თემურ შონია: უცხოეთის შანსი გამოჩნდა და წამოსვლა ვამჯობინე

ბათუმის "დინამო" გუნდის კაპიტანმა და ლიდერმა თემურ შონიამ დატოვა. 27 წლის ნახევარმცველმა ზღვისპირული კლუბის ფორმით 109 მატჩი ჩაატარა და 26 გოლი გაიტანა. ეროვნული ლიგის პლეი ოფის შეხვედრაში ბათუმელები ბოლნისის "სიონთან" პენალტების სერიაში რომ დამარცხდნენ და ლიგა 2-ში დაქვეითდნენ, შონიამ გუნდის დატოვება ამის შემდეგ გადაწყვიტა.

"4 სეზონი, 100-მდე მატჩი, ბევრი სიხარული და ხალხის დიდი სიყვარული! სასწაული ბიჭები, რომელთა გვერდითაც მომიწია თამაშმა და ამაყი ვარ, რომ ეს ბიჭები ჩემი ოჯახის წევრები იყვნენ. ყველას დიდი მადლობა ამისთვის! მადლობა მწვრთნელებს, პერსონალს და უფროსობას ნდობისთვის. ყველაზე დიდი მადლობა ბათუმელ გულშემატკივარს, რომელიც, მიუხედავად ცუდი სეზონისა, ბოლომდე გვერდში გვედგა. მადლობასთან ერთად, დიდი ბოდიში, რომ იმედები გაგიცრუეთ. "პირატებო", თქვენ საუკეთესოები ხართ, იმსახურებთ უმაღლესში დაბრუნებას და ბევრ წარმატებას. მადლობა განვლილი ოთხი სეზონისთვის", - ამ სიტყვებით დაემშვიდობა თემურ შონია გუნდს.

გავრცელებული ინფორმაციით, გუნდი გამოცდილმა თავდამსხმელმა ოთარ მარცვალაძემაც დატოვა და ის უმაღლესი ლიგის დებიუტანტ "რუსთავში" ითამაშებს.

- გუნდი დატოვეთ. ბოლო თამაშებში ძირითადში ხშირად არ ჩნდებოდით. გუნდიდან წასვლას აპირებდით და ეს იყო მიზეზი?
- არა, ეს არაფერ შუაშია. ძირითადში კი არა, საერთოდ, ბოლო 3 თამაში არც უნდა ჩამეტარებინა, რადგან ტრავმა მაწუხებდა და მოედანზე გამაყუჩებლით გავდიოდი.

- არადა, ბოლო შეხვედრა ძირითადში დაიწყეთ...
- ასე იყო, მაგრამ ტრავმა ბოლომდე მორჩენილი არ მქონდა. თუმცა, მატჩის მნიშვნელობიდან გამომდინარე, ტკივილებიც დამავიწყდა. ამ თამაშის გამოტოვება არ შეიძლებოდა!

ყველაფერს ვიტყვი, რაიმე გაუგებრობა რომ არ შეიქმნას: გუნდი იმიტომ არ დამიტოვებია, რომ გავვარდით. უბრალოდ, ჯერ კიდევ სეზონის მსვლელობისას გამიჩნდა აზრი, რომ ეს ნაბიჯი უნდა გადამედგა. უბრალოდ, ერთ ადგილს ვტკეპნიდი და წასვლა ვამჯობინე. თანაც, ახლა უცხოეთში ვარიანტები გამოჩნდა და მივხვდი, რომ დადგა დრო, ეს გამოწვევა მიმეღო.

- რომელ გუნდში გადადიხართ?
- ყველაფერი ამ დღეებში გადაწყდება. რამდენიმე ვარიანტია.

- ქვეყანას მაინც არ გაგვიმხელთ?
- ერთდროუალდ ისრაელში, უკრაინასა და ირანში მიწვევენ. ამ სამიდან რომელიც უკეთეს პირობებს შემოთავაზებს, იქ წავალ.

- სამივე უმაღლესი ლიგის გუნდია?
- დიახ, სამივე. ჩვენთან უფრო უარესი პირობები და დონეა, ვიდრე ამ სამ ქვეყანაში. ეს სიტუაცია ჩვენს ფეხბურთელებსა და კლუბებს ზრდაში ხელს ნაკლებად უწყობს. ბოლო ტრავმაც ამ პირობების გამო ავიკიდე. ხელოვნურ საფარზე ვარჯიში თოვლის ან წვიმის დროს მიღებულია, მაგრამ მუდმივად იქ დატვირთვა ფეხბურთელს ვნებს.

- წარუმატებელ სეზონს მხოლოდ ეს ახსნა ვერ ექნება...
- რა თქმა უნდა, მაგრამ არც უამისობაა. ხან ქობულეთში ვთამაშობდით, ხან - ბათუმის "რაგბი არენაზე", ხან კიდევ იმდენ ტრავმირებული გვყავდა, ოპტიმალური შემადგენლობით გადაბმულად ორი თამაში არ ჩაგვიტარებია... ასეთი ცუდი სეზონი ბოლო წლებში არ გვქონია. მაყურებელი რომ ითხოვდა, ისეთი ფეხბურთი ვერ ვაჩვენეთ.

- უხარისხო მოედნების გარდა, კიდევ რა სირთულეებს აწყდებოდით?
- არაერთს, მაგრამ ამაზე ჩემგან ლაპარაკი არასწორი იქნება. სხვათა შორის, იღბალიც არ გვწყალობდა. ბევრი ისეთი თამაში წავაგეთ, მოგებას რომ ვიმსახურებდით. იმავე გორის "დილასთან" 2:0-ის შემდეგ 2:3 როგორ წავაგეთ, დღემდე ვერ ამიხსნია. თამაშის ბოლოს ანგარიშის შენარჩუნება გვიჭირდა.

- ეს ცუდი ფიზმომზადების ბრალი ხომ არ იყო?
- მე უფრო კონცენტრაციის ნაკლებობას ვაბრალებ. თუმცა, კონკრეტული მიზეზის დასახელება გამიჭირდება. ფეხბურთი წვრილმანებისგან შედგება და საბოლოოდ, ყველაფერი შედეგში იყრის თავს. ეტყობა, ბევრი პრობლემა დაგროვდა და ბოლოს ეს წარუმატებლობაში აისახა.

იმედია, ბათუმის "დინამო" პირველივე სეზონში დაბრუნდება ეროვნულ ლიგაში. ბათუმი და ჩვენი გუნდის გულშემატკივარი ასეთ იმედგაცრუებას არ იმსახურებდა.
მერაბ მამულაშვილი

ყოველდღიური სპორტული გაზეთი "ლელო"
1761
მკითხველის კომენტარები / 0 /
მსგავსი ამბები
რუბრიკის სხვა სიახლეები
;