფეხბურთის გარდა კიდევ რა შეიძლება მუხტავდეს ენერგიით ლიონელ მესის? - ბავშვობის ტკბილი მოგონებები.
შეკითხვა მკითხველს: სკოლის დამთავრების შემდეგ რა გრძნობით გაგივლიათ საკუთარი სკოლის წინ? არ გაგჩენიათ სურვილი შეგეხედათ საკუთარ კლასში, მოგეძებნათ მერხი, რომელზეც ოდესღაც საკუთარი, თუ შეყვარებულის გვარი დაგიწერიათ?

მესის თამაშის შემხედვარე ამბობენ უცხო პლანეტიდანააო, მაგრამ არ დაიჯეროთ. იგი ჩვეულებრივი ადამიანია, ჩვენნაირი გრძნობებით. ჰოდა, ბარსელონიდან როსარიოში ჩასულმა ოჯახის წევრებთან ურთიერთობით გული რომ იჯერა, საკუთარი სკოლის ნახვა მოისურვა. დეიდამისს სთხოვა, მასწავლებლისთვის ეკითხა, რომელი საათისთვის სჯობდა მისვლა. "ლას ჰერას 66-ე" სკოლა მესების სახლიდან ხუთი წუთის სავალზეა.

- ლიონელის დეიდამ, მარსელამ 16:10 საათზე დამირეკა და მითხრა, რომ მის დისშვილს ჩვენთან მოსვლა სურდა, - უთხრა ინგლისური გამოცემა "დეილი მეილის" ჟურნალისტ ალექს კეის 66-ე სკოლის მასწავლებელმა გრაციელა რიბოლდიმ, - მეორე დღისით ფეხბურთელის დანახვაზე მთელი სკოლა გადაირია. არგენტინაში ბავშვმა შეიძლება მსოფლიოში მიმდინარე მოვლენები არ იცოდეს, მაგრამ მესი ვინ არის, პირველკლასელმაც იცის. პატარები გარს შემოერტყნენ და ლეოს გადაადგილების საშუალებას აღარ აძლევდნენ. ყველა მის სახელს ყვიროდა. ბოლოსდაბოლოს, ჩვენი დახმარებით მესიმ თითქმის ყველა კლასში შეიარა და ბავშვების შეკითხვებს გულითადად პასუხობდა, ხელმოწერებს არიგებდა და მსურველებთან ფოტოებს იღებდა. პატარებში გარეული ლეო სკოლის მოსწავლეს ჰგავდა, მათსავით ინტერესიანი, მათსავით მორცხვი... ვარსკვლავმა მშობლიური სკოლა საღამოს 7 საათზე დატოვა.



- მესი მათემატიკაში არ ბრწყინავდა, მაგრამ ყოველთვის ყურადღებით მისმენდა და დავალებებს უპრობლემოდ ასრლებდა. იგი კლასში ყველაზე პატარა იყო და ხმადაბლა საუბრობდა, - ეს უკვე ლეოს მათემატკის მასწავლებლის ანდრეა სოსას სიტყვებია.

მიუხედავად იმისა, რომ საფეხბურთო ვირუსით იყო დაავადებული და ზოგჯერ მშობლებისთვისაც უთქვამს, სკოლაში არ წავალ, დავისვენებ, დღეს თამაში მაქვსო, მაინც ცდილობდა კლასში არავის ჩამორჩენოდა, არატიპიური ფეხბურთელი იყო. გადავხედოთ მის ნიშნებს 11 წლის ასაკში: მათემატიკაში ექვსიანი ეწერა, ესპანურ ენასა და მეცნიერებაში რვიანი, ხოლო სპორტში - მაქსიმალური ქულა, ათიანი.

მესი დავალებებს ხშირად კლასელ სინტია არელანოსთან ერთად ასრულებდა. გოგონას ახლაც ნათლად ახსოვს, თუ ვინმეს დაბადების დღეს, ან სხვა სახის ზეიმს ლეოს ფეხბურთი დაემთხვეოდა, მესი გადაწყვეტილებას ვარჯიშის სასარგებლოდ ღებულობდა. ამიტომაც იყო...

- სკოლის ეზოში, დიდი ხის გარშემო ბურთით თამაშის წინ გუნდების კაპიტნებს ჩხუბი მოსდიოდათ. ყველას უნდოდა ლეო აერჩია, რათა გამარჯვებაში დარწმუნებული ყოფილიყო. მესის ხომ უამრავი გოლის გატანა შეეძლო, - სინტია არელანოს არც ეზოს ამბები დავიწყებია.

ფეხბურთელის ვიზიტიდან რამდენიმე თვეში 66-ე სკოლაში კვლავ გაისმა ზარი მასწავლებლის, გრაციელა რიბოლდის ტელეფონზე. ამჯერადაც ლეოს დეიდა, მარსელა კუჩიტინი რეკავდა.

- მარსელამ მომიკითხა და პირდაპირ მითხრა - ლიონელი სკოლისთვის ფულის გამოგზავნას აპირებსო. ვიფიქრე, დაახლოებით 500 პესოს (50-მდე ევრო) გვაჩუქებდა. ჩვენთვის, ესეც მისაღები იქნებოდა, მაგრამ 7500 ევრო გადმოგვირიცხა. ძალიან გაგვეხარდა და ამ თანხით სკოლისთვის მერხები, ტელევიზორი შევიძინეთ და საფეხბურთო მოედანი გავაკეთეთ.

გაგრძელება იქნება

3587
მკითხველის კომენტარები / 0 /
რუბრიკის სხვა სიახლეები
;