[თემა განსჯისთვის] რატომ არის ეროვნული ლიგა სერიალებზე ყურებადი, რატომ გაჩნდა ზედმეტი მოლოდინები და საჭიროა თუ არა ფინანსური ფეარ პლეი?

ჯერ ზამთარია და არათუ სეზონი არ განახლებულა, გუნდები ჯერ მოსამზადებლად მოედანზეც არ გასულან. მაგრამ სანამ მსაჯი ჩასტვენს და პირველი ტურის თამაშები გაიმართება, საინტერესოა ის საკითხები, რომლიც ამჟამად ქართულ კლუბებს აწუხებს...

ფინანსური ფეიარ პლეი

"ბენდელას" სტადიონზე გამართულ პრესკონფერენციაზე, სადაც "საბურთალოს" ახალი მწვრთნელი წარადგინეს, თბილისური კლუბის პრეზიდენტმა ტარიელ ხეჩიკაშვილმა საქართველოს თასის მფლობელის ფინანსურ მდგომარეობაზე ილაპარაკა და ამის შემდეგ ზოგადად მნიშვნელოვან თემებსაც შეეხო. ჩვენ შეგნებულად ავუარეთ გვერდი ამ თემას პრეზენტაციისადმი მიძღვნილ მასალაში და ახლა აქ განვიხილავთ დაწვრილებით...

აი, რა თქვა ხეჩიკაშვილმა: "რას მოვახმართ ევროთასებიდან შემოსულ თანხებს? ეს მხოლოდ 4 მილიონი იქნება. კლუბის გასული წლის ბიუჯეტი კი 11 მილიონი იყო. ამაზე უკეთესი ბიუჯეტი ახლა აზერბაიჯანში 3-4 კლუბს თუ აქვს. რას შეეხება ინფრასტრუქტურას, ჩვენ წლების წინ იჯარით ავიღეთ სამედიცინო ინსტიტუტის მოედანი და როგორც ხედავთ, საფეხბურთო ცენტრად ვაქციეთ. ცხადია, ამის და, ზოგადად, ინფრასტრუქტურის განვითარებას ვფიქრობთ. ჩვენ აქტიურად ვთანამშრომლობთ სხვადასხვა კომპანიასთან, კლუბს ჰყავს რამდენიმე სპონსორი... გემახსოვრებათ, როც პირველ ლიგაში ვთამაშობდით, მაშინაც მრავლად გვყავდა პარტნიორი. ეს ყველაფერი სწორი მენეჯმენტისა და სწორი მუშაობის შედეგია", - ამბობს "საბურთალოს" პრეზიდენტი.

შემდეგ მან თემა გაშალა და საინტერესო საკითხებს შეეხო, მაგალითად, ილაპარაკა ეროვნულ ლიგაში ფინანსური "ფეარ პლეის" აუცილებლობაზე:

"საერთოდ, დროა ფინანსური "ფე პლეის" საკითხი დაისვას. არასწორი კონკურენციით მოთამაშეთა ფასები დაუსაბუთებლად იზრდება. ის, რაც "ტორპედოში" მოხდა, სხვებისთვისაც მაგალითი უნდა იყოს. ჩვენ ეროვნულ ლიგის კლუბების შეხვედრაზე სწორედ ფინანსური "ფე პლეის" დაცვის აუცილებლობაზე დავსვით საკითხი, ანუ, ის, რომ ზოგიერთ კლუბში ხელფასები ხელოვნურად იყო გაზრდილი - ფეხბურთელი 3 ათასს რომ იღებდა, უცებ ბევრად მეტი ხელფასი დაუნიშნეს. ფეხბურთელებიც კმაყოფილები არიან, გასამრჯელოს გაზრდაზე უარს ვინ იტყვის?.. ეს არის ყველაზე დიდ შეცდომა და საფრთხე და ამ საფრთხის წინაშე ყველა გულანთებული ინვესტორი დადგება. ამიტომ, კლუბებმა მაღალი ხელფასების გაცემისას საბანკო გარანტიები უნდა წარმოადგინონ".

"ლელოსთან" კომენტარში ხეჩიკაშვილმა ამის თაობაზე საინტერესო მაგალითები მოიყვანა: "ასე ხდება გერმანიაში, რომელიც რეგულაციების ყველაზე კარგი მაგალითია. "ბაიერნი" ერთ ფეხბურთელსაც ვერ დაიმატებს, თუ მისი შემოსავალი დასაბუთებელი არ არის, თუ კონტრქტის მიღმა ფინანსური გარანტიები არ დგას. ჩვენ კი ყველა დანახარჯზე პასუხისმგებლები ვართ. "საბურთალოში" ფინანსურად სტაბილური მდგომარეობაა, არავის დავალიანება არ გვაქვს და არც ხელფასებს ვაგვიანებთ. მაგრამ თუ შემოსავლების მიღების სისტემა არ შეიქმნება და ზოგან ხელფასების დაუსაბუთებლად გაცემის პრაქტიკა არ შეწყდება, ეს კონკურენტულ გარემოს მოკლავს და ბოლოს იგივე მოხდება, რაც ქუთაისის "ტორპედოს" შეემთხვა. თუ არ განხორციელდება ტრანსფერები და შემოსავლების წყარო არ გაჩნდება, ჩვენ კი არა, ყველა კლუბს შეექმნება პრობლემ. ჯგუფში მოხვედრა პირველივე წეს გვსურს, მაგრამ ამისთის 3-წლიანი გეგმა დავისახეთ, რომ ზედმეტი მოლოდინები არ შეიქმნას".

30 ათასი დოლარიც გადაგვიხდია...

დეკემბერში, "დინამო არენის" მედიადარბაზში გამართულ პრეზენტაციაზე, თბილისის "დინამოს" პრეზიდენტმა რომან ფიფიამ კლუბში ლეგიონერების დამატებაზე ილაპარაკა და არ დამალა, რომ აქამდე ჩამოყვანილ უცხოელთა უმრავლესობამ იმედები გაუცრუა. სწორედ ამ დროს თქვა მან ის, რაზეც ყურადღება არ გამახვილებულა, არადა, თემა უმნიშვნელოვანესია.

"დარწმუნებული ვარ, ჩემზე უკეთ იცით, რა ხდება ჩვენს ქვეყანაში. აქ კარგი ლეგიონერის ჩამოყვანა პრობლემაა, რადგან არ უნდათ ჩამოსვლა. დიდი ხელფასის გადახდა არ ნიშნავს, რომ მაღალი დონის ფეხბურთელია. უნდა ჩამოვიყვანოთ გამოცდილი ფეხბურთელი, რომელიც ძირითად შემადგენლობაში ვერ ხვდება და ბალანსი უნდა შევინარჩუნოთ ხელფასსა და ხარისხს შორს, რაც იოლი არ არის. მაგრამ ვეცდებით, ამ ბალანსს როგორმე მივაღწიოთ", - თქვა მაშინ ფიფიამ.

მან გაამხილა, თუ რამდენს უხდიდა "დინამო" ყოფილ ლეგიონერებს: "9 წელია "დინამოში" ვარ, ამ ხნის განმავლობაში 100-მდე ლეგიონერი ჩამოვიყვანეთ. მათ სხვადასხვა ოდენობის ანაზღაურება ჰქონდათ - დაწყებული 5 ათასიდან და დამთავრებული - 30 ათასით. საუკეთესო იყო ჩისკო, დანარჩენებმა კი როგორ ითამაშეს, თავადაც კარგად იცით. ეს გამართლებაზეცაა დამოკიდებული. გვინდა 4-5 ლეგიონერის ჩამოყვანა და ვნახოთ, რა გამოგვა".

ანუ, წარმოგიდგენიათ, რომელიმე ქართველმა ფეხბურთელმა ევროპის რომელიმე კლუბში 30 ათასი დოლარი რომ აიღოს, რა კმაყოფილი იქნება?! რეალურად, უფრო მეტს უცხოეთში ორიოდე ჩვენებური თუ იღებს. ის ფეხბურთელები, რომლებიც ტოპსაფეხბურთო ქვეყნებში გაიზარდნენ და ვერაფერს მიაღწიეს, აზიისა და ამერიკის გუნდებში ამხელა შემოსავლების საფასურად სიამოვნებით მიდიან. და ამ ყველაფრის შემდეგ საქართველოში ანალოგიურ გასამრჯელოზეც კი რომ არ მოდიან, ეს ჩვენი ლიგის ირიბი დახასიათებაა.

ქართული ფეხბურთის იმიჯი უეფას და ფიფას რეიტინგებში საამაყოდ ვერ გამოიყურება. უეფას რეიტინგში 55 ქვეყანას შორის 44-ე ადგილზე ვართ, ხოლო  ფიფას კლასიფიკაციაში ასეულს ვასრულებთ.

ჩვენი ფეხბურთელები ყაზახეთსა და აზერბაიჯანში ფულის გამო მიდიან. მაგრამ არა მხოლოდ ამიტომ - იმიტომაც, რომ ამ ქვეყნებში ბოლო წლებში წარმატებული კლუბები ჩამოაყალიბეს - "ასტანა", "ყარაბაღი" და პერიოდულად "ნეფთჩი" და "გაბალაც". ახლაც, ჩვენი ჩემპიონატის ერთ-ერთი გამორჩეული მოთამაშე და საუკეთესო ბომბარდირი ლევან კუტალია ყაზახეთის პრემიერლიგის მერვეადგილოსან კლუბში გადასვლას დათანხმდა. სხვას რომ თავი დავანებოთ, საქართველოს ნაკრების სამი მოთამაშე - ჯაბა კანკავა, ნიკა კვეკვესკირი და გუჯა ლობჯანიძე იქვე, ყაზახეთის მთავარ ლიგაში თამაშობენ.

საქართველოში, ჯერჯერობით, ასეთი წარმატებული კლუბი დამოუკიდებლობის პერიოდში არ ჩამოყალიბებულა - გამონაკლისი გია გეგუჩაძის 2004 წლის ფორმაციის თბილისის "დინამო" იყო. მაგრამ გამონაკლისი ამიტომაც ვთქვით, რომ ამაში კანონზომიერება არ იყო. ამიტომაცაა, ფეხბურთელებს აქ ჩამოსვლა რომ არ უნდათ...

არჩილ ბერიძე მოლოდინებზე

ეროვნული ლიგის 2019 წლის სეზონი ბათუმის "დინამომ" მეორე ადგილზე დაასრულა. აჭარული კლუბის პრეზიდენტმა არჩილ ბერიძემ ჩემპიონობის რეალური შანსის ბოლო ტურებში განიავება მძიმედ გადაიტანა, მაგრამ ხელი არ ჩაუქნევია და აცხადებს, რომ 2020 წელს შავიზღვისპირული კლუბის მიზანი საქართველოს მასშტაბით ყველა შესაძლო ტიტულის მოგება იქნება. საინტერესო მინიშნებაც სწორედ ამ დროს გააკეთა.

"კლუბი რამდენიმე ლეგიონერის მოწვევასაც აპირებს. გასული სეზონი ჩვენთვის წარმატებულიც იყო და წარუმატებელიც. რა თქმა უნდა, გაგიხარდება მეორე ადგილი, როც უმაღლეს ლიგაში გადადიხარ და ახალ გუნდს აშენებ, არადა, ბათუმის "დინამო" ძალიან ახლოს იყო იმ სანუკვარ მიზანთან, რომელსაც ჩემპიონობა ჰქვია... თუმცა, მერწმუნეთ, ბათუმში ფეხბურთის თვალსაზრისით საქმე თავიდან იწყება და ყველაფერი წინაა. ჩვენი მიზანი ახალი სტადიონის შევსება და ბათუმის "დინამოს" განვითარება. 3 მიმართულებით მივდივართ ახლა. მაგრამ ერთად ძალიან რთულია ავაშენოთ საფეხბურთო აკადემია, მოვაწყოთ ინფრასტრუქტურა და ამავდროულად, პირველი გუნდიც წარმატებული იყოს... ყოველ შემთხვევაში, ახალი ფეხბურთელები აუცილებლად იქნებიან და გუნდიც აუცილებლად გაძლიერდება", - აცხადებდა ბერიძე.

მან ეს თემა განავრცო: "ფეხბურთი ჩვენთანაც ვითარდება და ამაზე ვერავინ შემედავება. ახლა გადმოსვლაზე ველაპარაკებით რამდენიმე ქართველ ფეხბურთელს და ასევე, ლეგიონერებსაც. ევროტურნირებზე მიზანი იქნება, რომ რაც შეიძლება შორს გავიდეთ. ასევე ჩვენი მიზანია ეროვნულ ლიგაში ჩემპიონობა. ჩემი უდიდესი სურვილია, რაც შეიძლება მეტი გულშემატკივარი დაესწროს მატჩებს. ფეხბურთს ასე უფრო სხვა ხიბლი აქვს და დიდი იმედი მაქვს, ეროვნული ლიგის მატჩებს უფრო მეტი გულშემატკივარი დაესწრება. თუმცა, ყველას ვთხოვ, წინასწარ ზედმეტ მოლოდინებს ნუ შექმნით. ევროპული ტურნირების ჯგუფში მოხვერა რეალური მგონია, მაგრამ ამისთვის დრო და შრომა აუცილებელი. გულშემატკივრის მოთხოვნა ყოველთვის წინ უსწრებს ნებისმიერი კლუბის შესაძლებლობებს, მით უმეტეს, საქართველოში".

საერთოდ, ბათუმურ კლუბში ბერიძის მისვლამ ქართული ფეხბურთი უფრო ამბიციური და ლამაზი გახადა. ის მონდომებულია და ფული არ ენანება, რომ აჭარული "დინამო" ევროპულ დონეს მიუახლოვოს. მაგალითად, გასულ ზაფხულს გუნდის ლიდერ ჯოვინო ფლამარიონის ყიდვა ერთ-ერთ ბელგიურ კლუბს სურდა და 2 მილიონ ევროსაც იხდიდა, მაგრამ ბრაზილიელი არ გაუშვეს. ფლამარიონი ბათუმში 2020 წლის ზაფხულამდე დარჩება.

ამ და მსგავსი ამბების გამო, ბერიძის მონდომებას ზედმეტი მოლოდინები ახლავს. გულშემატკივრების ნაწილს მართლა სჯერა, რომ ბერიძეს შეუძლია მოსკოვის "სპარტაკიდან" წასასვლელად გამზადებული ჯანო ანანიძის ჩამოყვანა - საქართველოს ნაკრების ნახევარმცველისა, რომელიც წელიწადში 2 მილიონ ევროს იღებს. ეს რწმენა უზომო და დაუსაბუთებელ იმედებს აჩენს და ბერიძეს და ბათუმის "დინამოს", ზოგადად კი ქართულ ფეხბურთს, აუსრულებელი ოცნებების მსხვრევის საფრთხეს უქმნის.

ერთ-ორ წელიწადში ძლიერი გუნდი ვერ იქმნება და ეს ყველამ უნდა გაისიგრძეგანოს. ბერიძე ამ ილუზიების დამსხვრევას ცდილობს, მაგრამ ისე ჩანს, მას არ უსმენენ, მისგან მხოლოდ საკუთარი ოცნებების ასრულებას ითხოვენ...

ცეცაძე სატელევიზიო გაშუქებაზე

საინტერესო განცახდება გააკეთა გია ცეცაძემ. მან ტელეკომპანიებს მოუწოდა, რომ ქართული ფეხბურთი აქტიურად გააშუქონ, რადგან ეს საქართველოშიც კი მომგებიანია.

"ტელევიზიებს ვთხოვ, რომ ქართულ ფეხბურთს და ეროვნული ლიგის თამაშებს ყურადღება მიაქციონ. ევროპაში კლუბების შემოსავლის ერთ-ერთი ძირითადი წყარო სატელევიზიო კონტრაქტებია. გასაგებია, რომ ჩვენ ინგლისის და ესპანეთის მსგავს კონტრაქტებს ვერ გავაფორმებთ და მათი დონის შემოსავლებზე ვერ ვიოცნებებთ, მაგრამ ყველა ტელევიზიას ვთხოვ, შეხედონ ეროვნული ლიგის რეიტინგებს და ამის მიხედვით იმსჯელონ, ღირს თუ არა ჩვენი ჩემპიონატის გაშუქება", - ამბობს გია ცეცაძე.

მან კონკრეტული დეტალებიც დაასახელა: "ფაქტებიდან ჩანს, რომ ინტერნეტარხზე ეროვნული ლიგის თამაშებს საკმაოდ დიდი აუდიტორია უყურებს და ხალხს აინტერესებს. გაოცებული დავრჩი, როც გავიგე, რომ შარშან ბათუმის "დინამოს" და "საბურთალოს" მატჩს ინტერნეტ-არხზე "ლაივში" 41 ათასმა ადამიანმა უყურა!  ეს გამაოგნებელი ციფრებია და ვისაც ანალიზის უნარი აქვს, ზუსტ დასკვნას გააკეთებს. ანუ ჩვენი ჩემპიონატის მატჩები იაფფასიან სერიალებზე ბევრად უფრო ყურებადია. აქედან გამომდინარე, დარწმუნებული ვარ, რომ სატელევიზიო შემოსავლების მიღება საქართველოშიც შესაძლებელია".

ნამდვილად საინტერესო თემაა. საბოლოო მონაცემები არ გამოქყვეყნებულა, მაგრამ ცნობილია, რომ 3 წრის შემდეგ ფეხბურთის ფედერაციის "იუთუბ-არხზე" ჩემპიონატის თამაშები 1,47 მილიონმა ადამიანმა ნახა. რომელ პოლიტიკურ შოუს ან ამბავს აქვს ასეთი ნახვა?

მაგრამ ამ ყველაფრის შემდეგ ტელევიზიების დიდი ნაწილი მაინც ამჯობინებს უფრო ვრცლად გააშუქონ ერთპროცენტიანი პარტიებისა და მათი არარსებული "მრევლის" საქმიანობები. ხალხის დიდ ნაწილს რაც აინტერესებს, ის (ანუ ფეხბურთი) განზე რჩება.

არარსებული თუ უცნაური სპონსორები

მცირე ხნის წინ "ლელოში" დაიბეჭდა ინფორმაცია, საიდანაც გაირკვა, რომ საფეხბურთო კლუბი "ცხინვალი", რომელიც დასრულებული სეზონის შემდეგ ლიგა 3-ში დაქვეითდა, აუქციონზე გაიყიდა. არსებული ინფორმაციით, მყიდველს (ვინმე ლაშა კაპანაძე) კლუბი ჯერაც არ გადაუფორმებია და მასთან დაკავშირებაც ვერ ხერხდება.

ანუ, ვინ იყიდა კლუბი და ეს კუკუდამალობანა რაღაა?! საერთოდ, სპონსორებთან დაკავშირებით მიმდინარე პროცესები ძალიან უცნაურ შთაბეჭდილებას ტოვებს.

გახსოვთ, ალბათ, "ზუგდიდშიც" გამოჩნდა ადრე სპონსორი. იქაურები გახარებულებიც იყვნენ, გვეშველაო. ამ სიხარულს ბევრი ვიზიარებდით, რადგან ამ უდიდესი პოტენციალის მქონე ქალაქს ფინანსური რესურსი სულ სხვაგვარად გამოაჩენდა...

მაგრამ მოხდა წარმოუდგენელი რამ - გაძლიერების ანცვლად, გუნდმა თამაში თამაშზე წააგო და ეროვნული ლიგიდან გავარდა. გავიდა ერთი წელი და სპონსორი უკვე ფოთის "კოლხეთში" გამოჩნდა. იგივე სიხარული, იგივე იმედები და... სამწუხაროდ, ისეთივე დასასრული - ამჯერად, ამ უცნაურად მოსულ და წასულ სპონსორს ფოთელების ლიგა 2-ში დაქვეითება მოჰყვა, კლუბს კი ვალები დარჩა.

წლეულს "შევარდენშიც" იგივე მოხდა. პირველი 3 წრის განმავლობაში გუნდი სამეულში იყო, მესამე წრეში საუკეთესო შედეგიც აჩვენა... მაგრამ მერე, როცა კლუბი ძველმა მეპატრონეებმა დატოვეს, აღმოჩნდა, რომ სპონსორის ხელში ვერც ხელფასები რიგდებოდა და შედეგებიც გაუარესდა. არსებობს ინფორმაცია, რომ კლუბს ფეხბურთელების მიმართ დავალიანება დაუგროვდა.

ჩნდება ბუნებრივი კითხვა - ვინ არიან ეს "სპონსორები" და რეალურად, რა მიზნებს ისახავენ, თუკი მათი გამოჩენით კლუბი ფინანსურადაც ზარალდება და სპორტული კუთხითაც? რეალური ინვესტორი ხომ კლუბს ამ დღეში არ ჩააგდებდა?!.

1728
მკითხველის კომენტარები / 0 /
მსგავსი ამბები
რუბრიკის სხვა სიახლეები
;