თენგიზ სულაქველაძე: მჯერა, ამ საქმეს ბოლომდე მივიყვანთ! ...ოღონდ, არ უნდა მოვდუნდეთ, ეს აქსიომაა!

საქართველოს ეროვნული ნაკრები წარმატებით თამაშობს ერთა ლიგაზე. ყაზახეთსა და ლატვიასთან მოგებული მატჩების შეფასება თბილისის "დინამოს" ვეტერანსა და ჩვენი ფეხბურთის ლეგენდას, თენგიზ სულაქველიძეს ვთხოვეთ...

- ლატვიასთან მატჩი, როგორც იტყვიან, ჯერ კიდევ ცხელია და პირველ რიგში ამ თამაშის შეფასებას გთხოვდით...

- ერთა ლიგაზე თამაშები ძალიან ახლო-ახლოსაა და, ჩემი აზრით, ლატვიასთან შეხვედრაში სწორედ ამ ფაქტორმა იჩინა თავი. ფეხბურთელებს გადაღლილობა ეტყობოდათ, ისინიც ადამიანები არიან... ყაზახეთში ძალიან დამღლელი მატჩი იყო, მერე გადაფრენა, გადმოფრენა... სამ საათზე მეტი უნდა იფრინო ერთ გზაზე.

ლატვიასთან მატჩში აღარ იყო ის ჯანი, რომელიც აუცილებლად იქნებოდა, გუნდი დასვენებული რომ ყოფილიყო. მიუხედავად ამისა, თავიდან ბოლომდე საქართველოს ნაკრებს მიჰყავდა თამაში და იმსახურებდა კიდეც მოგებას. გავითვალისწინოთ ისიც, რომ ლატვია მთელი გუნდით იდგა უკან და ასეთ დროს ძალიან ძნელია მწყობრი დაცვის გარღვევა. იდეალური ფიზიკური მომზადება გჭირდება, სისწრაფეზე რომ შეუტიო.

- მანამდე იყო გასვლითი გამარჯვება ყაზახეთის ნაკრებთან, ჯგუფში ჩვენს მთავარ კონკურენტთან...

- ყაზახეთი კარგი გუნდია და ეს ამ თამაშშიც გამოჩნდა. ორივე თამაშში ჩანდა დიდი ჟინი... იმავე ყაზახეთში გადამწყვეტი სიტყვა თქვა ჩვენი ფეხბურთელების ინდივიდუალურმა კლასმა. ამაში ვაჯობეთ მეტოქეს. ავიღოთ გიორგი ჩაკვეტაძის გოლი, რომელიც შესანიშნავ ინდივიდუალურ ქმედებას მოჰყვა.

- საქართველოს ნაკრები ჯგუფის უპირობო ფავორიტად იქცა...

- ასეა, მაგრამ არავითარ შემთხვევაში არ უნდა მოვდუნდეთ! ეს აქსიომაა! რა თქმა უნდა, ჩვენ შეგვიძლია ამ ჯგუფში პირველობა და, ზოგადად, ჩვენი მთავარი ამოცანის გადაჭრაც, რასაც ევროპის ჩემპიონატზე გასვლა ჰქვია.

- ამ ორ შეხვედრაში რომელიმე ფეხბურთელს თუ გამოარჩევდით?

- გამოვარჩევდი გიორგი ჩაკვეტაძეს და მეც რომ არ გამოვარჩიო, მარტივი სტატისტიკა ამბობს ყველაფერს. პირველ შეხვედრაში გიორგიმ ანგარიში შესანიშნავი ინდივიდუალური ქმედებით გახსნა, მეორე საგოლე კომბინაციაშიც მონაწილეობდა, ლატვიასთან კი 11-მეტრიანი მოგვიტანა - მეტი რაღა ვთქვა?!

- ზოგადად, რა მოგწონთ ჩაკვეტაძის თამაშში?

- ის თამაშობს როგორც მოედნის ცენტრში, ისე ორივე ფლანგზე, ძალიან აქტიური და თამამი. შეუძლია კაცის მოტყუება და დარტყმა. რაც მთავარია, ის არის ახალგაზრდა და 100 პროცენტით ვარ დარწმუნებული, კიდევ მოუმატებს.

- ...და ვრჩებით საფეხბურთო ქვეყნად. ამის დასტურია ის, რომ ლატვიასთან მატჩის სანახავად 50 ათასი ქომაგი მოვიდა...

- დიახ, საქართველო საფეხბურთო ქვეყანაა. ჩვენ ასეთი ვიყავით და ასეთად ვრჩებით. ერთი თამაში მოვიგეთ ყაზახეთში, გაგვიჩნდა კონკრეტული მიზანი და ლატვიასთან სტადიონი გაივსო. გულშემატკივარი ნაკრების გვერდითაა და ეს ძალიან მნიშვნელოვანია.

ყოველდღიური სპორტული გაზეთი "ლელო"
731
მკითხველის კომენტარები / 0 /
მსგავსი ამბები
რუბრიკის სხვა სიახლეები