თამაზ პერტაია: კარგად დავინახე, რა უნდა ვაისს...

უკვე 12 წელია, თამაზ პერტია ლატვიაში მუშაობს. 43 წლის სპეციალისტი თავის დროზე ამ ქვეყნის საუკეთესო მწვრთნელად აღიარეს, 2017 წელს კი სეზონის სიმბოლურ ნაკრებში დაასახელეს...

2016 წლიდან ის "ლიეპაიას" მთავარი მწვრთნელი იყო. ეს გუნდი პერტიამ აგვისტოში საკუთარი სურვილით დატოვა და ჯერჯერობით არსად მუშაობს...

ვფიქრობთ, საინტერესო იქნება ინტერვიუ კაცთან, რომელიც კარგად იცნობს ლატვიურ ფეხბურთს, ლატვია კი ერთა ლიგაში ჩვენი მეტოქეა...

გამიხარდა და გამიკვირდა კიდეც...

- ერთა ლიგაში საქართველოსა და ლატვიის ნაკრებთა შეხვედრის ემოციები ჯერაც არ გაცივებულა. საინტერესო იქნება თქვენეული შეფასება...

- საქართველომ თამაშით დაამტკიცა, რომ ჯგუფის ფავორიტია, მით უფრო, ყაზახეთში მოგებით. ჩვენმა გუნდმა ისე სოლიდურად ითამაშა, გამიხარდა და გამიკვირდა კიდეც.

ლატვიასთან მატჩში კი აშკარად დავინახე, რომ გუნდი შეიკრა და ეს ლევან კობიაშვილსაც ვუთხარი. ჩემთვის ისიც ბევრს ნიშნავს, რომ ახალგაზრდები თამამად გამოიყურებიან. ეს გამოცდილი მოთამაშეების - კანკავასა და სხვა ბიჭების დამსახურებაა.

საქართველოს ნაკრებში მოედანზე არავინ არავის ეჩხუბება, გუნდი ოჯახივით ერთსულოვანია... ეს კობიაშვილის გუნდისა და მთავარი მწვრთნელის დამსახურებაა. ფეხბურთელებმა იციან, რა უნდა გააკეთონ. წლებია, რაც მწვრთნელი ვარ და ასეთ დეტალებს ყოველთვის გამორჩეულად ვაკვირდები. მე, როგორც პროფესიონალმა მწვრთნელმა, ამ ორ შეხვედრაში კარგად დავინახე, რა უნდა ვაისს...

- ...და რა უნდა ვაისს?

- ნამდვილი ფეხბურთი! გუნდი ბურთს დაბლა აგორებს, მოკლე და საშუალო პასებს იყენებს. მთავარი, რაც შევნიშნე - ჩვენი გუნდი მოედნის ყველა მონაკვეთზე რიცხობრივ უპირატესობას ქმნიდა. სადაც ბურთი და ერთი ლატვიელი იყო, იქ ორი ქართველი ჩნდებოდა. პენალტის მომენტშიც კი, ჩაკვეტაძის გვერდით ჩვენი თავდამსხმელი მოძრაობდა. ეს არის ყველაზე მთავარი, რასაც ვაისმა მაიღწია.

- თუმცა ლატვიურ და ყაზახურ მედიას რომ გადავხედოთ, წერენ, რომ წაგების მიუხედავად, ჩვენზე უკეთესი გუნდი ჰყავთ...

- საქართველო 20 წელია ოფიციალურ შეხვედრებს ატარებს ლატვიასთან და ბევრად ძლიერი შემადგენლობებით ამ ოფიციალურ მატჩებში ერთხელაც ვერ მოიგო. ნავსი ვაისმა გატეხა და ეს დასაფასებელია. საქართველოს ნაკრებმა ამ ორ თამაშში საკმაოდ მაღალი კლასის ფეხბურთი აჩვენა. მე, როგორც მწვრთნელი, კარგად ვხედავდი, რომ მთავარმა მწვრთნელმა გუნდს საკუთარი ხელწერა დაატყო. ლატვიასთან თამაშზე 50 ათასი მაყურებელი რომ მოვა, ეს უკვე ყველაფერზე მეტყველებს.

ლატვია საშიშია, ანდორას კი, იმედია, გასაღებს მოვარგებთ

- ლატვიამ არაერთგვაროვანი შთაბეჭდილება დატოვა. თავიდან გუნდი საკუთარ კარზე იყო მიჯაჭვული, ბოლოს გაშმაგებით გვიტევდა...

- მიმაჩნია, რომ ლატვია საკუთარ პოტენციალს ვერ იყენებს, ზედმეტად მორიდებულია და დაკომპლექსებული თამაშობს. ტყუილად ფიქრობთ, რომ ფეხბურთელები არ ჰყავთ. უბრალოდ, ისეთ ფეხბურთს არ თამაშობენ, რაც საუკეთესოდ გამოსდით. წარუმატებლობის მიზეზი მხოლოდ ეს მგონია. თბილისში მათთვის ჩვეული თამაში მხოლოდ გოლის გაშვების შემდეგ დაიწყეს და გამოჩნდა, რომ შეტევაც საკმაოდ კარგად ეხერხებათ. საშიში გუნდია.

- როგორც ვიცი, ლატვიის ნაკრების რამდენიმე მოთამაშე თქვენი დაწინაურებულია.

- ასეთი თბილისში 8 მოთამაშე იყო, 7- ძირითადში და პლუს, შეცვლაზე შესული შაბალა. უმრავლესობა დუბლებიდან დავაწინაურე. მათი პოტენციალი კარგად ვიცი და ამიტომაც ვამბობ - უკეთესად თამაში შეუძლიათ.

- საინტერესოა, რა გუნდია ანდორა?

- ვერ ვიტყვი, რომ სწრაფად თამაშობენ და მორბენალი გუნდია. მაგრამ დაცვაში ისე კომპაქტურად ჯდებიან, მათ კართან შეღწევა ძალიან რთულია. ეს შარშან პორტუგალიასაც გაუჭირდა და ანდორამ მასთან კინაღამ ქულა მოიპოვა.

- ასეთ გუნდთან თამაში ყველას უჭირს...

- რა თქმა უნდა, მაგრამ დიდი იმედი მაქვს, საქართველოს ნაკრები მათ დაცვას გასაღებს მოარგებს.

რას ნანობს...

- მართალია, თითქოს მიკსუ პაატელაინენის დანიშვნამდე ლატვიის ნაკრების გაწვრთნას თქვენ გთავაზობდნენ?

- შემოთავაზება ნამდვილად იყო, მაგრამ უარი ვთქვი, რადგან მაშინ "ლიეპაიას" ვწვრთნიდი და არ მსურდა, საქმე შუა გზაზე მიმეტოვებინა, ორ გუნდში ერთად მუშაობაც არ გამოდიოდა და ეს არც მიმაჩნდა სწორად.

- არადა, ნაკრებში მუშაობა სულ სხვა სიმაღლე და პრესტიჟია...

- რა თქმა უნდა, მაგრამ ამას არ ვნანობ. სინანული სხვა რამის გამო მაქვს...

- რას ნანობთ?

- იმას, რომ საქართველოში დაბრუნება ვერ მოვახერხე.

- მართალია, თითქოს, ერთ-ერთ ასაკობრივ ნაკრებში მუშაობა შემოგთავაზეს?

- სწორედ ამას ვგულისხმობდი.

- რომელ ნაკრებში გიწვევდნენ?

- ახალგაზრდულში.

- ამ გუნდის ფეხბურთელებში პოტენციალს ხედავთ?

- ძალიან დიდ პოტენციალს ვხედავ. ქართველებს ფეხბურთის ნიჭი რომ გვაქვს, ეს საკამათო არ არის. ჩვენთან თაობები სულ იზრდებიან. აიღეთ ჩაკვეტაძე, ძალიან პერსპექტიული მოთამაშეა...

- მართალია, თითქოს "რუსთავში" მუშაობა შემოგთავაზეს?

- ეს იყო მეგობრების ლაპარაკი, ჩაალაგე ბარგი და ჩამოდიო. მაგრამ იქაც ანალოგიური მიზეზით არ ვიმუშავე და ახალგაზრდულ ნაკრებშიც. 12 წელია, რაც ლატვიაში ვარ, ქართულ რეალობას ახლა ნაკლებად ვიცნობ და ეს გაურკვევლობა მაბრკოლებდა. ახალი სეზონიდან მუშაობა ბევრად სასურველია, როცა გუნდს გაიცნობ, შენი გემოვნებით დააკომპლექტებ... ასეთ დროს გაურკვევლობა ნაკლებია.

ყოველდღიური სპორტული გაზეთი "ლელო"
1412
მკითხველის კომენტარები / 0 /
მსგავსი ამბები
რუბრიკის სხვა სიახლეები