თბილისის გრანპრი: ტედი რონერი განაცხადშია, იაპონელები ვერ მოდიან

დასრულდა განაცხადების მიღება თბილისის გრანპრიზე ძიუდოში, რომელსაც 30 მარტიდან 1 აპრილის ჩათვლით სპორტის ოლიმპიური სასახლე უმასპინძლებს. ტურნირში მონაწილეობისთვის განაცხადი მსოფლიოს 40 ქვეყანის 370-მა ძიუდოისტმა შემოიტანა. ამათგან 231 ვაჟია, 139 - ქალი.

რეგისტრირებულია ოთხივე დასახლებული კონტინენტი. ჩრდილო ამერიკიდან აშშ, კანადა და კუბა ჩამოვლენ, სამხრეთიდან - მხოლოდ ბრაზილიაა დაფიქსირებული. აფრიკას ოდენ გამბია წარმოადგენს, განა და სხვები კი არსად ჩანან. აზიას ძირითადად ცენტრალური და შუა ნაწილი წარმოაჩენს:

ყაზახეთი, ყირგიზეთი და უზბეკეთი, თუმცა არიან მონღოლეთი, ირანი და პალესტინაც კი. ავსტრალია ერთი ქალით გვეწვევა, ძირითად მასას კი ევროპელები შეადგენენ. მათგან თითქმის ყველა წამყვანი ქვეყანა გვესტუმრება: საფრანგეთი, ჰოლანდია, გერმანია, იტალია, რუსეთი, უნგრეთი, აზერბაიჯანი, სომხეთი, ბულგარეთი, ბრიტანეთი და სხვები...

სამწუხაროდ, არ იქნებიან იაპონია, კორეა, ესპანეთი. იაპონელებს ერთ კვირაში ქვეყნის ეროვნული პირველობა აქვთ და მათი ჩამოუსვლელობა გასაგებია. ცუდია, რომ ტურნირის თარიღს ჩვენი ფედერაცია ვეღარ სთავაზობს საერთაშორისო ფედერაციას და კალენდარი მთლიანად იმათზეა დამოკიდებული.

მონაწილეთაგან ჩვენი ვაჟთა ნაკრები ბოლომდე იყენებს მასპინძლისთვის დაწესებულ კვოტას და ყველაზე მეტი - 28 სპორტსმენი გვეყოლება, ქალებში კი 12 ათლეტია აღნუსხული. სტუმართათვის განკუთვნილ 14-კაციან კვოტას (წონაში 2 მონაწილე) ვაჟებში ბოლომდე მხოლოდ აზერბაიჯანი, საფრანგეთი და რუსეთი იყენებენ. ამასთან, რუსეთი ერთადერთია, ვინც ორივე სქესში 14-14 მონაწილით იქნება წარმოდგენილი. ვაჟებში 13 კაცი ჰყავს ჩაწერილი ყაზახეთს, 12 - გერმანიას, სხვებს კი 10-ზე ნაკლები მონაწილე ჰყავთ.

ქალებისა და ვაჟების გაერთიანებულ გუნდს თუ ავიღებთ, ცხადია, ყველაზე მეტი მონაწილე ისევ ჩვენ გვეყოლება - 40. შემდეგ მოდიან რუსეთი - 28, საფრანგეთი - 22, გერმანია - 21, აზერბაიჯანი და ყაზახეთი - 19-19, უნგრეთი და ბრიტანეთი - 17-17 და ასე შემდეგ.

იაპონია-კორეა ძიუდოში ძალის საზომია, თუმცა, წინასწარი განაცხადების მიხედვით, მათ გარეშეც საკმაოდ ძლიერი ტურნირი უნდა გამოვიდეს. მაგალითად, ფრანგებს განაცხადში ჰყავთ ევროპის ჩემპიონი ვალიდე ხიარი (60, ევროპის პრიზიორი პიერ დუპრატი (73), ევროპის ფინალისტი და ოლიმპიური მედალოსანი სირილ მარე, ევროპის მესამე პრიზიორი ალექსანდრ იდირი (ორივე - 100).

"მამლებს" განაცხადში ლეგენდარული ტედი რინერიც უწერიათ მძიმე წონაში, თუმცა ის ლამის ყველა ტურნირზეა ჩაწერილი, მაგრამ მერე არ ჭიდაობს ხოლმე. ვინძლო, ეს ტრადიცია ამჯერად დაარღვიოს და ამაზე უკეთეს ვის ვინატრებთ - თუ უნდათ, სხვები ნურც ჩამოსულან.

რუსებსაც ძლიერი გუნდი ჰყავთ ჩამოწერილი: ოლიმპიური და ევროპის სამგზის ჩემპიონი ბესლან მუდრანოვი, ევროპის ჩემპიონი რობერტ მშვიდობაძე (ორივე - 60), მსოფლიოსა და ევროპის მედალოსანი მუსა მოგუშკოვი (73), ალან ხუბეცოვი, ასლან ლაპინაგოვი (ორივე - 81), მიხაილ იგოლნიკოვი, ხუსეინ ხალმურზაევი (90), რინატ საიდოვი (+100)...

უნგრელთა 9-კაციან შემადგენლობაში არიან ევროპისა და მსოფლიოს ფინალისტი კრისტიან ტოტი (90), უბერებელი ოლიმპიადის ვიცე-ჩემპიონი მიკლოშ უნგვარი (73), ლასლო ჩოკნიაი (81) და სხვები. ბრაზილიელებსაც 9 კაცი ჰყავთ განაცხადში, თუმცა მათში წამყვანი ფალავნები არ არიან. სამაგიეროდ, ქალებში ჰყავთ ოლიმპიური ჩემპიონი სარა მენეზეში (48). ბრიტანელი ვაჟებიც ულიდერებოდ მოდიან, მაგრამ მოჰყავთ ლაშა ლეკიშვილი (66).

"მამლუქებიდან" მშვიდობაძე უკვე ვახსენეთ და ასევე იქნებიან ანრი ეგუტიძე (81) პორტუგალიიდან და თორნიკე ჭკადუა () ჰოლანდიიდან. ამეჯრად არ ჩამოდის ევროპისა და მსოფლიოს ჩემპიონი გიორგი ზანთარაია (66) უკრაინიდან, სამაგიეროდ, იასპარეზებს ნიკო საჯაია (73), ვინც ნელ-ნელა უშინაურდება იქაურ ეროვნულ ნაკრებს. ამჯერად არც თურქები ჩამოდიან და ვერც იქაურ ქართველებს ვნახავთ, ხოლო ბერძნებს დედით ქართველი ალექსიოს დანაციდისი (81) და აქედან წასული გეორგიოს აზოიდისი (73) ეყოლებათ.

ჰოლანდიელებს შემადგენლობაში ოლიმპიადის, მსოფლიოსა და ევროპის მრავალგზის მედალოსანი ჰენკ ხროლიც (100) ჰყავთ ჩაწერილი, ირანელებს - მსოფლიოს მესამე პრიზიორი საეიდ მოლაე (81), უკრაინელებს - ძლიერი მძიმეწონოსანი იაკივ ხამო და სტანისლავ ბონდარენკო, კუბელებს მსოფლიოს ჩემპიონი ეშლი გონსალესიც (90) ჰყავთ, მაგდიელ ესტრადა (73), ხოსე არმენტეროსი (100) და - ანდი გრანდიც (+100), ყაზახებს კი - მსოფლიოს ფინალისტი რუსტამ იბრაევი (60).

სავარაუდოდ, ვაჟებზე სუსტი კი არა, იქნებ, შარშანდელივით, უფრო ძლიერიც კი გამოდგეს ქალთა ტურნირი, სადაც ბრაზილიელ მენეზეშზე გითხარით და ფრანგებსაც "საბრძოლო რაზმი" უწერიათ: ევროპისა და მსოფლიოს ორ-ორგზის გამარჯვებული, ოლიმპიადის ფინალისტი კლარისე აგბეგნუ (63), ოლიმპიადის კიდევ ერთი ვიცე-ჩემპიონი, ევროპის ოთხგზის და მსოფლიოს ჩემპიონი ოდრი ჩუმეო, პარიზული "მუზარადის" წლევანდელი მედალოსანი მადელაინე მალონი (ორივე - 78), მსოფლიოს ბრინჯაოს მედალოსნები - ამანდინე ბუჩარი (52) და ჰელენ რეცევე (57, ევროპის მედალოსანი მარიე-ევა გაიე (70).

უნგრეთიც უძლიერესი გუნდით მოდის: ევროპის ორგზის ჩემპიონი, მსოფრლიოსა და ოლიმპიადის მედალოსანი ევა ჩერნოვიცკი (48), ევროპა-მსოფლიოს მედალოსანი ჰედვიგ კარაკასი (63), ევროპის პრიზიორი ჟაბინა გერცსაკი (70).

სხვათა განაცხადებშიც ბლომად შეგხვდებიან ყოჩაღი ქალები: გერმანელები - მარტინა ტრაიდოსი (63), ჟაუნდრა დიდრიხი (70), ლუისე მალზანი (78), კაროლინ ვაისი (+78), კანადელი კელიტა ზუპანჩიჩი (70), ბელგიელი როქსანე ტაიმანსი (70), ბელარუსი მარინა სლუცკაია (+78), უკრაინიდან აზერბაიჯანში გადაბარგებული ირინა კინძერსკა (+78), ხორვატები - ივანა სუტალო და ივანა მარანიჩი (ორივე - +78), ებრაელი გილი კოენი (52), უკრაინელები - მარია ჩერნიაკი (48), ანასტასია ტურჩინი (78) და კიდევ უამრავი სხვა.

ოღონდ ამ თემაზე საუბრისას აუცილებლად უნდა შევნიშნოთ ერთი სამწუხარო რეალობა: წინასწარი განაცხადი არ ნიშნავს, რომ ის სპორტსმენი აუცილებლად ჩამოვა. სავსებით შესაძლებელია, ნებისმიერმა მწვრთნელმა შეცვალოს განაცხადი, თუმცა გუნდების რაოდენობის ცვლილება უკვე თითქმის გამორიცხულია.

2691
მკითხველის კომენტარები / 0 /
მსგავსი ამბები
რუბრიკის სხვა სიახლეები
;