თბილისის გრან პრისთვის საქართველოს ქალ ძიუდოისტთა ნაკრებიც ემზადება

თბილისის გრან პრისთვის საქართველოს ქალ ძიუდოისტთა ნაკრებიც ემზადება, რომელიც ხვალ გორში ამ ტურნირისთვის მოსამზადებელ შეკრებას დაიწყებს.

ქალთა ნაკრების მთავარმა მწვრთნელმა გია თენაძემ თბილისში საჭიდაოდ წინასწარ შეიგულა ის შვიდეული, რომელთა გამოყვანასაც სალიცენზიო ტურნირებში აპირებს. თუმცა, როგორც ყოველთვის, სხვებმა ახლაც ითხოვეს თბილისში ჭიდაობა და მწვრთნელმა უარი არც მათ უთხრა, ორი სპორტსმენი - მარიამ ციხელაშვილი და მარიამ მახარაშვილი (ორივე - 48) დაამატა შემადგენლობას.

მსგავსი პრაქტიკა საშინაო ტურნირში მიღებული პრაქტიკაა - რაკი მგზავრობაში ფული არ ეხარჯებათ, მწვრთნელი მთხოვნელებს უარს არ ეუბნება (ცხადია, ვისაც რეალურად აქვს მცირეოდენი შანსი მაინც) და შანსს აძლევს. თუმცა სამართლიანობისთვის უნდა ითქვას, რომ მწვრთნელს ალღო არასოდეს შეშლია და ასე თხოვნით დაშვებულებს სენსაცია არ შემოუთავაზებიათ. ასეა თუ ისე, ამჯერად 48 კილოგრამში სამმა მონაწილემ მოიყარა თავი - ნატალია ყიფშიძე წინასწარ დასახელებულ შემადგენლობაშიც შედიოდა.

თბილისში ასევე იჭიდავებს ჭაბუკებში ევროპის ჩემპიონი და ქართველ ქალთაგან საჭიდაო სახეობებში პირველხარისხოვან შეჯიბრებებზე პირველი მედლის მომპოვებელი მზია ბებოშვილიც, ვინც ამჯერად 63 კილოგრამში იასპარეზებს. მოგეხსენებათ, მას ზედმეტი წონის პრობლემა აწუხებს, ამ პრობლემის მოგვარებამდე კი თენაძემ დასჯის მიზნით ბოლო შეჯიბრებები თელ ავივსა და პრაღაში გამოატოვებინა. თუმცა ამით პრობლემას დიდად არ ეშველა - ბებოშვილს 63-შიც კი გვარიანად უწევს წონის დაკლება. არადა, მწვრთნელი მას უნიჭიერეს ძიუდოისტად კი მიიჩნევს და დიდი სურვილი აქვს მისი ნაკრებში დაბრუნებისა, მაგრამ მიიჩნევს, რომ მისთვის უფრო ოპტიმალური 57 კილოგრამია, ხოლო თავისი ფიზიკური მონაცემებიდან 63-ში წარმატების ნაკლები შანსი აქვს.

ამათ გარდა, თბილისში იჭიდავებს ყველა ქალი ძიუდოისტი, ვისგანაც შედეგს ელოდებიან. მართალია, უფროსთა ტურნირში კი უწევთ გამოსვლა, თუმცა მათი უმეტესობა ჯერ ისევ ახალგაზრდული ნაკრების წევრია - ეთერ ლიპარტელიანი (57), მარიამ ჭანტურია (70) და სოფიო სომხიშვილი (+78).

როგორც შესავალში გითხარით, ქალთა ნაკრები ხვალ გორში დაიწყებს მზადებას თბილისის „დიდი პრიზისთვის“, მისი დასრულების შემდეგ კი ქალთა ნაკრები ადგილზე გაივლის ერთობლივ შეკრებას, მერე ანთალიაშიც იჭიდავებს იმავე რანგის შეჯიბრებაზე და იქაც მიიღებს მონაწილეობას ერთობლივ ვარჯიშებში, მერე კი ევროპის მეორე ახალგაზრდული ოლიმპიური თამაშებისთვის დაიწყებს მზადებას, რომელიც ივნისის ბოლოს მინსკში გაიმართება და რომელიც ძიუდოში ევროპის ჩემპიონატთანაა გათანაბრებული. იმ თამაშების შემდეგ გუნდი უკვე მსოფლიოს ჩემპიონატისთვის გააგრძელებს მზადებას და იმავე მოსამზადებელ ციკლში განსაზღვრულია შეკრების გავლა იაპონიაში, რაც ნამდვილად დიდად წაადგებათ ჩვენს ძიუდოისტ ქალებს.

საქართველოს ნაკრები
48 კგ. ნატალია ყიფშიძე, მარიამ ციხელაშვილი, მარიამ მახარაშვილი
52 კგ. მარიამ ჯანაშვილი, ტატიანა ლევიცკა-შუკვანი
57 კგ. ეთერ ლიპარტელიანი
63 კგ. მზია ბებოშვილი
70 კგ. მარიამ ჭანტურია
+78 კგ. სოფიო სომხიშვილი

ყოველდღიური სპორტული გაზეთი "ლელო"
403
მკითხველის კომენტარები / 0 /
მსგავსი ამბები
რუბრიკის სხვა სიახლეები
;