თბილისის დინამო თურქულ შეკრებაზე უკრაინულ ვორსკლასთან დამარცხდა

თბილისის "დინამომ" თურქულ შეკრებაზე მესამე ამხანაგური მატჩი გამართა. საქართველოს ვიცე-ჩემპიონი უკრაინის პრემიერლიგის მესამეადგილოსან "ვორსკლას" დაუპირისპირდა. უკრაინული გუნდის სასტარტო შემადგენლობაში იყო საქართველოს ნაკრების ნახევარმცველი სანდრო კობახიძე.

დინამოელებმა ორი განსხვავებული ტაიმი ჩაატარეს. მე-10 წუთზე თბილისელები ბუდუ ზივზივაძის გოლით დაწინაურდნენ და ამას გარდა, არაერთი სახიფათო მომენტიც შექმნეს ბოგდან შუსტის კართან.

ტაიმის ბოლოს "დინამოს" კარში 11-მეტრიანი დაინიშნა და ვიაჩესლავ შარპარმა ანგარიში გაათანაბრა. მეორე ტაიმში, მეკარე დემეტრე ბულისკერიასა და სინჯებზე მყოფი ტერენტი ლუცევიჩის (მასზე ქვემოთ) გარდა, კახა კაჭარავამ მთელი გუნდი შეცვალა და ახალგაზრდებს თავის გამოჩენის შანსი მისცა.

პოლტაველთა გამოცდილ შემადგენლობასთან ქართველ ახალგაზრდებს გაუჭირდათ და კიდევ სამი გოლი გაუშვეს. მომდევნო და პირველი თურქული შეკრების ბოლო მატჩს

"დინამო" 6 თებერვალს ტულის "არსენალთან" გამართავს.


დინამო: ბულისკერია, რუხაია, თოთაძე, ლუცევიჩი, ხარაბაძე, ქარდავა, ივანისენია, შულაია, ო. კიტეიშვილი, ივანიშვილი, ზივზივაძე;

მეორე ტაიმში შევიდნენ: გაბიტაშვილი, უგრეხელიძე, ბ. ხარშილაძე, ძოწენიძე, გადრანი, კუცია, დარცმელია, პ. კიტეიშვილი, ბაბუნაძე, ნინუა, ერგემლიძე, გ. ხარშილაძე, გაბუნია.

ვორსკლა (სასტარტო): შუსტი, დალკუ, ჩიჟოვი, პერდუტა, საპაი, კრავჩენკო, შარპარი, კობახიძე, რებიონოკი, კოლომოეცი, ვასინი.


თბილისის "დინამოს" შემადგენლობაში 26 წლის ბელარუსი ფეხბურთელი ისინჯება. ტერენტი ლუცევიჩს თამაში შეუძლია როგორც მცველის, ისე თავდამსხმელის პოზიციაზე.

სხვადასხვა დროს ასპარეზობდა "მინსკის", მინსკის "დინამოს", "გომელის", "ბერიოზას", "ტორპედო ბელაზისა" და ფერღანის "ნეფთჩის" შემადგენლობაში. ბოლოს ის ისევ "მინსკის" ღირსებას იცავდა.

უფრო საინტერესოა მისი წარმოშობა. ის ბელარუსი დედისა და კამერუნელი მამის შვილია. მისი მეორე გვარ-სახელია ვოგბა ტიენჩენი. ის 1991 წლის 19 აპრილს დაიბადა კამერუნის ქალაქ დუალაში და ექვსი თვის იყო, როცა მამა გარდაეცვალა, დედამ კი კამერუნიდან ბელარუსში წაიყვანა საცხოვრებლად.

ბელარუსში მას ბებია, ანასტასია ლუცევიჩი ზრდიდა, ხოლო დედა კამერუნში დაბრუნდა. 6 წლისა შევიდა ფეხბურთზე. 2013 წელს აიღო პასპორტი ახალი გვარ-სახელით. მოინათლა მართლმადიდებლად.

ყოველდღიური სპორტული გაზეთი "ლელო"
503
მკითხველის კომენტარები / 0 /
მსგავსი ამბები
რუბრიკის სხვა სიახლეები