თბილისის 'დინამოს' ყოფილი ფეხბურთელი ბორის გონჩაროვი, ამერიკაში მწვრთნელობას აპირებს

ბორის გონჩაროვი ამერიკაშია და უახლოეს პერიოდში იქაურ საფეხბურთო სკოლაში მუშაობას აპირებს.

თბილისის "დინამოს" ყოფილი ფეხბურთელი რამდენიმე ქართულ კლუბში თამაშობდა - თბილისის "არსენალში", "ლოკომოტივში", ქუთაისის "ტორპედოში" (სადაც საქართველოს ჩემპიონი გახდა), ფოთის "კოლხეთში", ბოლნისის "სიონში"... აქ მან ვერცხლის მედალი მოიპოვა და 18 გოლით ჩემპიონატის საუკეთესო ბომბარდირებში მეორე ადგილზე გავიდა.

2005-09 წლებში ის თბილისის "დინამოში" ჩაირიცხა, სადაც საქართველოს ჩემპიონის ტიტულს მეორედ დაეუფლა. მერე იყო აზერბაიჯანული "მასალი" და ახალციხის "მესხეთი".

აზერბაიჯანში წასვლამდე საფეხბურთო სკოლა "ავაზაში" (2009-10) რამაზ მუმლაძესთან ერთად მუშაობდა. კარიერა 2010 წელს "მესხეთში" დაასრულა, მანამდე ერთი წლით ადრე კი სამწვრთნელი ლიცენზირების კურსი გაიარა: ჯერ B ლიცენზიის მფლობელი გახდა, ხოლო 2013 წელს - A ლიცენზიის.

ის წარმატებით მუშაობდა თბილისური კლუბის საფეხბურთო აკადემიაში. თუმცა, მანამდე ბედი სხვაგანაც სცადა: პირველი ნაბიჯები "ავაზაში" გადადგა, საიდანაც რუსთავის "მეტალურგში" მთავარ მწვრთნელად დანიშნულმა რამაზ მუმლაძემ ასისტენტად (2011-2012) წაიყვანა.

აქ ის ჩემპიონატის ბრინჯაოსა და ვერცხლის მედლების, ასევე, სუპერთასის მფლობელი გახდა. მერე მწვრთნელები შეიცვალნენ, თუმცა თორნიკე მაისურაძემ და კობა ჟორჟიკაშვილმა გონჩაროვი გუნდში დატოვეს. 2013-14 წლების სეზონში ის ბათუმის "დინამოში" იმავე ჟორჟიკაშვილს ეხმარებოდა.

"დინამოს" აკადემიაში 2016 წლის მარტში მიიწვიეს, სადაც 2017 წლამდე იყო და 2003-წლიანების ნიჭიერ თაობას ავარჯიშებდა. გონჩაროვის ხელმძღვანელობით გუნდმა მახაჩყალის საერთაშორისო ტურნირზე, "კასპიან ქაფზე" ითამაშა და საქართველოში მთავარი პრიზით დაბრუნდა.
...მაგრამ შარშან, გონჩაროვმა საქართველო დატოვა და მუშაობის გაგრძელება ამერიკაში გადაწყვიტა.

"თბილისის "დინამოში" მუშაობა ჩემთვის დიდი ბედნიერებაც იყო და პატივიც. არასოდეს დავივიწყებ ამ თუ სხვა კლუბში ყოფნის პერიოდს, რადგან ისინი მწვრთნელად ჩამოყალიბებასა და განვითარებაში დამეხმარნენ. დიდებშიც მიმუშავია და პატარებშიც. ასე რომ, გამოცდლება დამიგროვდა.

მაგრამ შარშან წამოვედი, რადგან ამერიკაში ძალიან სერიოზული საფეხბურთო პროგრამა დაამტკიცეს და დარწმუნებული ვარ, ამერიკელები რომ მოინდომებენ, იმას განახორციელებენ კიდეც. აქ უდიდესი შესაძლებლობებია და ცხადია, ჩემი გადაწყვეტილება სწორედ ამან განაპირობა.

ახლა ამერიკის ყველა რეგიონში უფასო საფეხბურთო სკოლები გაიხსნება, როგორც ეს თბილისის "დინამოს" აქვს. ლამის 300-მილიონიანი ქვეყანაა, ათასი ეროვნების ხალხია და ბევრი ნიჭიერი ბავშვია. მათი მომზადება ერთიან სისტემაში რომ მოექცევა, დარწმუნებული ვარ, ადრე თუ გვიან ამერიკა მსოფლიოს ჩემპიონატებზე თავის სიტყვას იტყვის", - ამბობს გონჩაროვი.

ვეტერანი ფეხბურთელის თქმით, ახლა სამუშაო უფლების მიღებას ელის: "ამჟამად, ბრუკლინის საფეხბურთო სკოლა ჩიტყ ცყცლონეს სოცცერ ცლუბ-ში ბავშვებს ვავარჯიშებ. აქ დამფუძნებელი პაატა დათუნაიშვილია. თუმცა ეს შტატგარეშე სამუშაოა და ოფიციალურად ველოდები მუშაობის უფლებას, შტატში რომ ჩამსვან.

გაოცებული ვარ, აქ ისეთი ინფრასტრუქტურა და პირობებია - ბუნებრივ საფარზე ვარჯიში ბავშვებისთვისაც ისეთივე ჩვეულებრივი ამბავია, როგორც - პროფესიონალებისთვის.

ზამთარში ცივა და დარბაზში სტანდარტულ მოედანზე ივარჯიშებ, აღდგენები თუ სამედიცინო მომსახურება უმაღლეს დონეზეა. თანაც, ძალიან კეთილგანწყობილი და მეგობრული სამყაროა.

შრომა თუ არ გეზარება, მიგიღებენ და დაგაფასებენ. მწვრთნელს განვითარება და გაზრდა რომ გინდა, საამისოდ ასეთი გარემო მისწრებაა. იმედია, ჩემთვის ახალ სამყაროში თავის დამკვიდრებას მოვახერხებ".

ყოველდღიური სპორტული გაზეთი "ლელო"
840
მკითხველის კომენტარები / 0 /
რუბრიკის სხვა სიახლეები
;