თენგიზ სულაქველიძე: მჯერა, ორივე თამაშს მოვიგებთ!

ერთა ლიგის მატჩები მოახლოვდა და "ლელო" კვლავ შეეხმიანა თენგიზ სულაქველიძეს, რომლის აზრს ჩვენი მკითხველი ყურადღებით ეცნობა და პატივს სცემს.

ლეგენდარულ ფეხბურთელს ყაზახეთსა და ლატვიასთან წინა მატჩებამდეც ვკითხეთ აზრი და გვითხრა - ორივე თამაშს მოვიგებთო. ასე აგიხდეთ ყველაფერი!..
ამიტომ, ქართული ფეხბურთის თვალსაჩინო წარმომადგენელი ერთხელაც შევაწუხეთ. მან ტრადიციულად საინტერესოდ ილაპარაკა მოახლოებულ მატჩებზე...

- ერთა ლიგის სასტარტო მატჩების წინ თქვით, ორივე თამაშს მოვიგებთო. ახლა როგორია თქვენი განწყობა?

- მაშინ მართლაც ასე ვთქვი და ჩემი პროგნოზი გამართლდა. რა თქმა უნდა, თანამედროვე ფეხბურთში ყველა მეტოქეს დაფასება სჭირდება, მაგრამ მჯერა, ახლაც ორივე თამაშს მოვიგებთ. ასე რომ, ანდორასა და ლატვიასთან მატჩების წინ ძალზე ოპტიმისტურად ვარ განწყობილი.

- რა გაძლევთ ამ ოპტიმიზმის საფუძველს?

- ...შედეგი, რომელიც ვაჩვენეთ ყაზახეთსა და ლატვიასთან მატჩებში. საქართველოს ნაკრებში ძალიან კარგი განწყობაა. ჩვენი გუნდი მიდის სანუკვარი მიზნისკენ, რასაც ევროპის ჩემპიონატზე გასვლა ჰქვია. გარდა ამისა, შემადგენლობაშიც არის მატება...

- ჯანო ანანიძის ნაკრებში დაბრუნებას გულისხმობთ?

- რა თქმა უნდა. ყველა დამეთანხმება, რომ ჯანო ჩვენი გუნდისთვის ძალიან დიდი ძალაა. კარგი იქნებოდა, ლევან მჭედლიძესაც ეთამაშა, მაგრამ... რას ვიზამთ... გამოჯანმრთელდება და სამომავლოდ დიდ სარგებლობას მოუტანს ნაკრებს.

- ანდორის ნაკრებთან როგორ თამაშს ელით?

- გამოგიტყდებით და, ამ გუნდზე მწირი ინფორმაცია მაქვს. მათი თამაში არ მინახავს. თუმცა ისედაც ნათელია, რომ დაცვიდან ითამაშებენ. საქართველოს ნაკრებმა ეს თამაში აუცილებლად უნდა მოიგოს.

- ამის მერე რიგაში გაცილებით რთული თამაში გვექნება...

- ეს ბუნებრივია, რადგან ლატვია შეკრული და ორგანიზებული გუნდია. თუმცა, ჩემი აზრით, ლატვიასთან გასვლაზე უფრო გაგვიადვილდება თამაში, ვიდრე - შინ.

- რატომ გგონიათ ასე?

- გეტყვით. ლატვიას ამ შეხვედრაში მხოლოდ გამარჯვება უნდა, ამიტომ, მეტოქე იძულებული გახდება, გაიხსნას და დიდი ძალებით წამოვიდეს შეტევაზე. განვლილმა თამაშებმა, მეტადრე ასტანაში ჩატარებულმა მატჩმა, გვიჩვენა, რომ საქართველოს ნაკრები ძალიან კარგად მოქმედებს კონტრშეტევებზე. მეორე საკითხია ის, რამდენად იქნება კომფორტული ასეთი ფეხბურთი ლატვიისთვის. არადა, სატურნირო მდგომარეობა მათ აიძულებთ, სწორედ ასე ითამაშონ.

- ესე იგი, რიგაშიც მოგებაზე უნდა ვითამაშოთ...

- ჩემი აზრით, ნამდვილად შეგვიძლია მოგება! საქართველოს ნაკრები შემადგენლობის თვალსაზრისით ამ ჯგუფში ყველას აღემატება და, მათ შორის, ლატვიასაც. ამას ჯერ კიდევ მაშინ ვამბობდი, სანამ ეს ტურნირი დაიწყებოდა და იმავეს ვფიქრობ ახლაც.

- ფაქტია, ამ ორი გამარჯვების შემდეგ ხალხმა ფეხბურთისკენ იბრუნა პირი...

- ეს ძალიან მნიშვნელოვანი მომენტია. ჩვენ მუდამ ვიყავით საფეხბურთო ერი და ეს თვისება არც არასოდეს დაგვიკარგავს. ერთხელაც ვნახეთ, რომ საჭიროა თუნდაც პატარა წარმატება, პატარა ბიძგი და ნაპერწკალი, რომ ხალხი მაშინვე ავსებს სტადიონს. მჯერა, ეს პროცესი გაგრძელდება და ამას ხელს შეუწყობს საქართველოს ნაკრების წარმატებული თამაში.

ყოველდღიური სპორტული გაზეთი "ლელო"
2155
მკითხველის კომენტარები / 0 /
მსგავსი ამბები
რუბრიკის სხვა სიახლეები