თენგიზ სულაქველიძე: როტერდამში მსაჯმა ჯოჯოხეთი მოგვიწყო, მაგრამ 'ფეიენოორდი" არბიტრიანად დავამარცხეთ

თბილისის "დინამომ" თასების მფლობელთა თასის ფინალურ შეხვედრაში იენის "კარლ-ცაისთან" თამაშის უფლება ნახევარფინალში როტერდამის "ფეიენოორდის" ძლევით მოიპოვა. პირველ, თბილისურ შეხვედრაში მეტოქეს 3:0 მოვუგეთ და თითქოს ყველაფერი გადაწყვეტილი ჩანდა, მაგრამ ჰოლანდიურ შეხლაში ყველა მოლოდინს გადააჭარბა ავსტრიელ არბიტრთა არაობიექტურობამ. 

დინამო
3
ფეიენოორდი
0
1/2 ფინალი, პირველი მატჩი
1981 წლის 8 აპრილი, თბილისი, ვ.ი.ლენინის სახელობის სტადიონი, 80 ათასი მაყურებელი
გოლები: სულაქველიძე (24), გუცაევი (30), სულაქველიძე (51)
"დინამო" (თბილისი): გაბელია, კოსტავა, ჩივაძე, ხინჩაგაშვილი, თავაძე, დარასელია, სვანაძე, სულაქველიძე (ხიზანიშვილი, 61), გუცაევი, ყიფიანი, შენგელია (ჟვანია, 65)
მთავარი მწვრთნელი. ნ.ახალკაცი
"ფეიენოორდი" (როტერდამი): ჰილე, ნილსენი, ტროსტი, (ბრარდი, 76), სტაფლიუ, ვიინსტეკერსი, ბოუენსი, ფერმიულერი, ბუდინგი, ნოტენი, პეტურსონი (დე ლიუივი, 55), ვან დეისენი.
მთავარი მწვრთნელი: ვ.ეჟეკი
გაფრთხილება: სტაფლიუ (65)
მსაჯები: ე.ფრედსიკსონი, შ.იოჰანსონი, ი.იოჰანსონი (ყველა შვედეთი).

ჰოლანდიელებთან ორმატჩიანი დუელის გახსენება თენგიზ სულაქველიძეს ვთხოვეთ, ვინც თბილისურ მატჩში საუკეთესო იყო და ორივე გუნდის შემადგენლობაში და დუბლიც მიითვალა.

"თბილისში მეტოქეს ულაპარაკოდ მოვუგეთ. არადა, მაშინდელი "ფეიენოორდი" ევროპის ერთ-ერთი საუკეთესო გუნდი იყო, რომელიც შესანიშნავი შემსრულებლებით გახლდათ დაკომპლექტებული.

ვიცოდით, რომ თბილისში რაც შეიძლება დამაჯერებლად უნდა მოგვეგო და ეს გავაკეთეთ კიდეც. ორი გოლი მე შევაგდე, ერთიც ვლადიმერ გუცაევმა გაიტანა. კიდევ გვქონდა მომენტები, მაგრამ მათი გამოყენება ვეღარ შევძელით.

  თენგიზ სულაქველიძე: ლობანოვსკი მეძახის და მეუბნება, მარადონა უნდა დაიჭიროო! [VIDEO]

ვინც მიცნობს, ყველამ იცის, რომ ძალიან არ მიყვარს საკუთარ თავზე საუბარი, მაგრამ ჩემს კარიერაში ის მატჩი ერთ-ერთი საუკეთესო იყო. არის თამაშები ფეხბურთელის კარიერაში, როცა მას ყველაფერი გამოსდის და ასე იყო ჩემს შემთხვევაში.

პირველი გოლი თავით გავიტანე ფლანგური ჩაწოდების შემდეგ, მეორე კი მოწინააღმდეგის შეცდომის შემდეგ. ჰოლანდიელები ხელოვნურ თამაშგარეს ქმნიდნენ. მომენტი დავიჭირე, თვითონ წავიღე ბურთი და შევაგდე.

მოკლედ, ყველანი ძალიან ბედნიერები ვიყავით თბიულისური შეხვედრის შედეგის გამო. ოდნავაც კი ვერ წარმოვიდგენდით, ასეთი რამ თუ გველოდა ჰოლანდიაში. ძალიან ბევრ შეხვედრაში მიმიღია მონაწილეობა და პირდაპირ უნდა ვთქვა, რომ ასეთი მიკერძოებული მსაჯობა მე არ მინახავს. 

ფეიენოორდი
2
დინამო
0
1/2 ფინალი, მეორე მატჩი
1981 წლის 22 აპრილი, როტერდამი, "ფეიენოორდის" სტადიონი 35 ათასი მაყურებელი
გოლები: ბოუენსი (43), ნოტენი (57, პენალტი)
"ფეიენოორდი" (როტერდამი): ვან ენგელენი, ნილსენი (დე ლიუივი, 67), ბრარდი, ბუდინგი (პეტურსონი, 80), ვიინსტეკერსი, ბოუენსი, ფერმიულერი, ვან ტილი, ნოტენი, პეტერსი, ვან დეისენი.
მთავარი მწვრთნელი: ვ.ეჟეკი
"დინამო" (თბილისი): გაბელია, კოსტავა, ჩივაძე, ხინჩაგაშვილი, თავაძე, დარასელია, სვანაძე (კაკილაშვილი, 75), სულაქველიძე, გუცაევი, ყიფიანი, შენგელია.
მთავარი მწვრთნელი. ნ.ახალკაცი
გაფრთხილება: ხინჩაგაშვილი.
მსაჯები: ფ. ვერერი, ხ. პროხაზკა, ი. ლოზერტი (ყველა ავსტრია).

არ ვიცი ზუსტად, რა ამოძრავებდა ავსტრიელ მსაჯს. ალბათ ის, რომ ჩვენ მაინც საბჭოთა კავშირის ნაწილი ვიყავით და მათთვის უმჯობესი იქნებოდა, თუ ნაღდი ევროპული გუნდი ითამაშებდა ფინალში.

ორი გოლი არ ჩაგვითვალა, ორი თერთმეტმეტრიანი არ დაგვიდო. მართლა ყველაფერი გააკეთა იმისათვის, რომ "ფეიენოორდი" გასულიყო ფინალში. ასეთ შეხვედრებში ნიუანსებიც კი ძალიან ბევრს წყვეტს, არათუ მსაჯის აშკარა მხარდაჭერა.

ბოლოს ისე წავიდა საქმე, რომ მინდორზე მყოფი "დინამოს" ფეხბურთელები ხმას საერთოდ ვეღარ ვიღებდით. ოდნავი მიზეზი და დაგვღუპავდა საერთოდ, რომელიმე ჩვენგანს უსათუოდ გააძევებდა მინდვრიდან. ჩავამთავრეთ ეს თამაში და ძალიანაც გავიხარეთ - "დინამო" თასის მფლობელთა თასის გათამაშების ფინალში გავიდა!

3001
მკითხველის კომენტარები / 0 /
მსგავსი ამბები
რუბრიკის სხვა სიახლეები