თბილისის 'ლოკომოტივის' ფიზმომზადებას იტალიელი მიხედავს

თბილისის "ლოკომოტივს" ფიზმომზადების ახალი მწვრთნელი ჰყავს - კლუბის პრესსამსახურის ცნობით, ოთარ საბანაძე რიკარდო დე ვივომ შეცვალა.

37 წლის იტალიელი სპეციალისტი საქართველოში მეორედ ჩამოვიდა. 5 წლის წინ, რიკარდო დე ვივო ჯერ "დინამოს" საფეხბურთო აკადემიის ასაკობრივი გუნდების, სარეზერვო და მეორე გუნდის ფეხბურთელთა თბილისის "დინამოს" აკადემიაში მუშაობდა, ხოლო შემდეგ "დინამოს" ფიზმომზადების მწვრთნელად დაინიშნა.

ასე რომ, იტალიელი სპეციალისტისთვის ქართული გარემო უცხო არ არის და აქაურ საფეხბურთო სპეციფიკას კარგად იცნობს.

"გასულ კვირას კლუბის დირექტორთან ვილაპარაკე, რომელმაც "ლოკომოტივის" განვითარების ხედვა გამაცნო. ეს შესანიშნავი პროექტია, რომელიც "ლოკომოტივს" განვითარების შესაძლებლობას მისცემს.

კლუბი ცდილობს, წინ წავიდეს და უფრო ძლიერი გახდეს. ეს იყო მოტივაცია, რის გამოც თბილისში კიდევ ერთხელ ჩამოვედი. მჯერა, ამ ინფრასტრუქტურისა და განვითარების პირობებში, გუნდი კიდევ უფრო უკეთესი გახდება. პირველი კვირაა, რაც ფეხბურთელებთან ერთად ვმუშაობ. ყველა მათგანი დისციპლინირებული და შრომისმოყვარეა. მჯერა, მათ შეუძლიათ მოუმატონ და გახდნენ კიდევ უფრო ძლიერები და სწრაფები" - ამბობს იტალიელი სპეციალისტი.

რიკარდო დე ვივომ "ლოკომოტივის" დღევანდელ შემადგენლობასა და მომზადების გეგმებზე ილაპარაკა: "მიმაჩნია, რომ ფეხბურთელთა დღევანდელი ბირთვი დამაკმაყოფილებელია.

კარგია, რომ ისინი მთელი კვირა ხარისხიანად ვარჯიშობენ. მომდევნო კვირას დატვირთვები კიდევ უფრო გაიზრდება, რაც მოთამაშეებს სისწრაფისა და ძალის გაუმჯობესებაში დაეხმარება.

მთავარი მიზანია, რომ უკლებლივ ყველა ფეხბურთელმა 90 წუთის განმავლობაში მაღალ ტემპში თამაში შეძლოს და ტრავმირებულები არ გვყავდეს. ეს მთავარ მწვრთნელს შესაძლებლობას მისცემს, შემადგენლობაში სასურველი ფეხბურთელები ათამაშოს. სწორედ ესაა ჩვენი მიზანი".

ყოველდღიური სპორტული გაზეთი "ლელო"
1129
მკითხველის კომენტარები / 0 /
მსგავსი ამბები
რუბრიკის სხვა სიახლეები
;