თემურ ფარცვანია: საქართველოს ნაკრებიდან ისეთი ინტერესი არ იყო, როგორიც მსურდა

დონეცკის "ოლიმპიკის" პრეზიდენტის, ვლადისლავ გელზინის მიერ თემურ ფარცვანიას მისამართით გაჟღერებულმა ბრალდებებმა და ჩაწყობილი თამაშების სკანდალმა გადაფარა თემა, რომელიც ჩვენთვის არანაკლებ საინტერესო უნდა იყოს.

26 წლის მცველმა "ფუტბოლბუმთან" ინტერვიუში ილაპარაკა, თუ რატომ ჩათვალა "ვიკიპედიამ " "ზუგდიდის" ფეხბურთელად, რომელი ქართული გუნდები იწვევდნენ და რატომ არ თამაშობს საქართველოს ნაკრებში.

"რამდენიმე წლის წინ ინსტაგრამზე დავდე ფოტო, რომელზეც "ზუგდიდის" მაისურა მეცვა, რის შემდეგაც მედიამ დაწერა, თითქოს, ამ ქართულ კლუბში გადავდიოდი.

სინამდვილეში, ასე მოხდა: სახლში ჩავედი. "ზუგდიდში" ჩემი მეგობარი თამაშობს და მისი ფორმით გახუმრება გადავწყვიტე - მაისურა ჩავიცვი, ფოტო გადავიღე და დავწერე, თითქოს, "ოლიმპიკს" დავემშვიდობე.

მეგობარს ვუთხარი: ნახე, მალე ამისგან ინფორმაციას გამოაცხობენ-მეთქი. ასეც მოხდა და "ვიკიპედიის" ერთ-ერთ უცხოენოვან გვერდზე ჩანაწერიც გაჩნდა, თითქოს, "ზუგდიდის" ფეხბურთელი გავხდი. შემდეგ მწვრთნელმა პრეზიდენტს დაურეკა და ჰკითხა - ეს მართალიაო?!", - ამბობს ფარცვანია.

ისე, უკრაინული პასპორტის მქონე ქართველს სამშობლოში მართლაც იწვევდნენ, ეს მედიასთან "ზუგდიდის" ყოფილმა ვიცე-პრეზიდენტმა და ფარცვანიას მეგობარმა ლევან გულორდავამ თქვა: "რა თქმა უნდა, ინტერესი იყო და არა მხოლოდ თბილისის "დინამოს", არამედ, გორის "დილასგანაც". ნებისმიერი ქართული კლუბი მზადაა, ფარცვანიას საუკეთესო პირობები შესთავაზოს და გადაიბიროს".

ფარცვანიამ არაერთხელ თქვა, რომ საქართველოს მოქალაქეობის მიღება და ეროვნულ ნაკრებში თამაში სურდა: "საქართველოს ნაკრებისგან რაღაც ინტერესი იყო, მაგრამ არა ისეთი, როგორიც მსურდა.

მოქალაქეობა ნებისმიერ დროს შეიძლება დავიბრუნო. უკრაინაში გავიზარდე და ამ ქვეყანამ ძალიან ბევრი რამ მომცა. ასე რომ, მოქალაქეობის შეცვლას ჯერ არ ვჩქარობ".

ყოველდღიური სპორტული გაზეთი "ლელო"
1449
მკითხველის კომენტარები / 0 /
მსგავსი ამბები
რუბრიკის სხვა სიახლეები
;