თბილისის გრან პრი ჭრიკიშვილის, ლიპარტელიანის, ღვინიაშვილისა და მარგიანის გარეშე

სამწუხაროდ, კარსმომდგარი თბილისის გრან პრის წინ ჩვენს ძიუდოისტ ვაჟთა ნაკრებში ისევ დანაკლისია:

ევროპის სამგზის ჩემპიონის, მსოფლიოს ორგზის და ოლიმპიადის ვიცე-ჩემპიონ ვალერი ლიპარტელიანის (100) შემდეგ საბოლოოდ გადაწყდა, რომ საშინაო შეჯიბრებაზე ვერც ევროპის მესამე პრიზიორი ბექა ღვინიაშვილი (90) იასპარეზებს. თუმცა უსიამოვნებები ამით არ მთავრდება - ამავე წონაში დაგვაკლდება მსოფლიოს ბრინჯაოს მედალოსანი უშანგი მარგიანი.

დანაკლისია ქალთა ნაკრებშიც - ვერ იჭიდავებს მარიამ ციხელაშვილი (57).

ამათგან ღვინიაშვილის ამბავი დიდწილად აქამდეც გარკვეული იყო - მან ფეხის ტრავმა თებერვალში პარიზის გრანდ სლემზე მიიღო და ახლა საკითხავი ისღა რჩებოდა, მოასწრებდა თუ ვერა ამ ტურნირისთვის გამოჯანმრთელებას, მარგიანის ამბავი კი მოწმენდილ ცაზე გავარდნილი მეხივითაა.

მან ფეხი ერთ-ერთ ბოლო ვარჯიშზე იტკინა და ექიმების მონდომების მიუხედავად, ჯერაც ვერ მოირჩინა. ბედის ირონიით, ამ წონის ორივე ლიდერს ერთნაირი ტრავმა აქვს - ნაწილობრივ დაზიანებულია მყესი. რომ გაერისკათ, იქნებ გამაყუჩებლებით ეჭიდავა კიდეც, მაგრამ, დაგვეთანხმებით, ეს გაუმართლებელი რისკი იქნებოდა.

ამიტომ ექიმებმაც და მწვრთნელებმაც ამჯობინეს, ეს ტურნირი ორივეს გამოატოვებინონ და აქცენტი ევროპის ჩემპიონატზე გადაიტანონ, ვინძლო, იმ შეჯიბრებისთვის მაინც მოასწრონ გამოჯანმრთელება და ფორმაში შესვლა.

თბილისის ტურნირზე მათი შემცვლელებიდან ჯერჯერობით, მხოლოდ ერთის ვინაობაა ცნობილი - გიორგი გველესიანი, მეორეს კი მწვრთნელები დღეს დაასახელებენ.

რაც შეეხება ციხელაშვილს, მან ერთ-ერთ ვარჯიშზე იდაყვის ძვალი გაიბზარა. ტრავმა იმდენად სერიოზული იყო, რომ სასწრაფოდ ოპერაცია გაუკეთეს.
ვაჟთა ნაკრებს ამ სამეულის გარდა, კიდევ ერთი ლიდერი აკლდება და ბედის ირონიით, ისიც 90 კილოგრამში - არ იჭიდავებს ევროპის კიდევ ერთი სამგზის გამარჯვებული, მსოფლიოს ჩემპიონი ავთანდილ ჭრიკიშვილი.

თუმცა მისი გამოსვლა ხელის ტრავმის გამო ადრევე გამოირიცხა, სხვა ტიტულოვანი ფალავნები კი იასპარეზებენ. ყოველ შემთხვევაში, ჯერჯერობით სიაში რჩებიან ოლიმპიური და ევროპის ჩემპიონი ლაშა შავდათუაშვილი (73), ევროპის ჩემპიონი გურამ თუშიშვილი (+100), ევროპის ჩემპიონები, მსოფლიოს მესამე პრიზიორები ამირან პაპინაშვილი (60), ვაჟა მარგველაშვილი (66) და ადამ ოქრუაშვილი (+100), ევროპის ორგზის ფინალისტი ნუგზარ ტატალაშვილი (81), ევროპის ბრინჯაოს მედალოსნები - ზებედა რეხვიაშვილი და ლევან მატიაშვილი (+100).

გრან პრი თბილისის ოლიმპიურ სასახლეში 30 მარტიდან 1-ელი აპრილის ჩათვლით გაიმართება, მისი დასრულების შემდეგ კი ერთობლივი შეკრება ჩატარდება.

ჩვენი ნაკრების ლიდერებისა არ იყოს, თავად ტურნირსაც აკლდებიან მონაწილენი: გუშინ გვიან ღამის მონაცემებით, მონაწილეთა რაოდენობა უკვე 309 სპორტსმენამდე იყო შემცირებული. სამაგიეროდ, უცვლელია გუნდების რაოდენობა - თბილისში 39 ნაკრები ჩამოდის მსოფლიოს თითქმის ყველა კონტინენტიდან.

ამათგან ექვსს მხოლოდ ქალებში ჰყავს მონაწილე. ესენია ავსტრალია, კანადა, ხორვატია, ლუქსემბურგი, სერბეთი და სლოვენია.

შედარებით მეტია საპირისპირო კატეგორიის ქვეყნების რიცხვი: სომხეთი, აზერბაიჯანი, ბელგია, კუბა, კვიპროსი, ესტონეთი, გამბია, ირანი, ყირგიზეთი, პალესტინა, უზბეკეთი.

წინასწარი მონაცემებით და სახელობითი სიებით, ქალთა ტურნირი, შესაძლოა, ვაჟებისაზე ძლიერიც გამოდგეს. ისე კი ვაჟებში უფრო მეტი მონაწილეა დარეგისტრირებული - 188, ხოლო ქალებში - 121.

ოლიმპიურ სასახლეში, საბურთალოზე დასწრება ამჯერადაც თავისუფალი იქნება. შეჯიბრების დასაწყისად რეგლამენტში 10 საათია მითითებული, თუმცა ეს თარიღი, შეიძლება, შეიცვალოს. ეს დამოკიდებულია მონაწილეთა რაოდენობაზე და საბოლოოდ წილისყრის შემდეგ დაზუსტდება, დილით რომელ საათზე დაიწყოს ასპარეზობა.

თბილისში წუხელ უკვე ჩამოვიდოდნენ ოფიციალური სტუმრები - ძირითადად მაღალჩინოსნები ძიუდოს საერთაშორისო თუ ევროპული ფედერაციებიდან, სხვადასხვა კომიტეტ-სამსახურების წარმომადგენლები, ეროვნული ფედერაციების ხელმძღვანელები, მონაწილე გუნდები კი დღეს - დღის განმავლობაშიც და ღამითაც ჩამოვლენ.

ყოველდღიური სპორტული გაზეთი "ლელო"
786
მკითხველის კომენტარები / 0 /
მსგავსი ამბები
რუბრიკის სხვა სიახლეები