თბილისის გრან პრი - ისევ ულიდერებოდ ვიწყებთ, თუმცა ჭრიკიშვილი იჭიდავებს

მოახლოვდა ქართული ძიუდოსთვის ერთ-ერთი უმნიშვნელოვანესი შეჯიბრება - თბილისის გრან პრი, რომელსაც სპორტის ოლიმპიური სასახლე 29-31 მარტს უმასპინძლებს.

ტურნირში საჭიდაოდ უკვე დარეგისტრირებულია 53 გუნდი მთელი მსოფლიოდან. მათ შორისაა სეიშელის კუნძულებიც კი, რომელიც, ვგონებთ, პირველად მონაწილეობს ჩვენს ტურნირში.

წინასწარი მონაცემებით, შეჯიბრებაში დარეგისტრირებულია 410 ძიუდოისტი - 227 ვაჟებში და 183 - ქალებში. მათ შორის ყველაზე უფრო მრავალრიცხოვანი, ცხადია, ჩვენი ნაკრებია. თუმცა ვაჟთა გუნდის მთავარი მწვრთნელი ნოდარ მეტრეველი თუ სრულად იყენებს მასპინძლისთვის განკუთვნილ 4-კაციან კვოტას წონაში და 28 ძიუდოისტით წარსდგება საკუთარი მაყურებლის წინაშე, ქალთა ნაკრების მთავარი დამრიგებელი გია თენაძე მხოლოდ 9 შეგირდს გამოიყვანს.
სტუმართაგან ყველაზე მრავალრიცხოვანი დელეგაციით, 23 სპორტსმენით ფრანგები ჩამოდიან - 12 ვაჟი და 11 ქალი.

სამწუხაროდ, საქმეს ისეთი პირი უჩანს, რომ უცხოელებს უფრო მეტი ვარსკვლავი ეყოლებათ, ვიდრე - ჩვენ. წინასწარი განაცხადი არ ნიშნავს, რომ სიაში დასახელებული ძიუდოისტი აუცილებლად ჩამოვა - მწვრთნელს შეუძლია, რომელიმე წონაში შეცვალოს მონაწილე, თუმცა წონიდან წონაში განაცხადის ვადის ამოწურვის შემდეგ ვეღარ შეცვლის. ახლავეა ცნობილი, რომ ჩვენი ვაჟთა ნაკრები საშინაო შეჯიბრებაში გადახალისებული შემადგენლობით გამოვა, რაც უკვე ცუდ ტრადიციად იქცა - 90 კილოგრამის გარდა, არ ჭიდაობს ნაკრების არც ერთი პირველი ნომერი.

საქართველოს ნაკრები
60 კგ. თემურ ნოზაძე, ჯაბა პაპინაშვილი, ირაკლი კუპატაძე, ლუხუმ ჩხვიმიანი
66 კგ. ბაგრატ ნინიაშვილი, გიორგი გუგულაშვილი, გიორგი თუთაშვილი, ნიკო ჭიკაიძე
73 კგ. ფრიდონ გიგანი, ვალერი იაშვილი, გიოერგი ჩიხელიძე, ლაშა გიუნაშვილი
81 კგ. ტატო გრიგალაშვილი, კობა მჭედლიშვილი, გიორგი კაციაშვილი, ბექა დონღვანი
90 კგ. უშანგი მარგიანი, ავთანდილ ჭრიკიშვილი, გიორგი პაპუნაშვილი, იმედა გოგოლაძე
100 კგ. ონისე სანებლიძე, ლაშა ტაველური, გიორგი ბერიაშვილი, გიორგი ჩიქოვანი
+100 კგ. ლევან მატიაშვილი, გელა ზაალიშვილი, ონისე ბუღაძე, გიორგი ზაქარიაძე

ქალთა ნაკრები
48 კგ. ნატალია ყიფშიძე, მარიამ ციხელაშვილი, მარიამ მახარაშვილი
52 კგ. ტეტიანა ლევიცკა-შუკვანი, მარიამ ჯანაშვილი
57 კგ. ეთერ ლიპარტელიანი
63 კგ. მზია ბებოშვილი
70 კგ. მარიამ ჭანტურია
+78 კგ. სოფიო სომხიშვილი

ყოველდღიური სპორტული გაზეთი "ლელო"
2153
მკითხველის კომენტარები / 0 /
მსგავსი ამბები
რუბრიკის სხვა სიახლეები
;