თამაზ კოსტავა თავის აღზრდილზე: ჩაკვეტაძემ პირველივე ვარჯიშზე გამაოცა... [VIDEO]

გიორგი ჩაკვეტაძე, როგორც იტყვიან, დაფრინავს საქართველოს ნაკრებშიც და ბელგიის ჩემპიონატშიც. რა თქმა უნდა, ახალგაზრდა ფეხბურთელზე გადაჭარბებით წერა არ ვარგა, მაგრამ ჩვენ ფაქტი ვთქვათ - ბოლოს და ბოლოს, გამოჩნდა ქართველი ფეხბურთელი, ვის სანახავადაც ხალხი სტადიონზე დადის.

გიორგი ჩაკვეტაძის აღმზრდელი, მწვრთნელი თამაზ კოსტავაა - თბილისის "დინამოს" "ოქროს თაობის" ლეგენდარული წარმომადგენელი, ვინც აქტიური საფეხბურთო კარიერის დასრულების შემდეგ უკვე წლებია, სამწვრთნელო ჭაპანს ეწევა.

გუშინ "ლელო" თამაზ კოსტავას დაუკავშირდა და გიორგი ჩაკვეტაძეზე ჰკითხა - მის ბავშვობაზე, ხასიათზე, პირველ წარმატებაზე, ოდინდელ პარტნიორებზე...

ინტერვიუ რევაზ ძოძუაშვილთან: ჩაკვეტაძე თამაზ კოსტავამ აღზარდა... ახლა მე მინდა ვუთხრა მას, რომ...

- გუშინდელივით მახსოვს, გიორგი ჩაკვეტაძე ჩემთან რომ მოვიდა პირველად, - იხსენებს კოსტავა, - მისი პირველი მწვრთნელი გახლდათ აწ გარდაცვლილი გივი ლომიძე, ძალიან კარგი ადამიანი...

მერე ისე მოხდა, რომ მისი გუნდი მე ავიყვანე. თავიდანვე გამაოცა ამ ბავშვმა უდიდესი ნიჭით, თავმდაბლობითა და შრომისმოყვარეობით. ერთხელ არ ამიწევია მისთვის ხმა, ერთხელ არ მითქვამს, რა უგულოდ დარბიხარ-მეთქი... ყველა მასწავლებელი რომ ინატრებს, ისეთი მოსწავლე იყო ზუსტად. ფეხებში ხშირად ხვდებოდა. ამის მიუხედავად, არ მახსოვს, მსაჯისთვის ან მეტოქისთვის უხეშად მიემართა...

- თავიდანვე ნახევარმცველად ათამაშებდით?

- ხშირად თავდამსხმელადაც ვათამაშებდი და, სხვათა შორის, ეს ძალიან კარგად გამოსდიოდა. ნახევარდაცვაში კი სისტემატურად ვუცვლიდი ადგილებს. ამას ვაკეთებდი გამიზნულად. მას შეუძლია თამაში როგორც ნახევარდაცვის ცენტრში, ისე ორივე ფლანგზე. იმხელა ნიჭი აქვს, ყველგან კარგად გამოსდიოდა თამაში.

- თუ გახსოვთ გიორგის პირველი წარმატება?

- ტურნირი ჩატარდა 35-ე სკოლაში. ფინალურ შეხვედრაში მასპინძლებს ვეთამაშეთ. ამ თამაშს ალექსანდრე ჩივაძე დაესწრო. ისე ითამაშა გიორგიმ, ისეთი გოლები გაიტანა, საშამ პირდაპირ მკითხა - ვინ არის ეს მომავალი გენიოსიო? "ნორჩი დინამო" მაშინ ჩემპიონი გახდა. სიმბოლურია, რომ ეს ტურნირი დავით ყიფიანის ხსოვნისა იყო...

- ოჯახი და გიორგი ჩაკვეტაძე...

- მაგრად ედგნენ გვერდში. ძალიან უნდოდათ, რომ კარგი ფეხბურთი ეთამაშა. მამა, დედა, ორი ძმა... ჩვენც ყველანაირად ვიდექით მის გვერდით...

- რა არის ჩაკვეტაძის მთავარი პლუსი?

- არიან ძალიან ნიჭიერი ახალგაზრდები, რომელთათვისაც ფეხბურთი გართობა უფროა. გიორგის ფანატიკურად უყვარს ფეხბურთი.

- დღეს ხშირად გეხმიანებათ?

- იმდენად მორიდებულია, ჩემთან დარეკვაც კი ერიდება. ამას გულწრფელად ვამბობ. მეც იშვიათად ვურეკავ, არ მინდა, შევაწუხო. ისე კი ძალიან თბილი ურთიერთობა გვაქვს.

- როგორ ფიქრობთ, ჩაკვეტაძეს კიდევ შეუძლია მომატება?

- ჩემი აზრით, ერთ-ორ წელიწადში მას მკვეთრად შეუძლია მომატება. მას შეუძლია, სრულიად ახალ დონეზე გავიდეს. ნუ დავივიწყებთ მის ასაკს. ის ჯერ სრულიად ახალგაზრდაა და ყველაფერი წინ აქვს.

- გიორგი ერთადერთი იყო თავის გუნდში, ვინც მაღალ დონეზე ითამაშა?

- 1999 წელს დაბადებულებში ძალიან კარგი გუნდი გვყავდა. თითქმის ყველა შეხვედრას ვიგებდით. იმ გუნდში იყვნენ თბილისის დინამოელი ნიკა ნინუა, ლევან ბარაბაძე, ვინც ახლა "ცხინვალში" თამაშობს, "დილას" მეკარე ლუკა გუგეშაშვილი, მცველი ჯაბა კასრელიშვილი და სხვები...

ყოველდღიური სპორტული გაზეთი "ლელო"
6244
მკითხველის კომენტარები / 0 /
მსგავსი ამბები
რუბრიკის სხვა სიახლეები
;